დღეს, ფეხბურთში, ევროპის ახალგაზრდულ პირველობაზე საქართველოს ეროვნული გუნდი ნიდერლანდების ნაკრებს დაუპირისპირდება და წარმატების შემთხვევაში მეოთხედფინალური სტადიის საგზურს მოიპოვებს.
გუშინ, საქართველოს ახალგაზრდული ნაკრების მთავარმა მწვრთნელმა რამაზ სვანაძემ გუნდში არსებულ ვითარებასა და თამაშისთვის მზადებაზე ისაუბრა:
„ძალიან რთული თამაში გველოდება. დაგვრჩა ერთი ნაბიჯი მიზნის მოახლოებამდე, მაგრამ ეს ყველაზე რთული ნაბიჯი იქნება. შევეცდებით, სასურველ შედეგს მივაღწიოთ და ხალხი ისევ გავახაროთ.
სამწუხაროდ, გაგნიძე ვერ დაგვეხმარება. მისი ჩანაცვლება ახლა შეუძლებელია და დავრჩებით იმავე შემადგენლობით და ვიმოქმედებთ ვითარებიდან გამომდინარე.
ჩვენ ყოველთვის გვაქვს სათადარიგო ვარიანტი, ეგრეთ წოდებული გეგმა B – ბელგიასთან თამაში სწორედ ამის ხარჯზე გადავარჩინეთ. ეს დიდი გამოცდილება იყო გუნდისთვის. ევრო 2023-ზე ყოფნა ჩვენთვის სიამოვნებაა და ასეც უნდა გავაგრძელოთ თამაში.
ვახერხებთ თუ არა ფიზიკურად ძალების აღდგენას? ტურნირი ძალიან დამღლელი გრაფიკით მიმდინარეობს – ეს რთულია ფიზიკურადაც და მენტალურადაც.
მაგრამ ძალიან დიდი შანსი გვაქვს, პლეი-ოფში მოვხვდეთ. ამიტომ, ყველანაირი დაღლა გვერდით უნდა გადავდოთ და მთავარ მიზანზე ვიფიქროთ.
ჩვენი სამივე მეტოქე ჯგუფში ძლიერია ტაქტიკურადაც და ინდივიდუალურადაც. ბევრს უთამაშია ჩემპიონთა ლიგაზეც, მსოფლიოსა და ევროპის ჩემპიონატებზე.
მაგრამ ჩვენთვის მთავარი საკუთარი თამაში და გუნდია. ყოველთვის მაქსიმუმისთვის ვიბრძვით და გვინდა ხალხის გახარება – იმ ხალხის, რომელიც მუდამ გვერდში გვიდგას.
ახლა უპირატესობა გვაქვს სატურნირო კუთხით, მაგრამ მოედანზე იმიტომ არ გავალთ, რომ ფრეზე ვიფიქროთ. შევეცდებით, მინიმუმამდე დავიყვანოთ შეცდომები დაცვაში.
ბელგიასთან შეცდომები დავუშვით და იოლი არ იყო იმ თამაშის შემოტრიალება. ჩვენ არავისი შეგვშინებია და ახლაც ასე იქნება“.
ნიდერლანდების ნაკრების მთავარი მწვრთნელი ერვინ ვან დე ლოოის კომენტარი შემდეგი გახლდათ:
„წინა ორ მატჩში მეტოქეებზე მეტი მომენტი შევქმენით და მოგებას ვიმსახურებდით. თუმცა, რეალიზაციის პრობლემა გვქონდა.
თუ ბოლო ტურში საქართველოსთან ამ ხარვეზს გამოვასწორებთ და მომენტებს გოლებად ვაქცევთ, მიმაჩნია, რომ მოგებასაც შევძლებთ.
ცხადია, რომ საქართველოს ნაკრებს დიდი მხარდაჭერა ექნება, მაგრამ ეს ვერ შეგვაშინებს, პირიქით, ველოდებით კარგ თამაშს და იმას, რომ შეხვედრის ბედს ჩვენი მოთამაშეები გადაწყვეტენ.
