,,რუსეთის პრეზიდენტის, ვლადიმერ პუტინის მიერ უკრაინის ოკუპირებული ტერიტორიების, ე.წ. დონეცკისა და ლუგანსკის სახალხო რესპუბლიკების დამოუკიდებლობის აღიარების გამო, საერთაშორისო საფონდო ბირჟებზე რუსული კომპანიების აქციების ფასები მკვეთრად შემცირდა“ – ამის შესახე The Wall Street Journal წერს.
მნიშვნელოვნად გაუფასურდა რუსული რუბლი და აქტივები.
The Wall Street Journal აღნიშნავს, რომ ვლადიმერ პუტინის განცხადებიდან რამდენიმე წუთში მოსკოვის საფონდო ბირჟის (MOEX) ინდექსის ღირებულება თითქმის 11%-ით შემცირდა, რაც 2014 წლის შემდეგ ინდექსის გაუფასურების ყველაზე მკვეთრი მაჩვენებელია.
გამოცემის ინფორმაციით, რუსული კომპანიების აქციების (RTS) ფიუჩერსები, ანუ მომავალი ფასები 20%-ით შემცირდა, რაც იმაზე მიუთითებს, რომ ინვესტორები მომავალში რუსული აქციების კიდევ უფრო მეტად გაუფასურებას მოელიან და, შესაბამისად, ისინი სარისკო აქტივებში დაბანდებული კაპიტალის ამოღებას და რისკის შემცირებას ცდილობენ.
გამოცემა აღნიშნავს, რომ 18%-ით შემცირდა რუსეთის უმსხვილესი ენერგოკომპანიის, Gazprom-ის აქციების ღირებულებაც, რაც 2008 წლის შემდეგ კომპანიის საბაზრო კაპიტალიზაციის შემცირების უდიდესი მაჩვენებელია.
რუსეთის პრეზიდენტის გადაწყვეტილება მყისიერად აისახა სავალუტო ბაზარზეც, ამჟამად ერთი ამერიკული დოლარის გაცვლითი კურსი 79.7 რუბლს შეადგენს, რაც რუსეთის ეროვნული ვალუტის გაუფასურების ერთ-ერთი ყველაზე მაღალი მაჩვენებელია.
მაღალი ალბათობით, რუსეთ-უკრაინას შორის არსებული დაძაბულობის გამწვავება რუსული კომპანიების აქციების და აქტივების ფასების რეკორდულ გაუფასურებას გამოიწვევს, დასავლეთის მიერ სანქციების დაწესების შემთხვევაში კი, რუსეთის ეკონომიკური და საფინანსო მდგომარეობა კიდევ უფრო მეტად გაუარესდება.
ცნობისთვის, 21 თებერვალს რუსეთის ფედერაციის პრეზიდენტმა, ვლადიმერ პუტინმა აღიარა უკრაინის ოკუპირებული ტერიტორიების, ე.წ. დონეცკისა და ლუგანსკის სახალხო რესპუბლიკების დამოუკიდებლობა.
