“ქართულ ოცნებასა” და “ნაციონალურ მოძრაობაში” დიდი მობილიზაციაა. “გურია ნიუსის” წყაროს ინფორმაციით ორივე პარტიის ათეულობით აქტივისტი ზუგდიდში უკვე გაემგზავრა.
ისინი, თავიანთი რჩეული პარტიების კანდიდატების დასახმარებლად წავიდნენ.
აქტივისტების ნაწილი ზუგდიდში გამგზავრებას ხვალ გეგმავს.
_ მე მივდივარ, როგორც დამკვირვებელი და არა როგორც აქტივისტი. “ქართული ოცნების” მიერ გაჟღერებული “პარაშა”, რომ იქ რაღაცის გამო მივდივართ, არასწორია. მე და ჩემი პარტიის კიდევ ოთხი წევრი, მივდივართ კონკრეტული ფუნქციით _ კანონით მინიჭებული უფლება-მოვალეობა უნდა გამოვიყენოთ საარჩევნო უბნებზე. ამას ვაკეთებ იმისთვის, რომ მმართველმა პარტიამ ვერ მიიტაცოს ჩვენი ხმები და ვერ გააყალბოს არჩევნები, _ აღნიშნა ჩვენთან საუბრისას “ნაციონალური მოძრაობის” ლანჩხუთის ორგანიზაციის თავმჯდომარემ კახა ასკურავამ.
ამავე პარტიის ოზურგეთის ორგანიზაციის თავმჯდომარე დავით მჟავანაძე ამბობს, რომ ზუგდიდში ხმების დასაცავად მიდიან:
“ზუგდიდში პარტიის ადგილობრივი ორგანიზაციის წევრებთან ერთად ჩვენი პარტიის ის მხარდამჭერებიც მოდიან, რომლებმაც თავად გამოთქვეს სურვილი. მივდივართ ხმების დასაცავად. მივდივართ იმისთვის, რომ ხელისუფლებას, რომელიც არჩევნების გაყალბებას აპირებს, ამის საშუალებას არ მივცეთ. ჩვენ ვიმოქმედებთ კანონის ფარგლებში”, _ აღნიშნავს მჟავანაძე.
მისივე ინფორმაციით, ყველას, რომლებიც ზუგდიდში მიდიან, სხვადასხვა ორგანიზაციის დამკვირვებლის სტატუსი და შესაბამისი დოკუმენტაცია აქვთ:
_ გამოცდილი, კვალიფიციური კადრები არიან. მათ კარგად იციან, როგორც არ უნდა მისცენ ხელისუფლებას გაყალბების საშუალება კანონის ფარგლებში, _ ამბობს მჟავანაძე.
“ნაციონალური მოძრაობის” ოზურგეთის ორგანიზაციის ლიდერის თქმით, ზუგდიდში საკუთარი ფინანსებით მიდიან:
_ მე რამდენჯერმე ვიყავი საკუთარი სახსრებით და ასეა სხვებიც. საკუთარ თავს თავად ვაფინანსებთ, _ აღნიშნავს მჟავანაძე.
“ნაციონალური მოძრაობის” ჩოხატაურის ორგანიზაციის თავმჯდომარის დიმა კორიფაძე, კოლეგების მსგავსად ამბობს, რომ ზუგდიდში ხმების დასაცავად მიდიან:
_ 8 ადამიანი მივდივართ ჩოხატაურიდან. მივდივართ ჩვენი სახსრებით ჩვენი პარტიის კანდიდატის ხმების დასაცავად, _ გვითხრა კორიფაძემ.
“ქართული ოცნების” ლანჩხუთის ორგანიზაციის თავმჯდომარე ალექსანდრე სარიშვილი, “ნაციონალური მოძრაობისგან” განსხვავებით კატეგორიულად უარყოფს ინფორმაციას, რომ მმართველი პარტიის ლანჩხუთელი აქტივისტები ზუგდიდში მიდიან:
_ მე არავის არ ვუშვებ. ახლა სად მცალია პარტიის საქმისთვის. სამსახურში ვარ და მუნიციპალიტეტის საქმეებით ვარ დაკავებული, _ გვითხრა სარიშვილმა.
ჩვენ შევეცადეთ მმართველი პარტიის ოზურგეთის საოლქო ორგანიზაციის თავმჯდომარის, მერაბ ჭანუყვაძის კომენტარიც მოგვეპოვებინა, თუმცა მან ჩვენ სატელეფონო ზარებს არ უპასუხა. პარტიი წევრებმა კი გვითხრეს, რომ მათგან ზუგდიდში არავინ მიდის:
_ ოზურგეთში, შუალედური არჩევნები და შესაბამისად წინასაარჩევნო კამპანიაა, რომელშიც პარტიის თითოეული წევრი და აქტივისტი აქტიურად მუშაობს ოზურგეთში, _ აღნიშნეს “ოცნების” ოზურგეთის ოფისში.
მმართველი პარტიის ჩოხატაურის ორგანიზაციის თავმჯდომარის, ირაკლი კუჭავას თქმით, მუნიციპალიტეტი ზუგდიდში არავის აზგავნის:
“მუნიციპალიტეტი ზუგდიდში არავის აგზავნის და არც რაიმე ხარჯს ეწევა…. შეიძლება იმას გულისხმობთ, რომ არიან ადამიანები, რომლებიც თანამშრომლობენ არასამთავრობო ორგანიზაციებთან და მათი ეგიდით გააჩნდეთ დამკვირვებლის სტატუსი…”, _ ასეთი პასუხი მოგვწერა კუჭავამ კითხვაზე თუ რატომ უშვებდნენ ზუგდიდში აქტივისტებს და რა სახსრებით.
პარტიის თავმჯდომარესთან ჩვენ იმის დაზუსტება ვცადეთ, იყვნენ თუ არა არასამთავრობო ორგანიზაციების თანამშრომლები მათი აქტივისტები, თუმცა, კუჭავამ ამ კითხვას პასუხი არ გასცა.
