6 წლის წინ ტრაგიკულად გარდაცვლილი ნიჭიერი ახალგაზრდა ბეგი მამალაძის, რომლის შემოქმედებაც გულგრილს არ ტოვებს მის თაყვანისმცემლებს, განსაკუთრებით ახალგაზრდებს, დაბადების დღე ყოველთვის რაღაც ახლით აღინიშნება.
შარშან ამ დროს, ნოდარ დუმბაძის სახელობის გამომცემლობაში დაიბადა მისი მეორე წიგნი, ლექსების კრებული _ „მე ვხედავ“ და ამ ზაფხულს გამართულ წიგნის საერთაშორისო ბაზრობიდან ჰარვარდის უნივერსიტეტის ქართულენოვან ბიბლიოთეკაში დაიდო ბინა. ახლა კი, ამ დღეებში საფუძველი ჩაეყარა ბეგის ფონდისა და ჩოხატაურის მუნიციპალიტეტის არაფორმალური განათლებისა და კულტურული მემკვიდრეობის დაცვის ცენტრის თანამშრომლობას. ეს ურთიერთობა ხელს შეუწყობს ბეგი მამალაძის შემოქმედების პოპულარიზაციას და დაბა ბახმაროში ბეგის სახელობის ბიბლიოთეკა-მუზეუმის უფრო აქტიურ ფუნქციონირებას.
აღსანიშნავია, ისიც, რომ ბახმაროში მცხოვრებმა მოსახლეობამ ხელმოწერები შეაგროვა და განსახილველად საკრებულოში შეიტანა. ისინი ითხოვენ, რომ ჩოხატაურის ქუჩაზე აღმართს, სადაც ბეგის ბიბლიოთეკა-მუზეუმი მდებარეობს, სახელად ბეგის აღმართი მიენიჭოს.
ფონდი, ასევე, იმედს გამოთქვამს, რომ მუნიციპალიტეტის ახალი ხელმძღვანელობა და ჩოხატაურის ახლადარჩეული მერი დავით შარაშენიძე კვლავ განაგრძობს ფონდის დაგეგმილი კულტურულ-საგანმანათლებლო პროექტების მხარდაჭერას და განიხილავს ბახმაროს დამსვენებლების ხელმოწერით უკვე შესულ ინიციატივას ჩოხატაურის ქუჩის გარკვეული მონაკვეთისთვის სახელად „ბეგის აღმართის“ მინიჭების საკითხს.
ბეგი კიდევ ერთი ლექსით შეგახსენებთ სამყაროს საფუძველთა საფუძველს, სიყვარულს და თავის წარმოსახვით სამყაროში მოგიწოდებთ გაერთიანებისკენ.
ეს ჩემი სამყაროა
აქ სულის სილამაზე იარაღია,
სილამაზე სიყვარულის ნიადაგია.
მე ამ ჯოჯოხეთშიც მოვიპოვე სამოთხე,
მე მივდივარ, ხელს თუ მომცემ, შეგიძლია გამომყვე.
აარამქვეყნიურ, გამორჩეულ, თავისუფალ სამყაროში
გადავსულვარ საცხოვრებლად
სიყვარულის საბადოში.
ქვეყანაში, სადაც მხოლოდ სიყვარულით სუნთქავენ,
ქვეყანაში, სადაც ხელებს
მხოლოდ ტამტამს ურტყამენ.
მიყვარს ყველა, როგორც ღმერთი,
აღარსად ჩანს ჯოჯოხეთი.
ყველგან სამოთხეა, დღეა,
ისე ვცოცხლობთ, როგორც _ ერთი.
ჩემს ქვეყანას არ აწუხებს და არა ჰყავს მტერი.
სულს არ განასხვავებს ერი, ანდა კანის ფერი.
აქ იშლება ყველა ბოროტების მცნება,
დავარდნილი მათხოვარი აქ ისევ ფეხზე დგება.
ჩემს სამყაროში უპასუხოდ არაფერი რჩება,
თუკი სიყვარულს დათესავ, ისიც წინ დაგხვდება,
არ გაქრება, მომაკვდავიც გადარჩება,
არ დარჩება, სიყვარულის მეტი ხვდება ამას
და ამიტომაც უხარია,
გულში ცეცხლი ბუხარია,
სისხლი ძარღვში მდუღარია,
სიყვარული უნარია,
სჭირდება მოპოვება,
სხვის გულებში მოგროვება,
გადააგდე ყველა ცუდად ჩარჩენილი მოგონება.
ცხოვრება გაგიჭირდება ამ უხამს და დამპალ დროში,
მე გთხოვ შენ და გეხვეწები-
წამომყვე ჩენს სამყაროში.
ეს ჩემი სამყარო, არავის არ გავხარო
უფლებას არ მოგცემ, თვალში ცერცვი მაყარო,
ნუ იმორცხვებ, აქ არ ხარობს დუმილი,
აქ არ არის ბოღმა და აქ არ არის ტყუილი.
თუკი დაგირეკე, შენ არ დამიკიდო ყურმილი.
იქნება და მინდა გითხრა, შენ ხარ ჩემი კუმირი!
იქნება და მინდა გითხრა, თუკი როგორ მიყვარხარ!
დაიკიდე, თუ ვერ მიცნობ და ნუ მკითხავ _ ვინა ხარ?
შენ წვიმისგან დანამული გამჭვირვალე მინა ხარ,
მე კი შენთვის საიდუმლო სილამაზეს ვინახავ.
ეს ჩემი სამყაროა, ყველას ყველა უყვარს,
სხვებიც წამოიყვანე, ვინმე გვერდში თუ გყავს.
[sexy_author_bio]
