ძლიერი ქარი გურიაში: „ უფრო ზღვისპირა ზოლის სოფლებშია დიდი ზარალი“

სტიქია ისე შემოეჩვია გურიას, ადგილობრივები  უკვე, როგორც ჩვენთან არაერთი  ამბობს, სულ შიშით მოცულ მოლოდინში არიან. განსაკუთრებით კი ზამთრის პერიოდში.

23 დეკემბერს, ღამის საათებში, ძლიერმა ქარმა განსაკუთრებული დამანგრეველი  ძალით გადაუარა გურია, უფრო ზღვისპირა  სოფლებს.

_მოთხრილი და გადატეხილია მრავალი ნაძვის ხე, სხვადასხვა სახეობები. ევკალიპტიც კი წააქცია. რა ქარი იყო ასეთი,  არ ვიცი. ნატანებში საკმაოდ დიდი ზარალია, _ ამბობს ადგილობრივი მკვიდრი მაია ნაკაიძე.

ძლიერი ქარისგან არაერთი შენობა დაზიანდა და მრავალი ხე მოითხარა  დაბა ურეკის ტერიტორიაზე. წააქცია მრავალი ნაძვის ხე.

_კიდევ კარგი მსხვერპლი არ არის. მუნიციპალიტეტის მერის წარმომადგენელი, დავით რობაქიძე, თავად დარბოდა ელექტროხერხით, ვიდრე ვინმე მოვიდოდა,   მოტეხილი და გადატეხილი ხეები ისე ჩახერხა, რომ სატრანსპორტო თუ ქვეით მოსიარულეებს საფრთხე    ნაკლებად შექმნოდათ. არ ვიცი, ამ კაცმა წუხელ გმირობა ჩაიდინა, ალბათ, – იმავე რამიტ დაგვიკავშირდა  ურეკის მცხოვრები ლალი თავართქილაძე.

ურეკის მცხოვრებლები ასევე გვეუბნებოდნენ, რომ ზღვაზე ჯერ კიდევ იყო შტორმი.

_დაზიანებები ბევრია, თუმცა ღმერთს მადლობა, მსხვერპლი არ არის, –  გვითხრა ლალი თავართქილაძემ.

_ძლიერი ქარი  განსაკუთრებით საზღვაო ზოლში, ურეკში იგრძნობოდა.  რა მდგომარეობაა ახლა გურიის ზღვისპირა კურორტზე? გეტყვით რომ ცოტა უფრო სიწყნარეა. ღამით დაგვანგრია ლამის. ქარმა გადატეხა ან მთლიანად მოთხარა  ასაკოვანი ნაძვები. არაერთი  ხე დაეცა ელექტროხაზებს, ჩახერგა გზები. დაბაში დიალეზზე მყოფი მარტო სამი პირი გვყავს. სასწრაფო დახმარებას პრობლემა რომ არ შექმნოდა, მაშინვე დავიწყე მოქმედება, როგორც კი შემეძლო. უფრო გზების გათავისუფლებაზე ვიზრუნეთ. ჩავხერხეთ წაქცეული ხეები, როგორც შევძელით. გავსხეპეთ ტოტები, _ ამბობს ოზურგეთის მუნიციპალიტეტის მერის წარმომადგენელი დაბა ურეკში,  დათო რობაქიძე.

კითხვაზე მიეწოდება თუ არა დაბას ელექტროენერგია, რობაქიძემ გვითხრა, რომ საკმაო რაოდენობის მოსახლეობას აქვს შუქი გამორთული, ხაზების დაზიანების გამო.

_ამ დროისთვის მოსახლეობის 20%-ს დენი არ მიეწოდება. თუმცა ადგილზე იმყოფებიან  „ენერგო-პრო ჯორჯიას“ ოზურგეთის ფილიალის წარმომადგენლები და დილიდან მუშაობენ. საღამომდე ელექტროენერგიის მიწოდება აღდგება, _ გვითხრა მან 24 დეკემბერს დილით.

როგორც შემდეგ „გურია ნიუსს“  „ენერგო-პრო ჯორჯიას“ ოზურგეთის ოფისში უთხრეს, ყველა დაზიანება გასწორდა და გაკეთდა. თუმცა თქვეს ისიც, რომ თუ ქარი ისევ ამ სიძლიერით გაგრძელდა, დიდია ალბათობა, რომ  იგივე გამეორდება.

_ჩვენ ყველა ღონეს ვიხმართ, რომ ამ ახალ წელს, მოსახლეობას შუქის პრობლემა არ ექნეს, _ გვითხრა მენეჯერმა გია ნაკაიძემ.

ქარის შედეგად, გურიაში, მეტ-კალებად, თუმცა,  ყველა სოფელი დაზარალდა.

