იტალიის საფეხბურთო პირველობის მორიგ ტურში საქართველოს ეროვნული გუნდისა და „ნაპოლის“ თავდამსხმელმა ხვიჩა კვარაცხელიამ კიდევ ერთხელ გამოიჩინა თავი. „კრემონეზესთან“ მოგებულ – 3:0 შეხვედრაში ანგარიში 22 წლის იუბილარმა გახსნა. რასაკვირველია მისი კარგი გარჯა იტალიურმა მასმედიამაც სათანადოდ დააფასა:
Calcionapoli 24: „ერთი ბურთიც კმარა, რომ გოლი გაიტანოს და დაბადების დღე საუკეთესოდ აღნიშნოს. ბევრი მის ადგილას იმ მომენტში კუთხურს ან მაქსიმუმ ჩაწოდებას დასჯერდებოდა. თავით დუბლის შესრულებასთან ახლოს იყო“.
Calciomercato.it: „თავიდანვე ცხადყო, რომ დაბადების დღეს საკუთარ სახლში აღნიშნავდა. ტექნიკის და ეშმაკობის გოლი, რომელმაც მატჩი გახსნა. უფრო გადამწყვეტი, სულ უფრო შეუჩერებელი“.
Correire Dello Sport: „მარჯვნივ დაელოდები, მარცხნივ წავა, მარცხნივ დაელოდები – მარჯვნივ. სერნიკოლა ალბათ ვიდეოზე ნელი მოძრაობით უყურებს გოლის მომენტს, რათა გაიგოს რა ჯანდაბა გაუკეთა მეტოქემ ისეთი, რომ ასე ადვილად მოატყუა. კვარა გილოცავთ დაბადების დღეს, მაგრამ „კრემონეზეს“ ფეხბურთელები წვეულებაზე დაპატიჟებულნი არ არიან“.
ხვიჩა კვარაცხელიას დაბადების დღესთან დაკავშირებით „ნაპოლის“ მთავარმა მწვრთნელმა ლუცანო სპალეტიმ შემდეგი განცხადება გააკეთა:
„კვარაცხელიას დაბადების დღე? რამდენიმე ჩათი გვაქვს და ბიჭები გათენებას არ დაელოდნენ, შუაღამისას მიულოცეს. ეს აჩვენებს, როგორი კლიმატია გუნდში“.
„ნაპოლის“ მორიგ გამარჯვებას კლუბის პრეზიდენტი აურელიო დე ლაურენტისიც გამოეხმაურა:
„ლამაზი „ნაპოლი“ კვარათი, რომელმაც დაბადების დღე შესანიშნავად აღნიშნა, ოსიმენით, რომელიც ისევ ბომბარდირია და ელმასით, რომელმაც თამაშს წერტილი დაუსვა. ასე გააგრძელეთ!“
გუშინ ცნობილი გახდა რომ ხვიჩა კვარაცხელიას თანაკლუბელი ვიქტორ ოსიმენით კიდევ ერთი ინგლისური პრემიერლიგის გუნდი დაინტერესდა.
ბრიტანული მედიის ინფორმაციით, ვიქტორ ოსიმენის ბრწყინვალე თამაშს „ლივერპულის“ამჟამინდელი თავკაცი იურგენ კლოპი აკვირდება.
ნიგერიელი შემტევი უკვე მოხვდა „მანჩესტერ იუნაიტედისა“ და „პსჟ“-ის მიზანში. ეს გუნდები მზად არიან მასში 100 მილიონზე მეტი გადაიხადონ და როგორც ირკვევა, ნიგერიელისთვის ბრძოლაში „ლივერპულიც“ ჩაერთო.
გუშინ ცნობილი გახდა, რომ საქართველოს ეროვნული საფეხბურთო ნაკრები მიმდინარე წელს ორ საერთაშორისო ამხანაგურ შეხვედრას გამართავს.
პირველ ამხანაგურ მატჩს ვილი სანიოლის გუნდი 25 მარტს, მონღოლეთის ნაკრებთან ითამაშებს. 12 ოქტომბერს, ჩვენი გუნდის მეტოქე ტაილანდის ეროვნული გუნდი იქნება.
საქართველო – მონღოლეთის მატჩი 25 მარტს, ბათუმი არენაზე შედგება. საქართველო – ტაილანდის მატჩის მასპინძელი სტადიონი მოგვიანებით გახდება ცნობილი
საქართველოს ნაკრებს მსოფლიო რეიტინგში 78-ე ადგილი უკავია, ტაილანდი 111-ეა, მონღოლეთი კი – 183-ე.
