ექსპერტი გარემოს დაცვით საკითხებში, რუსუდან სიმონიძე “გურია ნიუსთან” საუბრისას ამბობს, რომ დიდთოვლობის შედეგად გურიაში დამდგარი შედეგის შერბილება შეიძლებოდა.
რუსუდან სიმონიძის თქმითვე, თოვლის დნობის შემდეგ წყალდიდობების რისკი მატულობს, რისთვისაც ასევე მომზადებაა საჭირო.
“გარემოს ეროვნული სააგენტო წინასწარ აგზავნის ამინდის შესახებ გამაფრთხილებელ ინფორმაციებს. გაფრთხილება რომ ძლიერი თოვა იყო მოსალოდნელი მივიღეთ მეც, თქვენც და ხელისუფლების წარმომადგენლებმაც. მე მრჩება შთაბეჭდილება, რომ ყველა გადაეჩვია თოვლიანობას, ჩემი ჩათვლით. როცა ვრცელდება ინფორმაცია მოსალოდნელი ძლიერი ნალექის შესახებ, შედეგის შესარბილებლად ადგილზე უნდა შეიკრიბოს შტაბი და დაისახოს გეგმა თითოეულ ადამიანამდე მისასვლელად. ძალიან რთულია, მით უმეტეს გურიაში, რომელიც მთაგორიანია თითოეულ სახლამდე მისვლა, მაგრამ მე როგორც ვიცი, გზები სოფლებში ძირითადად გაკეთებულია. დიდთოვლობა ყოფილა, მაგრამ ამისთვის აუცილებელია მზადება. როცა დაიწყო პროცესები ყველა ადამიანი ჩვეულებრივი მოქალაქიდან დაწყებული უმაღლესი ხელისუფალით დამთავრებული უნდა მომზადებულიყო. თოვლის გვირაბში გასვლა და მოსახლემდე მისვლა მარტივი საქმე არ არის, მაგრამ მობილიზაცია იყო საჭირო, გეგმის შედგენა. ახლა ეს დიდთოვლობა ჩაივლის და არ არის გამორიცხული წყალდიდობები. საყოველთაოდ ცნობილია, 1987 წელს, სვანეთის დიდთოვლობის შემდეგ რამხელა წყალდიდობები და მსხვერპლი იყო. აჭარაში, სვანეთში, სადაც დიდთოვლობა ვიცით მეტად მომზადებულები ხვდებიან, ვიდრე გურიაში, სადაც დიდთოვლობა ხშირი არ არის”,_ ამბობს რუსუდან სიმონიძე.
დიდთოვლობის შედეგად, გურიაში, ოფიციალური ინფორმაციით, 40-ზე მეტი საცხოვრებელი სახლი დაზიანდა. თუმცა, სრული მონაცემი რა ზიანი მიადგა რეგიონს ჯერჯერობით ჩვენთვის ცნობილი არ არის. სოფელ გულიანში ჩამოწვა მეწყერი. სახლის გადათოვლის სამუშაოებს 1 კაცის სიცოცხლე ემსხვერპლა. ჯანმრთელობასთან დაკავშირებული მიზეზებით გარდაიცვალა 1 ქალი, სადაც გავრცელებული ცნობით, უცნობია, მოასწრო 112-ში დარეკვა და დიდთოვლობით გამოწვეული გზაზე გადაადგილების შეუძლებლობის ვერ მივიდნენ მასთან სასწრაფო სამედიცინო დახმარების ექიმები თუ ელექტროენერგიასთან დაკავშირებული პრობლემების გამო ვერ შეძლო დაკავშირება.
გარემოს ეროვნულ სააგენტოში “გურია ნიუსს” უთხრეს, რომ მსგავსი ნალექი თოვლის სახით 1989 წელს არის დაფიქსირებული. თუმცა, 2 მეტრამდე თოვლი ციკლონის შემოჭრისას ყოველთვის მოდის აჭარის და მიმდებარე მაღალმთიან ზონაში.
არქტიკული ცივი ჰაერის მასების შემოჭრას კი, რომელმაც ასევე დიდთოვლობა გამოიწვია წელს თურქეთში, ასევე სოჭში, ქვეყანაში 19 თებერვლიდან ელოდებოდნენ.
