სახელმწიფოსთან საქართველოს ეკონომიკისა და მდგრადი განვითარების სამინისტროს, ასევე, საქართველოს საკონსტიტუციო სასამართლოს ყოფილ თავმჯდომარე გიორგი პაპუაშვილთან მოქალაქე როლანდ ბლადაძის სადავო, ჩამორთმეულ ქონებაზე დავა სასამართლოში რამდენიმე წელია გრძელდება.
აღნიშნულ საქმეზე ბლადაძის მხარის სარჩელი თბილისის საქალაქო სასამართლომ 2016 წელს, ხოლო სააპელაციო სასამართლომ 2017 წელს არ დააკმაყოფილა. ამჟამად კი საქმეს, მხარეებს შორის მორიგებით დასრულების იმედით უზენაესი სასამართლო განიხილავს.
მიმდინარე დავის ფარგლებში, ორგანიზაცია „ახალგაზრდა ადვოკატების“ ხელმძღვანელი და როლანდ ბლადაძის ადვოკატი, არჩილ კაიკაციშვილი, პრემიერ-მინისტრს ღია განცხადებით მიმართავს და აღნიშნავს, რომ იმედგაცრუებული იქნება, თუკი საქართველოს მთავრობა სამინისტროს სახით, ქონება ჩამორთმეულ როლანდ ბლადაძესთან მორიგების პროცესს ჩაშლის.
კაიკაციშვილის განცხადებით, საქართველოს უზენაესმა სასამართლომ 2018 წლის 26 აპრილს, საქართველოს ეკონომიკისა და მდგრადი განვითარების სამინისტროს დავალება მისცა, განეხილა და დასთანხმებულიყო როლანდ ბლადაძის მიმართ ალტერნატიული ფართის გადაცემას ქ. თბილისში. საუბარია ორ საცხოვრებელ ფართზე ნინო ჟვანიას (ყოფილი კეკელიძის) ქუჩაზე. ლევან სამხარაულის სახელობის სასამართლო ექსპერტიზის ბიუროს დასკვნით, როლანდ ბლადაძის მიმართ ჩამორთმეული ქონება ქ. ბათუმში, დღევანდელი საბაზრო ღირებულების გათვალისწინებით, უკვე შეფასდა ნახევარ მილიონ ლარად. ამ დრომდე, სამინისტროს მდგომარეობა რჩება ბუნდოვანი და გაუგებარი. ერთი ინფორმაციით, სსიპ სამინისტროს ქონების მართვის სააგენტო თანახმაა როლანდ ბლადაძეს გადაეცეს ორი ალტერნატიული ფართი შავი კარკასის მდგომარეობით, თუმცა მათი საბაზრო ღირებულების გათვალისწინებით, ქონება ჩამორთმეულს უნდა მოუწიოს ფასთა სხვაობის ანაზღაურება. ჩანს, სსიპ სამინისტროს ქონების მართვის სააგენტო ვერ იზიარებს სასამართლოს მიდგომებსა და შეფასებებს იმის შესახებაც, რომ სახელმწიფოს მიერ მოქალაქის მიმართ უკანონო მოქმედებების შედეგად მიყენებული ქონებრივი და არაქონებრივი ზიანი გაცილებით მეტია, ვიდრე ჩამორთმეული ქონების დღევანდელი საბაზრო ღირებულება. ამასთან, იმ პირობებში, როდესაც დაზარალებული უარს ამბობდა სახელმწიფო მიმართ ქვეყნის შიგნით და საერთაშორისო ორგანოებში ყოველგვარ სარჩელზე, საჩივარსა და მიმართვაზე, მხარეს სრულიად ამორალურად მიაჩნია ფასთა სხვაობის დაბრუნებაზე საუბარი.
კაიკაციშვილის განცხადებით, თუ ეკონომიკის სამინისტრო და მთავრობა როლანდ ბლადაძესთან მორიგების პროცესს ჩაშლის, მთლიანი პასუხისმგებლობა მინისტრს და პრემიერ-მინისტრს ეკისრება. შესაბამისად, არჩილ კაიკაციშვილი მიმართავს მინისტრ დიმიტრი ქუმსიშვილსა და პრემიერ გიორგი კვირიკაშვილს, წინამდებარე საქმეზე, სამართლიანობის აღდგენის პრინციპებიდან გამომდინარე, მიიღონ სამართლებრივი და პოლიტიკური გადაწყვეტილება, საქმე დასრულდეს ეროვნულ დონეზე, სწორი დასკვნები გაკეთდეს პროცესის მონაწილე რომელიმე მხარის მიერ საქმის ევრო სასამართლოში გასაჩივრების შედეგებზე და მხედველობაში იქნეს მიღებული გარემოება იმის თაობაზე, რომ როლანდ ბლადაძის მიმართ სახელმწიფოს მიერ მიყენებული ზიანი უკვე დათვლილია, შეადგენს ნახევარ მილიონ ქართულ ლარს, თუმცა დათვლილი არ არ არის დაზარალებული მოქალაქის არაქონებრივი უფლებების დარღვევის მასშტაბი, უკანონო დევნა, პატიმრობა და პოლიტიკური დევნა. დღევანდელი სახელმწიფო არ უნდა გახდეს სისტემური დანაშაულის მიმართ შემგუებელი და როლანდ ბლადაძის ჩამორთმეული ქონების დაბრუნების პროცესი მოითხოვს პრემიერისა და პირველი ვიცე-პრემიერის განსაკუთრებულ დამოკიდებულებას და ყურადღებას.
ცნობისთვის: საქმეს ნინო ბაქაქური (თავმჯდომარე), ბესარიონ ალავიძე და ზურაბ ძლიერიშვილი განიხილავს. საქმეზე ბოლო სხდომა 4 მაისს, 14:00 საათზე განახლდება.
