„გამოდით, ჭანჭათლებო, გაგურლებო ,ზემო აკეთლებო, ქვემო აკეთლებო… აზრის დაფიქსირება ასე რთულია? ყოველთვის ის უნდა ვიᲫახოთ, რომ არაფერი გამოვა?“ _ აკეთის ადმინისტრაციული ერთეულის მოსახლეობას ფეისბუქჯგუფის _ „აკეთის განვითარებისთვის“ საშუალებით მიმართავს ჯგუფის ადმინისტრატორი, რომელიც აკეთის თემში წყლისა და გზის სარეაბილიტაციო სამუშაოების შეჩერებას ხმამაღლა აპროტესტებს და შესაბამისი უწყებებისგან ითხოვს ზუსტ თარიღს, თუ როდის განახლდება შესაბამისი სამუშაოები.
მისი ინფორმაციით, არაერთი დაპირების მიუხედავად, სამუშაოები არ განახლებულა და აქაურ მოსახლეობას გაუსაძლის ყოფაში უწევს ცხოვრება. მისივე თქმით, უგზოობის გამო, სოფელში გარდაცვლილი ახალგაზრდა კაცის გამოსვენება ტრაქტორით მოუწიათ.
„უამრავი შემდეგი კვირა გავიდა მეგობრებო… წყლის და გზის პროექტები გაყინულია… არავითარი ხალხზე ზრუნვა არ ეტყობა ჩემს თემს…
ჩვენ, ვისაც გვიყვარს ჩვენი სოფელი არ გვცალია პოლიტიკისთვის… თანამდებობები მუდმივი არაა…მიდიან, იცვლებიან, ნაცვლდებიან და ა.შ….აი, ხალხისთვის არასოდეს არავინ არ არის… ჩვენ გვინდა საქმე…წინსვლა… განვითარება…
ასეთი ერთიანი თემი მე არ მინახავს… რამდენიც გინდათ იმდენი გადარეკეთ, გადმორეკეთ, ააღებინეთ პოსტები ვისაც გინდათ…
სულ რამდენიმე დღე გავიდა, რაც შეგვპირდით, რომ განახლდებოდა სამუშაოები… ერთი კვირა იმუშავა მუშებმა ამდენი ხნის განმავლობაში ამას ეძახით თქვენ საქმეს? სად არის წყალი?!
სად არის გზა?! ამ პოსტზე ვითხოვ პასუხს _ ზუსტ თარიღს როდის განახლდება სამუშაოები…
ეს სცენარი გავლილი გვაქვს უამრავჯერ… ტრაქტორით გაჰყავთ მიცვალებული სამუდამო განსასვენებლამდე…
არ გრცხვენიათ, ხალხო? გამოდით ახლა და გაბედეთ, მითხრათ, რომ ხალხი შემყავს შეცდომაში!!!!!!!
როდის გჭირდებით, როცა გინდათ რომ სკამი არ გაცივდეს? ნუ გადააყოლებთ დროებით კაპიკებს ხალხის სიყვარულს…
ნუ გამომეხმაურებით აქ ისეთები, სიტყვას სიტყვაზე რომ ვერ აბამთ და საკუთარ განცხადებებში მწარედ იჭრებით.
ამ ჯგუფის დარეპორტებას ვინც შეეცდება, მერწმუნეთ აღდგება რამდენჯერაც წაიშლება…
ტყუილად ნუ იწვალებთ…
ან აკეთებთ საქმეს, ან აღიარებთ რომ არ გამოგივიდათ, არ გამოგდით და არ გამოგივათ“.
ჯგუფს ადმინისტრატორის ამ პოსტს არაერთი გამოხმაურება მოჰყვა:
„როგორც ხდება, ზოგადად, საქართველოში ტენდერით გამოყოფილი თანხა შეჭამეს და ახლა ვერ ამთავრებენ, ესა მთელი ფილოსოფია. ხალხი არ ჰკიდიათ?! გზაც მოგვიგდეს ნაწყვეტად. შენ ოჯახაშენებულო, რომელიღაც ტრასასთან მაინც დაგეკავშირებინა ან ზომლეთის,, ან ნაგომრის, რა უბედურებაა გაგურში გაჩერება, მაგრამ ეს სჭირდებათ. არჩევნებია 24-ში და მერე ხომ უნდა დაგვპირდნენ რამეს, რომ მოგვატყვილონ. ესაა ჩვენი რეალური ცხოვრება. ასე თუ გაგრძელდა, ხალხი არ დარჩება სოფელში. ეს უნდათ მათ და მერე გზა-კვალიც არავის დასჭირდება“.
მაიკო სამსონია: „ზამთარშიც აღარაა წყალი! დაშრა, ბატონო, წინაპრების დატოვებული ბასეინები. რამდენ წელიწადს გვემსახურა ერთგულად. წყლის გარეშე როგორ უნდა იარსებოს ადამიანმა. ზაფხულში ვიცი, საერთოდ გაუსაძლისი იქნება“.
კუკური სალუქვაძე: „გზის და წყლის დამთავრება საარჩევნო ბიულეტენების მიმართულებაზეა დამოკიდებული. სოფელი იღებს დაფინანსებას სახელმწიფო ბიუჯეტიდან. ნუთუ, ამ ფულით მდინარე სუფსაზე მდებარე ხიდის ასფალტირება არ შეიძლება? ხიდი ავარიულ მდგომარეობაშია! გთხოვთ, აკეთის თემის მცხოვრებლებს, მოვითხოვოთ გადაუდებელი რემონტი ხიდის თუ არა პრობლემის წინაშე აღმოვჩნდებით“.
„გურია ნიუსი“ გზავნილების ადრესატების კომენტარებს მალე შემოგთავაზებთ.