ნაგომარში, როგორც ადგილობრივებმა გვითხრეს, დაზიანებულია სახლების სახურავები, მოტეხილი ან მოთხრილია ხეები.

ოზურგეთის მუნიციპალიტეტის მერის წარმომადგენელმა სოფელში, მიხეილ ცქიტიშვილმა დაადასტურა , რომ ქარმა ეკლესიასთან მოთხარა ნაძვი. ასევე მოტეხილია ხე ჭანაურის უბანთან.

_ამ დროისთვის ხუთმა ოჯახმა დარეკა, რომ  ნაწილობრივ გადახდილია მათ სახლების  სახურავები. ისე, რომ მთლიანად გადაეძროს, ასეთი ფაქტი არ  მოხდარა, _გვითხრა მან.

კითხვაზე, არის თუ არა სოფელში შუქი, მან განმარტა, რომ მოსახლეობის მხოლოდ ნაწილს არ მიეწოდებოდა  ელექტროენერგია.

_სადაც დაზიანდა, მუშაობენ „ენერგო პროს“ წარმომადგენლები. უმეტესად კი მიეწოდებათ, _ თქვა ცქიტიშვილმა.

ქარის შედეგად , ყველაზე მეტი ზიანი სოფელ ნატანებს მიადგა.

როგორც ადგილზე გვითხრეს, თავდაპირველად  ათი სახლის სახურავი იყო  დაზიანებული,  ერთს კი მთლიანად ჰქონდა გადახდილი.

-ათი კიარა 15-მდე  სახლის სახურავია დაზიანებული. აქედან ერთის, ცენტერაძის  სახლის სახურავი მთლიანად გადახდილია. საცოდაობაა, _ თქვა „გურია ნიუსთან“ სოფელ ნატანებიდან ოზურგეთის საკრებულოს წევრმა, თამაზ ტუღუშმა.

მისივე თქმით, სოფელში მოთხრილია ბევრი ნაძვის ხე.

_ ერთგან ევკალიპტის მოთხრილი ხე, ქარმა პირდაპირ ერთ-ერთი ოჯახის ეზოში ჩააგდო. კიდევ კარგი ამას მსხვერპლი არ მოჰყოლია, _ გვითხრა მან.

ოზურგეთის მუნიციპალიტეტის სოფელ  კონჭკათში, სადაც სტიქიის კვალი განსაკუთრებით ძლიერად რჩება ყოველ წელს,  ამჯერად რამდენიმე სახლის სახურავი დაზიანდა.

_მთლიანად ჩვენს სოფელში მხოლოდ მოისწრაფიშვილების სახლს გადააძრო სახურავი. თუმცა ეს ოჯახი გასახლების ქვემდებარეა, მეწყერულ ზონაში ცხოვრობენ. ამჯერად ქირით არის ეს ოჯ ახი  გადაყვანილი. მალე კი სახელმწიფოსგან 50 ათას ლარს მიიღებს. ამიტომ მისი სახლის სახურავის აღრიცხვა არ მოხდება, _ თქვა „გურია ნიუსთან“ სოფლის გამგებელმა დათო თოიძემ.

_ ბაილეთი ერთადერთი სოფელია , მგონი, რომ ამ ეტაპზე გადავრჩით. ღმერთს მადლობა! დავდივარ ხალხში, ვეკითხები, რაიმე დაზიანება ხომ არ მომხდარა. ჯერჯერობით, არავის მოუმართავს, _ გვითხრა სოფელ ბაილეთის გამგებელმა გიორგი ქათამიძემ.

ოზურგეთის მუნიციპალიტეტის მერიის , ინფრასტრუქტურის სამსახურის უფროსმა, გოჩა აბაშმაძემ, „გურია ნიუსთან“ ასეთი კომენტარი გააკეთა:

„ამ ეტაპზე დაზარალებული ოჯახების აღწერა ხდება. ზარალი ყველგან იყო. ქალაქ ოზურგეთშიც. თუმცა ზუსტ რიცხვს ვერანაირად ვერ გეტყვით. ჯერ ეს მუშაობა არ დასრულებულა. ბევრგან მივდივართ. ასევე თავად გვირეკავენ დაზარალებული ოჯახების მცხოვრებლები, _ თქვა მან. _ბატონო გოჩა, წინა სტიქიის დროს დაზარალებულთათვის თუ დაიწყო დახმარების სახით განკუთვნილი თანხების ჩარიცხვა?

_ამ ეტაპზე მხოლოდ თებერვალსა და მარტში დაზარალებული ოჯახების დახმარება   გაიცა. სახურავების სახით. რაც შეეხება ამ წლის შემოდგომაზე სტიქიით დაზარალებულებს, ჯერ არ დაწყებულა მათთვის დახმარების  გადაცემა. თუმცა მალე მიიღებენ, _ თქვა აბაშმაძემ.