დღეს კიდევ ერთხელ დამწუხრდა ჩოხატაური. დღეს ცნობილი გახდა, რომ მუნიციპალიტეტის მერიის კულტურის სამსახურის უფროსი გოჩა გათაშვილი გარდაიცვალა.
ყველასთვის საყვარელ პიროვნებას სოციალურ ქსელში პოსტებს უძღვნიან და ემშვიდობებიან.
“შენი ოჯახის, ჩოხატაურის, გურიისა და მთელი საქართველოს დანაკლისი ხარ. ვამაყობ, რომ ამ საოცარ ადამიანთან ურთიერთობის საშუალება მომეცა”, _ წერს ფეისბუქის საკუთარ გვერდზე ქსელის მომხმარებელი გიორგი ჯინჭარაძე.
ემოციური პოსტი დაწერა სამუზეუმო გაერთიანების დირექტორმა მარი შოშაშვილმა: “ძალიან ვწუხვარ… მართლაც გამორჩეული პიროვნება დააკლდება ჩვენს რაიონს… ყოველი შეხვედრისას, “ზემლიაკო”, როგორ ხარო, თბილად მომიკითხავდა და ჩემში განსაკუთრებულ ემოციას იწვევდა ასეთი მომართვა… აცხონოს ღმერთმა მისი სული და დაუმკვიდროს ცათა სასუფეველი!ვუსამძიმრებ ოჯახს და ახლობლებს…
მანონი ბულისკერია: ჩოხატაურის თანამედროვე სახვითი ხელოვნების გალერეაში ჩემი რამდენიმეკვირიანი პერსონალური გამოფენა დღესასწაულად მიქცია! როგორ ძალიან მეტკინა გული…
ვუსამძიმრებ ჩოხატაურს, ყველა იმ ადამიანს, ვინც ბატონ გოჩასთან ერთად ჩაიფიქრა ის დაუვიწყარი დღეები…
ვუსამძიმრებ ოჯახს და სრულიად საქართველოს!
კონსტანტინე თავართქილაძე: ჩოხატაურმა აუნაზღაურებელი დანაკლისი განიცადა. კოვიდ- 19 მა უდროოდ წაგვართვა წლების განმავლობაში კულტურის სფეროს ხელმძღვანელი. ბრწყინვალე მუსიკოსი და საზოგადო მოღვაწე, კონსერვატორიის სრული პროფესორი გოჩა გათაშვილი.
დიდებული ოჯახის პარტონი. ჩვენი სულისჩამდგმელი მკურნალი ექიმის თამარ ცინცაძის უსაყვარლესი მეუღლე. სანიმუშო მამა. არაჩვეულებრივი მეგობარი პირადად ჩემი და მრავალთა.
ყველა ინსტრუმენტს ერთნაირად ფლობდა. საესტრადო ხელოვნებას მრავალი ახალგაზრდა აზიარა. ჩოხატაურში შექმნა მოსწავლეთა
როკ ჯგუფი GURIAN NICE KIDS” ROK,, რომელმაც მრავალი წელი იარსება და ქვეყნის მასშტაბით ცნობილი გახდა.
მრავალი გეგმების, მრავალი ერთობლივი სურვილების განხორციელება არ დაგვცალდა. წარმოუდგენელი დანაკლისია.
ჩვენი პატარა ჩოხატაური და მისი მშობელი ქუთაისი ძაძებით შეიმოსა. ვუსამძიმრებ ოჯახს. ვუსამძიმრებ სრულიად საქართველოს.
გოჩა გათაშვილის გამოსათხოვარ პოსტებს სოციალურ ქსელში ბოლო არ უჩანს.
“გურია ნიუსი” მწუხარებას გამოხატავს ბატონი გოჩა გათაშვილის გარდაცვალების გამო და თანაუგრძნობს ოჯახს და ახლობლებს.
