გუშინ, იტალიურ მასმედიაში გავრცელდა ცნობა, რომ დღეს ხვიჩა კვარაცხელია „ნაპოლისთან“ ერთად სრულფასოვან ვარჯიშს განაახლებს.
„სალერნიტანასთან“ მოპოვებული გამარჯვების შემდეგ, „ნაპოლის“ ფეხბურთელებს ორდღიანი დასვენება მიეცათ, დღეს კი სავარჯიშო პროცესი კვლავ გაგრძელდება, რომელშიც ხვიჩა კვარაცხელიაც მიიღებს მონაწილეობას.
ამ დროს, ქალაქი ნეაპოლი და „ნაპოლის“ ყველა გულშემატკივარი დიდი განსაცდელის წინაშეა. ჩემპიონის წოდებისაკენ მიმავალ კლუბს უახლოეს მომავალში თავს შეიძლება დიდი უსიამოვნება დაატყდეს.
რამდენიმე დღის წინ, გამოცემამ „La Repubblica“ დაწერა, რომ იტალიის ფეხბურთის ფედერაცია ნეაპოლის პროკურატურას „ნაპოლიდან“ ვიქტორ ოსიმენის ტრანსფერის დოკუმენტების წარდგენას მოსთხოვს. საქმე ეხება ფინანსების ყალბ აღრიცხვას.
ფრანგულ „ლილს“ ოსიმენის ტრანსფერის სანაცვლოდ „ნაპოლიმ“ თავის დროზე ფულის გარდა, ოთხი ფეხბურთელი დაუთმო, რომლებიც ახალგაზრდულ გუნდში თამაშობდნენ და მათი ღირებულება 15 მილიონ ევროდ შეფასდა. აღსანიშნავია, რომ „ლილში“ არცერთ მათგანს უთამაშია და გუნდი თავისუფალი აგენტის სტატუსით დატოვეს.
იტალიის ფეხბურთის ფედერაციის ფედერალური პროკურორი ჯუზეპე კინე ნეაპოლის პროკურორს სთხოვს, რომ კლუბიდან ყალბი აღრიცხვის გამოძიებისთვის დოკუმენტები გამოითხოვოს.
ჯერჯერობით უცნობია, რა გადაწყვეტილებას მიიღებს იტალიის პროკურატურა. შესაძლოა, ნეაპოლელები ზუსტად ისე დაისაჯონ, როგორც ტურინის „იუვენტუსი“. იტალიის ფეხბურთის ფედერაციის ფედერალურმა სასამართლომ „იუვენტუსი“ კაპიტალის მოგებისა და ყალბი ხარჯთაღრიცხვის საქმეში დამნაშავედ სცნო და უმკაცრესი განაჩენი გამოუტანა – ტურინელებს მიმდინარე სეზონში 15 ქულა დააკლდათ და მე-10 ადგილამდე დაქვეითდნენ.
ნეაპოლელთათვის ამ თავზარდამცავ ინფორმაციას ვებგვერდი „AreaNapoli“ გამოეხმაურა და თანაქალაქელები დაამშვიდა.
„გავრცელდა ინფორმაცია, რომლის მიხედვით ცდილობენ “ნაპოლი” და დე ლაურენტისი ფინანსური კაპიტალის ხელოვნურად გაზრდაში დაადანაშაულონ, როგორც ეს მოხდა “იუვენტუსთან” დაკავშირებით უამრავი საეჭვო ოპერაციისას. თუმცა ამ ორ შემთხვევას შორის არსებითი განსხვავებაა და ნეაპოლური კლუბი ამ საკითხში უკვე გაამართლეს. არავითარი სპორტული სანქციის საშიშროება არ არსებობს და ეს, მიუხედავად იმისა, რომ ნეაპოლში სიტუაციის დესტაბილიზაციას ყველანაირად ცდილობენ – არასწორი ინფორმაციის გავრცელებით, აშკარად და მიკერძოებულად. შემთხვევები განსხვავებულია და ძირითადი ჭეშმარიტება უტყუარია.
რაც შეეხება ოსიმენის “ნაპოლიში” ტრანსფერს, აქ თავისუფალი ბაზრის კანონი მოქმედებს, მაგრამ ბევრი ცდილობს, ისე მოგვაჩვენოს, თითქოს არ ესმის სისტემის არსი, რომელმაც “იუვენტუსის” დასჯა გამოიწვია. ისინი ჟურნალისტური სპეკულაციებით ცდილობენ “ნაპოლის” დესტაბილიზაციას“.
