,,ძმა მომიკლა უგზოობამ” _ წერს სოციალური ქსელში ქალბატონი, რომელიც ლანჩხუთის მუნიციპალიტეტის სოფელ ჭანჭათში ცოტა ხნის წინ მომხდარ ამბავს ეხმიანება.
შეგახსენებთ, რომ ადგილობრივთა მიერ გავრცელებული ინფორმაციით, ახალგაზრდა მამაკაცი, რომელიც ჭანჭათში ერთ-ერთ ოჯახში სტუმრად იმყოფებოდა, გარდაიცვალა.
,,დილიდან შეუძლოდ იყო. სასწრაფოს გამოძახებას რა აზრი აქ, მაინც ვერ მოვა აქამდეო, ამბობდა. საღამოს მაინც გამოიძახეს მეზობლებმა, მაგრამ უკვე გვიანი იყო, ექიმებს გარდაცვლილი დახვდა. მათ ადგილზე მისვლა, უგზოობის გამო, ფეხით მოუწიათ. ექიმების უკან გამოსაყვანად სამაშველოს გამოძახება დარჩა საჭირო. მიცვალებული კი ტრაქტორით გადმოასვენეს”, _ ამბობდნენ ადგილობრივები.
გარდაცვლილის დის, მაგული თავართქილაძის კომენტარი ფეისბუქჯგუფში “აკეთის განვითარებისთვის” იმ პოლემიკას მოჰყვა, სადაც ადგილობრივი მცხოვრები მთვარე მელუა საჯაროდ უხდიდა მადლობას მთავრობას იმ სიკეთეებისთვის, რაც ჭანჭათს აქვს.
“რას გადაეკიდე ამ ჭანჭათს, რა ხდება. თქვენ რამე გაგიკეთებიათ ჩვენი სოფლისთვის? ისეთი რაღაცები კეთდება, რომ ვერ წარმოვიდგენდი ჩემს უბანში. მადლობა და კიდევ მადლობა ჩვენს მთავრობას. მრავალი კარგი გეკეთებინოთ ჩვენს სოფელში”, _ დაწერა მელუამ ჯგუფის ადმინისტრატორის ანა მორჩილაძის მისამართით, რომელიც კომპეტენტური პირებისგან აქტიურად ითხოვს იმ პრობლემების მოგვარებას, რომელიც ჭანჭათში და ზოგადად, აკეთის თემში მცხოვრებლებს აწუხებთ.
,,დიახ, ადამიანი 20 ნოემბერს ცუდად იყო. სასწრაფო სანამ მოვიდა, ფეხით მოუწიათ თემიდან მოსვლა, ამასობაში გარდაიცვალა. ეს ჩემი ძმა იყო. ეს უგზოობამ გამოიწვია. მანამდე 6 თვე 85 წლის ქალბატონი ცხოვრობდა ჩემთან ერთად, ავადმყოფი. 10-ჯერ დაურეკა გამგეობას გზაი არ ვარგა, სასწრაფო რომ დამჭირდეს აქ ვერ ამოდის. ვინ გეიგონა, არავინ. გადათხარენ გზები. რას ეძებენ, რას ეძებენ. მაგენის გაკეთებული არც გზაა და არც წყალი. ძმა მომიკლა უგზოობამ”, _ წერს მაგული (ნანული) თავართქილაძე.
აკეთის თემთან დაკავშირებით სტატიას “გურია ნიუსი” მკითხველს უახლოეს ხანში შესთავაზებს.
