თბილისში პარლამენტის შენობასთან შვილმკვდარი მამების აქცია მე-18 დღეა მიმდინარეობს.
ზაზა სარალიძე და მალხაზ მაჩალიკაშვილი, რომელთაც შვილები სხვადასხვა დროს და სხვადასხვა ვითარებაში დაეღუპათ, სამართლიანობის აღდგენის მოთხოვნით, მხარდამჭერებთან ერთად ხელისუფლების გადადგომას ითხოვენ.
აქციას მმართველი გუნდის და საზოგადოების ნაწილი პოლიტიკურს უწოდებს და ორგანიზატორად „ნაციონალური მოძრაობას“ ასახელებს.
როგორც დღეს, ზაზა სარალიძემ პარლამენტის წინ გამართულ ბრიფინგზე ჟურნალისტებთან საუბრისას განაცხადა, აქცია პოლიტიკური გუშინდლამდე არ ყოფილა, თუმცა, ახლა, ხელისუფლების გადასაყენებელ მეთოდებზე ოპოზიციურ სპექტრთან ერთად აპირებენ მსჯელობას.
„გუშინ გავაკეთეთ განაცხადი და მოვუხმეთ ყველა ოპოზიციონერ ლიდერს და არა მარტო მათ, არავისთვის ზურგი არ გვიქცევია და ვისაც აქვს სურვილი მმართველი გუნდიდან შეუძლია მოვიდეს, დადგეს და ჩვენთან ერთად გაასამართლოს ეს უსამართლობა. წუხელ იყო რამდენიმე პარტიის წარმომადგენელი მოსული, რეგულარულად გვირეკავენ სხვა პარტიების წარმომადგენლებიც, გვთავაზობენ დახმარებას. დავიწყებთ კონსულტაციებს ლიდერებთან და სამომავლო გეგმას დავსახავთ, როგორ ვებრძოლოთ ამ მკვლელ ხელისუფლებას“,_განაცხადა სარალიძემ.
ის აქციებში პოლიტიკოსების ჩართვის მიზეზად გუშინ განვითარებულ მოვლენებს ასახელებს.
მისი თქმით, ხალხის მისამართით პროვოკაცია იგეგმებოდა და პოლიცია უკანონოდ მოქმედებდა.
„რაც პარლამენტის თავმჯდომარემ დააგვირგვინა, ნაციონალების მიერ მართული იყო ეს აქციაო, მინდა აღვნიშნო ხაზგასმით, გუშინდლამდე ეს არანაირი პოლიტიკური აქცია არ ყოფილა და არც იქნებოდა, მაგრამ რა ინფორმაციებიც გვქონდა, რომ აპირებდნენ პროვოკაციაზე წამოვლას, იმაზე არ ვამახვილებ ყურადღებას, რომ ჩვენს დაკავებას აპირებდნენ, იმიტომ რომ დაგვაკავებენ თუ არა, ეს არაფერს ნიშნავს ჩვენთვის, მაგრამ აპირებდნენ ხალხის მიმართ პროვოკაციაზე წამოსვლას, რაც ნათელი გახდა პოლიციის მხრიდან, მთელი პოლიცია უკანონოდ იქცეოდა“,_განაცხადა სარალიძემ.
მან ასევე აღნიშნა, რომ საქართველოს კონსტიტუციის თანახმად, პარლამენტის წინ კარვის გაშლის უფლება აქვს, თუმცა, პოლიცია ხელს უკანონოდ უშლის.
„ჩვენ კანონიერად გვაქვს უფლება კარვების გაშლის, რაც საქართველოს კონსტიტუციაში წერია და ესენი უკანონოდ გვარბევენ. აქედან გამომდინარე, დავჯდებით პოლიტიკურ პარტიებთან ერთად და გადავწყვეტთ, რა მეთოდით ვებრძოლოთ ამ ხელისუფლებას რათა ერთხელ და სამუდამოდ დავანგრიოთ ეს სისტემა“,_აცხადებს სარალიძე.
შეგახსენებთ, რომ ზაზა სარალიძეს სამართალდავებმა კარვის გაშლის უფლება არ მისცეს და მანქანიდან კარავი, ბალიშები და პლედები წაართვეს.
მოგვიანებით მას კარავი საჩუქრად დომინგო მანგომ გადასცა, თუმცა სამართალდამცავებმა ისიც ჩამოართვეს.
პარლამენტის შენობის წინ მთელი ღამის მანძილზე პოლიციელთა განსაკუთრებული მობილიზება იყო. სამართალდამცავებმა ხულიგნობისა და პოლიციისთვის წინააღმდეგობის გაწევის ბრალდებით 2 პირი დააკავეს.
