დონეცკის ე.წ სახალხო რესპუბლიკის ლიდერმა დენის პუშილინმა დღეიდან მოსახლეობის მასშტაბური ცენტრალიზებული ევაკუაცია გამოაცხადა რუსეთის ფედერაციის მიმართულებით. ამის შესახებ ინფორმაციას unian – ი ავრცელებს.
მისი თქმით, გაუარესებული საომარი მდგომარეობისა და უკრაინის გეგმების გამო, რომელიც დონბასში “შეჭრას აპირებს,” 18 თებერვლიდან აორგანიზებს მშვიდობიანი მოსახლეობის ევაკუაციას. მოსახლეობას, პირველ რიგში კი ბავშვებსა და ქალებს, რუსეთის ფედერაციის ტერიტორიაზე გადაიყვანენ.
სააგენტოს ცნობით, დენის პუშილინმა განაცხადა, რომ კრემლი ევაკუირებული ადამიანებისთვის საცხოვრებლის უზრუნველყოფაზე დათანხმდა და რომ პრიორიტეტი ქალებს, ბავშვებსა და მოხუცებს უნდა მიენიჭოს.
„პირველ რიგში ქალები, ბავშვები და მოხუცები ექვემდებარებიან ევაკუაციას. ევაკუირებულები უზრუნველყოფილი იქნებიან ყველა საჭირო ნივთით. ყველა პირობაა შექმნილი საგუშაგოებზე სწრაფი გადასვლისთვის. გთხოვთ, მოისმინოთ და მიიღოთ სწორი გადაწყვეტილება. დროებითი გამგზავრება გადაარჩენს თქვენს და თქვენი ახლობლების სიცოცხლეს და ჯანმრთელობას.” – განაცხადა დონეცკის ე.წ სახალხო რესპუბლიკის ლიდერმა.
მან ხაზგასმით აღნიშნა, რომ მან საწარმოებისა და დაწესებულებების ხელმძღვანელებს აცნობა დასაქმებულთა ოჯახების წასვლის ორგანიზების აუცილებლობის შესახებ.
unian წერს, რო ბოევიკების „ტერიტორიული თავდაცვის“ შტაბს დაევალა ევაკუაციისთვის ტრანსპორტის უზრუნველყოფა.
ცნობისთვის, უკრაინაშიც და დასავლეთშიც ამბობენ, რომ კრემლი ახლა პროვოკაციების გზით, ცდილობს უკრაინაში მასშტაბური შეჭრის საბაბი შექმნას. დღეს, ქვეყნის თავდაცვის მინისტრმა განაცხადა, რომ აგრესორი რუსეთი იმ სცენარის გამოყენებას აპირებს, რაც 2008-ში, საქართველოში.