ველოდი თუ არა საქართველოსგან ასეთ შედეგს? ევროპის ჩემპიონატი ისეთი ტურნირია, აქ სუსტი მონაწილე ვერ იქნება და შედეგს ყველასგან უნდა ელოდე.
მნიშვნელოვანი იყო გულშემატკივრების ფაქტორი – ყველა ჰიმნს მღეროდა! მაგრამ მიმაჩნია, რომ ჩვენ უკეთესი გუნდი ვართ და უნდა მოვიგოთ.
ასეთ ატმოსფეროში თამაში სასიამოვნო იქნება. ამ ტურნირზე პირველად მოგვიწევს სავსე ტრიბუნების წინაშე თამაში და ეს კარგია მოთამაშეებისთვის, დიდი სტიმულია“.
გუშინ ცნობილი გახდა, რომ უეფა-მ თანხმობა განაცხადა საქართველოს ახალგაზრდული ნაკრების მატჩი, თუ ჩვენი გუნდი მეოთხედფინალში გავა, „მიხეილ მესხიდან“ (როგორც დაგეგმილი იყო) „დინამო არენაზე“ გადაიტანოს.
თუ A ჯგუფიდან პირველი ადგილით გავალთ, მაშინ, 1 ივლისს, 20 საათზე, C ჯგუფის (ქუთაისი, ბათუმი) მეორეადგილოსანს „დინამო არენაზე“ ვუმასპინძლებთ.
„ნაპოლის“ პრეზიდენტმა აურელიო დე ლაურენტისმა რამდენჯერმე განაცხადა, რომ ვიქტორ ოსიმენი გუნდში დარჩება და პარალელურად, მის სანაცვლოდ ისეთი თანხა მოითხოვა, გადახდას ბევრი რომ ვერ გარისკავს, მაგრამ ტრანსფერი მაინც შეიძლება განხორციელდეს.
იტალიური სპორტული მედიის მტკიცებით, „პარი სენ-ჟერმენი“ მზადაა, შეასრულოს ნეაპოლელთა პრეზიდენტის მოთხოვნა და 24 წლის ნიგერიელი თავდამსხმელის სანაცვლოდ 180 მილიონი ევრო გადაიხადოს.
„ნაპოლი“ ამჟამად მთელი გუნდით შვებულებაშია, მაგრამ ივლისის შუა რიცხვებში გუნდის ახალი მწვრთნელი რუდი გარსია კლუბს შეკრებს და მომდევნო სეზონისთვის მზადება დაიწყება. ხვიჩა კვარაცხელია და მისი თანაგუნდელები გუნდში 12 ივლისს უნდა გამოცხადდნენ, სადაც თავდაპირველად სამედიცინო შემოწმებას გაივლიან, მზადება კი ამის შემდეგ აიღებს სტარტს.
ნაპოლი შეკრებას 14 ივლისს დიმაროში დაიწყებს, სადაც გუნდი 25 ივლისის ჩათვლით მოემზადება. იქვე რუდი გარსიას შეგირდები პირველ ორ ამხანაგურ მატჩს ჩაატარებენ – 20 და 24 ივლისს. მეტოქეები ჯერჯერობით უცნობია, მაგრამ ცნობილია ის, რომ მაღალი დონის გუნდები არ იქნებიან და სავარაუდოდ, მოყვარულებს გაეჯიბრებიან.
28 ივლისიდან 12 აგვისტომდე ნაპოლი კასტელ დი სანგროში მოემზადება და ეს იქნება პრესეზონის მეორე ნაწილი. ნეაპოლელები ცხადია, ამხანაგურ მატჩებს მეორე შეკრებაზეც ჩაატარებენ, მაგრამ მეტოქეები ამ შემთხვევაშიც უცნობია.
სერია A-ს 2023/24 წლების სეზონი 20 აგვისტოს დაიწყება და 26 მაისს დასრულდება.
ავტორი
