გუშინ ცნობილი გახდა რომ ქართველი კარის დარაჯი გიორგი მაკარიძე ახალი სეზონიდან ესპანური კლუბი „პონფერადინას“ ღირსებას დაიცავს.
ამ გუნდის მთავარი მწვრთნელი ჟოზე მანუელ გომეში გახლავთ, რომელიც მაკარიძეს კარგად იცნობს. იგი მასთან ერთად, „ალმერიაში“ მუშაობდა და მას სათამაშო დროს სტაბილურად აძლევდა.
2020 წლის ზაფხულში მაკარიძე „ალმერიას“ თავისუფალი აგენტის სტატუსით შეუერთდა. პირველ სეზონში ძირითადი შემადგენლობის მუდმივი წევრი იყო, ფერნანდო მარტინეს რუბიოსთან კონკურენცია მოიგო და „ლა ლიგა 2“-ის 33 მატჩში ითამაშა. სამწუხაროდ გასულ სეზონში „ალმერიას“ პირველ მეკარედ უკვე ფერნანდო მარტინეს რუბიო იქცა.
გიორგი მაკარიძეს ფრანგული „ლე მანისა“ (2009-13) და ესპანური „ალმერიას“ გარდა, მხოლოდ პორტუგალიურ კლუბებში უთამაშია: „ფეირენსე“ (2014-16), „მორეირენსე“ (2016-18), „რიუ ავე“ (2018-19) და „სეტუბალი“ (2019-20).
გუშინ იტალიურმა გამოცემამ „VunereBologna“ გაავრცელა ცნობა რომ ახალი სეზონიდან საქართველოს ეროვნული გუნდისა და კლუბი „ვირტუსის“ თავდამსხმელმა თორნიკე შენგელიამ შეიძლება ესპანურ „ვალენსიაში“ იასპარეზოს. ეს ის გუნდია, რომელშიც თორნიკე შენგელია გაიზარდა და პროფესიონალურ დონეზე მისი დებიუტი შედგა.
გამოცემის ინფორმაციით ქართველი კალათბურთელის შენარჩუნებას ბოლონიური კლუბიც ცდილობს. ამ საკითხთან დაკავშირებით „ვირტუსსა“ და შენგელიას შორის მოლაპარაკებებიც მიმდინარეობდა, თუმცა რამდენჯერმე, დეტალებზე შეუთანხმებლობის გამო ჩაიშალა.
საქართველოს ნაკრების კაპიტანისა და „ვირტუს ბოლონიას“ კალათბურთელის მომავალი კვლავ ბურუსით არის მოცული. 30 წლის კალათბურთელს არაერთ ევროპულ და ამერიკულ კლუბს უკავშირებენ, თუმცა კონკრეტული და დაზუსტებული ინფორმაცია თორნიკეს მომავალი კლუბის შესახებ ჯერ არაა ცნობილი.
ამასობაში ძიუდოს საერთაშორისო ფედერაციაში დიდი სკანდალი მწიფდება. წინა კვირას ცნობილი გახდა რომ ამ ორგანიზაციამ საერთაშორისო შეჯიბრებებზე ასპარეზობის უფლება რუს და ბელარუს მოჭიდავეებს ოფიციალურად მისცა. პირველი ასეთი ტურნირი მიმდინარე თვის ბოლოს მონგოლეთის დედაქალაქ ულან ბატორში გაიმართება.
რასაკვირველია ამ ინფორმაციამ უკრაინაში დიდი გაღიზიანება გამოიწვია.
გუშინ ამ ქვეყნის ძიუდოს ფედერაციის პრეზიდენტმა, მიხაილ კოშლიაკმა IJF-ის პრეზიდენტს, ოფიციალური წერილით მიმართა და აუწყა, რომ უკრაინელი ძიუდოისტები IJF-ის მიერ ორგანიზებულ ტურნირებში მონაწილეობას აღარ მიიღებენ. კოშლიაკის მიხედვით, უკრაინელების ბოიკოტი მანამ არ შეწყდება, სანამ რუს და ბელარუს სპორტსმენებს ტურნირებზე მონაწილეობის მიღებას არ აუკრძალავენ.
„ჩვენს სახელმწიფოსა და რუსეთის ფედერაციას შორის სრულმასშტაბიანი ომი მიმდინარეობს. რუსი სალდათების ხელით, ყოველდღე 200 უკრაინელი ადამიანი იღუპება და რუსებმა ძიუდოს სამი მწვრთნელი მოკლეს, რომლებიც მშვიდობიანი მოქალაქეები იყვნენ, ქვეყანა კი დაახლოებით შვიდმა მილიონმა ადამიანმა დატოვა.
ომის დაწყებისას, უკრაინის ძიუდოს ფედერაციაში 30 000 წევრი ირიცხებოდა. ამ მომენტისთვის, მათ 80 პროცენტს არ აქვს საშუალება, რომ სპორტული საქმიანობა გააგრძელოს, რაც რუსების მიერ განხორციელებული ოკუპაციისა და 500 სპორტული კომპლექსის განადგურების გამო ხდება. ამის პარალელურად, რუსეთისა და ბელარუსის ნაკრებების წარმომადგენლები აგრესორი ქვეყნების ბიუჯეტიდან ფინანსდებიან. სპორტსმენები, მწვრთნელები და ნაკრებების პერსონალი ხელფასებს აგრესორი ქვეყნების სპორტის და თავდაცვის სამინისტროდანაც კი იღებენ, ეს კი მათ ნეიტრალური სპორტსმენის სტატუსის ქონის უფლებას არ აძლევს“.
გუშინ ცნობილი გახდა რომ სენეგალის ნაკრებისა და „ლივერპულის“ მოთამაშე სადიო მანე ახალი სეზონიდან კარიერას მიუნხენის „ბაიერნში“ გააგრძელებს.
იტალიელი ჟურნალისტის ფაბრიციო რომანოს ინფორმაციით, ფეხბურთელმა „ბაიერნთან“ 3-წლიანი კონტრაქტის თაობაზე სრულ შეთანხმებას მიაღწია.
უახლოეს დღეებში გერმანელები მანეს თაობაზე ახალ შეთავაზებას გააკეთებენ და „ბაიერნი“ სენეგალელის სანაცვლოდ 35+5 მილიონ ევროს გადაიხდის.
სადიო მანე დიდი ალბათობით გუნდში რობერტ ლევანდოვსკის ადგილს დაიკავებს. გასულ სეზონში 30 წლის მანემ „ლივერპულის“ მაისურით ყველა ტურნირზე 50 მატჩი ჩაატარა, 23 გოლი გაიტანა და 2 საგოლე გადაცემა გააკეთა.
ავტორი
