არასამთავრობო ორგანიზაცია „ძლიერი ქალი -ძლიერი სახელმწიფო“, ლალი მოროშკინოს ხელმძღვანელობით, ლანჩხუთში მცხოვრებ სოციალურად დაუცველ და შშმ სტატუსის მქონე ბავშვებს საკვები პროდუქტებით, პირადი მოხმარების ჰიგიენური საშუალებებითა და ტანსაცმლით დაეხმარა.
როგორც გაირკვა, აღნიშნულ არასამთავრობო ორგანიზაციის კეთილი ნების ელჩი ლანჩხუთში საკრებულოს წევრი, ფრაქცია „ქართული ოცნების“ თავმჯდომარის მოადგილე, ციცი ჩხაიძეა.
არასამთავრობო ორგანიზაცია, რომელიც 2015 წელს დაფუძნდა, ლალი მოროშკინას თქმით, ხუთი ათასამდე ქალბატონს აერთიანებს და გრანტების გარეშე, საკუთარი ძალებით ცდილობს გარკვეული ინტესივობით დაეხმაროს იმ შეჭირვებულ ოჯახებს, რომელთაც ამის საჭიროება უდგათ.
„ძალიან არ მინდა, რომ რაღაც „კლიშეებში“ მოვაქციო ეს არასამთავრობო ორგანიზაცია, დაველოდო გრანტებს და ა.შ. ამიტომაც ჩვენ შევძელით გაგვეერთიანებინა ხუთი ათასამდე ქალი, რომელთაც ვუთხარით, რომ ყველას ერთნაირად გვიჭირს, გვჭირდება ერთმანეთის გვერდში დგომა და სამ თვეში ერთხელ დავხმარებოდით მათ, ვისაც ესაჭიროებოდა ჩვენი თანადგომა.
იმ პერიოდში, როცა კოვიდი მძვინვარებდა, დავდიოდით კარდაკარ და ვარიგებდით სურსათ-სანოვაგეს, თუმცა არ გვითქვამს, რომ ამას არასამთავრობოს ეგიდით ვაკეთებდით. თუმცა, ახლა ახლადგამოჩეკილი ორგანიზაციები ისეთ საოცრებებს აკეთებენ, გადავწყვიტეთ დავფიქსირებულიყავით ჩვენი ქუდის ქვეშ.
ეს ორგანიზაცია საკმაოდ წარმატებულ ქალებს აერთიანებს და გვაქვს იმის შესაძლებლობა, საკუთარი ჯიბიდან ორ-სამ თვეში ერთხელ ამოვიღოთ თანხა და იმ ბავშვებს, რომლებიც განსაკუთრებით შეჭირვებული ოჯახებიდან არიან, შევუძინოთ საკვები და ტანსაცმელი.
ამ კატეგორიის ბავშვების სია ლანჩხუთის საკრებულოდანაც გამოვითხოვეთ და დღეს ტანსაცმელი, ტკბილეული, საკვები პროდუქტები, დაახლოებით ორი თვის მარაგი, უკიდურესად გაჭირვებულ ოჯახებში მცხოვრებ 26 ბავშვს გადეცემა“,_ აღნიშნა ლალი მოროშკინამ.
„გურია ნიუსთან“ საუბრისას ლალი მოროშკინა ამბობს, რომ მსგავსი ტიპის აქციებში სააფთიაქო ქსელები, სამწუხაროდ, არ არიან ჩართულები და ბავშვებს არ უწევენ დახმარებას. ამიტომ მათ ამ კუთხით აქტიურობისკენ მოუწოდებს.
„მინდა თითის ქნევით ვიყვირო, რომ არავინ გვეხმარება, არც ერთი სააფთიაქო ქსელი არ ეხმარება იმ ბავშვებს, რომელთაც პამპერსები სჭირდებათ. ახლაც გულის თუთქვით ვფიქრობდი, ტანსაცმელი შემეძინა ბავშვებისთვის თუ პამპერსი გვეყიდა. თუმცა, მადლობა ყველა ჩვენს მეგობარს, რომლებიც არ დაფიქრებულან და ისე გადმორიცხეს თანხები. გვესმის, რომ პოსტპანდემიურ პერიოდში ყველას გაუჭირდა და სწორედ ამიტომ ახლაა საჭირო განსაკუთრებულად გვერდში დგომა. ამიტომ მივმართავ სააფთიაქო ქსელის წარმომადგენლებს, რომ ნუ წუწურაქობენ- თქვენი ბავშვების სულის გადარჩენაზე იფიქრეთ და სხვისი სიცოცხლე გადაარჩინეთ“-დასძენს იგი.
არასამთავრობო ორგანიზაცია „ძლიერი ქალი-ძლიერი სახელმწიფო“ გეგმავს ფულად თანხით დაეხმაროს ჩოხატაურის მკვიდრ, შშმ სტატუსის მქონე მარიამ ბოლქვაძეს, რომელიც ახლა მკურნალობას ბათუმის ერთ-ერთ კლინიკაში გადის-„ გვაქვს ინფორმაცია ჩოხატაურში მცხოვრებ ბავშვზე მარიამ ბოლქვაძეზე, რომელიც შშმ პირია და ახლა ბათუმში, საავადმყოფოში იმყოფება. ჩვენი ორგანიზაცია მასაც გაუწევს ფულად დახმარებას.
ეს ის მცირედია, რის გაკეთებასაც ჩვენ ვახერხებთ, თუმცა იმედი მაქვს, რომ ამით სხვებსაც მივცემთ სტიმულს ბევრნი გავხდეთ და მეტი სიკეთე ვაკეთოთ“.