საქართველოს ნაკრებთან მოსალოდნელ დაპირისპირებას მონღოლეთის ფეხბურთის ფედერაცია შემდეგნაირად გამოეხმაურა:
„მონღოლეთის ეროვნული ნაკრები, ისტორიაში პირველად, ევროპულ გუნდს ეთამაშება. ჩვენ გამოვალთ საქართველოს ძლიერ ნაკრებთან, რომელსაც „ვალენსიას“ მეკარე გიორგი მამარდაშვილი და იტალიური „ნაპოლის“ სუპერვარსკვლავი ხვიჩა კვარაცხელია ჰყავს“.
საპირისპირო განწყობა იგრძნობოდა ქართველ გულშემატკივრებში. გთავაზობთ ადგილობრივ სოციალურ ქსელებში განთავსებულ რამდენიმე საყურადღებო პოსტს.
„დიდი ხანია მონღოლები არ ყოფილან საქართველოში და აბა ვუმასპინძლოთ თამაშის შემდეგ“.
„მონღოლეთის და ტაილანდის მეტ სპარინგს რომ ვერ ვიშოვით, როგორ უნდა განვითარდეთ. აი, მათთვის კი მშვენიერი სპარინგია“.
„1 აპრილი მაინც იყოს, დიდ ხანს იფიქრეს სპარინგ-პარტნიორების არჩევაზე?“
„რა საჭიროა ესეთი ამხანაგური სამი დღით ადრე მონღოლეთთან. იმედია არ იუხეშებენ!! ბათუმთან ეთამაშათ დახურული არ ჯობდაა? რა მონღოლეთი? ბათუმის „დინამო“ უფრო ძლიერია ვიდრე მონღოლეთი. სიცილს ვერ ვიკავებ. სად იპოვეს? კვარა, ჩაკვე, კიტე არ ათამაშოთ“.
ალბათ ზემოთ მოყვანილი მაგალითებით ყველაფერი ნათელია. ვფიქრობ საქართველოს ფეხბურთის ფედერაცია ნაკრებისათვის ამხანაგური შეხვედრების მეტოქეების შერჩევას „უფრო სერიოზულად“ უნდა მისდგომოდა. ბოლოსა და ბოლოს, ხვიჩა კვარაცხელიასა და გიორგი მამარდაშვილის ფაქტორის გათვალისწინებით ბევრად ძლიერი ნაკრებები დაპირისპირებაზე უარს არ გვეტყოდნენ.
დღეს, ფეხბურთში, ევროპის ჩემპიონთა ლიგის ფლეი-ოფის სტადია დაიწყება.
„პარი სენ-ჟერმენი“ მიუნხენის „ბაიერნთან“ პირველი მერვედფინალური მატჩისთვის დიდი სიფრთხილით ემზადება. „პსჟ“-ს კაპიტანმა მარკინიოსმა გერმანულ „კიკერთან“ ინტერვიუში შემდეგი მოსაზრება გამოთქვა:
„ბაიერნი“ არაჩვეულებრივი გუნდია. არ აქვს მნიშვნელობა, ვინ როგორ ფორმაშია ახლა და ვინ რამდენი მატჩი მოიგო ბოლო 6 თუ 7 შეხვედრიდან – მეტოქისადმი პატივისცემით ვართ განწყობილები და ასე ვემზადებით. მიუნხენელთა დამარცხება ძალიან ძნელია, მათ რამდენჯერმე შევხვდით და ადვილი არასდროს არაფერი ყოფილა.
ჩვენ კარგად ვიცით ამ გუნდის ისტორია, მათ შორის ჩემპიონთა ლიგაშიც. „ბაიერნის“ ფეხბურთელებს ამ დონეზე ძალიან დიდი გამოცდილება აქვთ. ჩვენ კი „ჩემპიონთა ლიგა“ არასდროს მოგვიგია და ამიტომ, ახლა მათზე მეტად გვინდა ამ ტიტულის მოგება. მაგრამ ყველამ იცის, რომ ეს ურთულესი ტურნირია, რომელშიც ყველაფერს პატარა დეტალები წყვეტს. იმისათვის, რომ ჩემპიონთა ლიგაში წარმატებას მიაღწიო, ყველაფერი იდეალურად უნდა იყოს, იღბალი გჭირდება“.
ავტორი