გუშინ, იტალიურ მედიაში ამ თემაზე ახალი ინფორმაცია გავრცელდა და ქვეყნის პროკურატურას კლუბები „მილანი“ და „რომაც“ დაუკავშირეს.
საქმის არსი შემდეგში მდგომარეობს: 2018 წელს „იუვენტუსმა“ და „მილანმა“ მატია კალდარა და ლეონარდო ბონუჩი გაცვალეს, ხოლო 2019 წელს „იუვენტუსმა“ და „რომამ“ ლეონარდო სპინაცოლა და ლუკა პელეგრინი. ვინაიდან „იუვენტუსის“ დაჯარიმება ამ ტრანსფერების გამოც მოხდა, გამოძიების ინტერესის სფეროში შესაბამისად „მილანი“ და „რომა“ მოექცნენ. არაა გამორიცხული საქმის წარმოება მათ წინააღმდეგაც დაიწყოს. ასევე დასახელდნენ „სასუოლო“, „უდინეზე“ და „ატალანტა“.
საინტერესოა, რომ გუშინვე, „მილანმა“ აღნიშნულ თემაზე უკვე გამოაქვეყნა განცხადება და ბრალდებას უსაფუძვლო უწოდა.
იტალიურ ფეხბურთში ახალი სკანდალები მწიფდება, კრიშტიანუ რონალდოს კარიერაში კი ახალი თავი დაიწყო და ბოლოსა და ბოლოს „ალ-ნასრში“ მისი ოფიციალური დებიუტი შედგა.
საუდის ჩემპიონატში „ალ-ნასრმა“ „ალ-ეტიფაქს“ უმასპინძლა და 1:0 დაამარცხა. ერთადერთი გოლი ანდერსონ ტალისკამ 31-ე წუთზე გაიტანა.
რონალდუმ 90 წუთი ითამაშა და გუნდის კაპიტნადაც დანიშნეს, რადგან მოედანზე თანაგუნდელები მან გაიყვანა. „ალ-ნასრი“ 33 ქულით ლიდერია და მომდევნო ტურში 3 თებერვალს, „ალ-ფატეს“ დაუპირისპირდება.
მატჩის შემდეგ, „ალ-ნასრის“ მთავარმა მწვრთნელმა, რუდი გარსიამ პორტუგალიელის მიმართ საქებარი სიტყვები არ დაიშურა.
„პოზიტიური დამატებაა, როდესაც რონალდუს მსგავსი ფეხბურთელი გყავს. ის მეტოქის მცველებს ყურადღებას უფანტავს, რაც გუნდს ძალიან ეხმარება და ეს გოლის მომენტშიც კარგად გამოჩნდა.
„მე ჩემს გუნდს მივეცი დავალება, რომ მასსა და ანდერსონ ტალისკას შორის მოეხდინათ დივერსიფიკაცია, რათა მომენტები ორივე მათგანს შექმნოდა. რონალდუს გუნდში ყოფნის დროსაც კი არ არის მარტივი საუდის არაბეთის ლიგაში გამარჯვების მოპოვება, რადგან აქ მეტოქეები საკმაოდ ძლიერები არიან“. – განაცხადა რუდი გარსიამ.
რონალდუს სახელგანთქმული თანამემამულე, ფეხბურთის სპეციალისტი ჟოზე მოურინიო შეიძლება აშშ-ის ნაკრების მთავარ მწვრთნელად დაინიშნოს.
აშშ-ის ეროვნული გუნდის თავკაცმა გრეგ ბერჰალტერმა თანამდებობა სკანდალების ფონზე დატოვა და ეს პოსტი დღეს ვაკანტურია.
აშშ-ის ნაკრები მომდევნო მსოფლიო პირველობისათვის მზადებას იწყებს, რომლის ერთ-ერთი თანამასპინძელი, კანადასთან და მექსიკასთან ერთად იქნება.
ერთ-ერთ კანდიდატად ჟოზე მოურინიო განიხილება, რომელსაც ჯერ პორტუგალიის, ხოლო შემდეგ ბრაზილიის ნაკრების მთავარი მწვრთნელის პოსტზეც მოიაზრებდნენ და რომელსაც, ამ სფეროსადმი ინტერესი არაერთხელ დაუფიქსირებია.
ავტორი
