,,ქართული ოცნება – დემოკრატიული საქართველოს“ სამდივნოს გადაწყვეტილებით, დმანისის რაიონული ორგანიზაციის თავმჯდომარე გიორგი ტატუაშვილი, რომელიც ამავე დროს იკავებს დმანისის მერის თანამდებობას, პარტიის რიგებიდან იქნა გარიცხული.
გარიცხვის მიზეზად კი, პარტიული დისციპლინის უხეში დარღვევა დასახელდა, რაც მის მიერ ,,ქართული ოცნების“ კონკურენტი“ კანდიდატების საარჩევნო კამპანიის მხარდაჭერაში გამოიხატა.
„ქართული ოცნება – დემოკრატიული საქართველოს“ სამდივნოს გადაწყვეტილებით, დმანისის რაიონული ორგანიზაციის თავმჯდომარე გიორგი ტატუაშვილი, რომელიც ამავე დროს იკავებს დმანისის მერის თანამდებობას, პარტიის რიგებიდან იქნა გარიცხული. გარიცხვის მიზეზი გახდა პარტიული დისციპლინის უხეში დარღვევა, რაც გამოიხატა მის მიერ „ქართული ოცნების“ კონკურენტი კანდიდატის საარჩევნო კამპანიის მხარდაჭერაში“, – ნათქვამია მედიით გავრცელებულ განცხადებაში, მაგრამ ამის შესახებ ინფორმაცია არ დევს, არც ,,ქართული ოცნების“ ოფიციალურ ვებ-გვერდზე და არც ფეისბუქ გვერდზე.
ამ საკითხთან დაკავშირებით ,,გურია ნიუსი“ ქართული ოცნების“ პრესსამსახურს დაუკავშირდა, სადაც განაცხადეს, რომ გავრცელებულ განცხადებას ვერაფერს დაამატებენ.
,,გურია ნიუსი“, ასევე ესაუბრა დმანისის მერს გიორგი ტატუაშვილს, რომელმაც განაცხადა, რომ პარტიიდან გარიცხვის შესახებ მედიით გაიგო.
,,ამასთან დაკავშირებით, ჯობია ჰკითხოთ მას ვინც ეგ განცხადება გააკეთა. მათ მიიღეს ეს გადაწყვეტილება. ჩემთვის არაფერი უთქვამთ, არ ვიცი რას გულისხმობენ, მე მედიით გავიგე ამის შესახებ“, – განაცხადა ტატუაშვილმა.
როგორც გიორგი ტატუაშვილის ფეისბუქგვერდიდან ირკვევა, ის მხარს მაჟორიტარი დეპუტატობის კანდიდატს დმანისში, კახაბერ ოქრიაშვილს უჭერს. დმანისის მერის ფეისბუქ გვერდზე 19 ივნისიდან ოქრიაშვილის არაერთი პოსტი აქვს გაზიარებული.
ცნობისთვის, კახა ოქრიაშვილმა და ბიზნესმენმა ძმებმა – ცეზარ და ლაშა ჩოჩელებმა, რამდენიმე დღის წინ ახალი პოლიტიკური პარტია „პროგრესი და თავისუფლება“ შექმნეს.
კითხვაზე _ აპირებს, თუ არა სხვა, რომელიმე პარტიაში გაწევრიანებას_ გიორგი ტატუაშვილი აცხადებს, რომ ჯერ არაფერი აქვს გადაწყვეტილი და მედიაში გავრცელებულ განცხადებაზე განმარტებებს ელოდება.
,,ჯერ არაფერი მაქვს გადაწყვეტილი და არც ვაპირებ ჯერ რაიმე სახის კომენტარის გაკეთებას. ვფიქრობ, რომ ვინც ეგ განაცხადი გააკეთა, მან უნდა გააკეთოს ყველაფერზე განმარტება. მე არავინ შემხმიანებია, არ ვიცი რატომ გამრიცხეს, თუ განცხადებას აკეთებენ, უნდა გაეკეთებინათ განმარტებაც. ამის შესახებ ოფიციალურ საიტზე ინფორმაცია, არ დევს. იქნებ მედიაში, საიდანაც მე შევიტყვე ოფიციალურად ჩემი პარტიიდან გარიცხვის შესახებ, ვიღაცამ არასწორ ინფორმაციაზე დაყრდნობით დაწერა. ვფიქრობ, რომ გავრცელებულ განცხადებაზე განმარტება თვითონ უნდა გააკეთონ და ეს ინფორმაცია უნდა დააზუსტონ“, – განაცხადა დმანისის მერმა.
