17 სექტემბერს, დილას მოვარდნილმა ღვარცოფმა ლანჩხუთის მუნიციპალიტეტის ყველა ადმინისტრაციულ ერთეულს სერიოზული პრობლემები შეუქმნა.
ოფიციალური ინფორმაციით, სტიქიის შედეგად ზიანი მუნიციპალიტეტის ყველა სოფელს მიადგა, განსაკუთრებით კი მაღალმთიან ზონას და ზარალის საერთო ოდენობა რამდენიმე მილიონ ლარს ითვლის.
აღნიშნულთან დაკავშირებით, მუნიციპალიტეტის მერიაში ზარალის დამთვლელი კომისიაა შექმნილი, რომლის მიერ შეგროვილი ინფორმაცია ფოტოსურათებთან ერთად უახლოეს დღეებში შესაბამის სამინისტროს გადაეგზავნება შემდგომი რეაგირებისთვის. მანამდე კი, წინასწარი ინფორმაციით, სოფლებში მწყობრიდანაა გამოსული შიდა გზები, დაზიანებულია ათობით ხიდი, მილხიდები, დატბორილია საცხოვრებელი სახლები, საკარმიდამო ნაკვეთები, რამდენიმე ადგილას მეწყერი ჩამოწვა.
17 სექტემბრის სტიქიის გამო, სასწავლო პროცესი ვერ დაიწყო შრომისუბნის საჯარო სკოლაში. საგანმანათლებლო რესურსცენტრის ინფორმაციით, უხვმა ნალექმა სკოლის ეზო და შენობის პირველი სართული დატბორა.
სტიქიის შემოტევა საკმაოდ ძლიერი იყო ქალაქშიც, განსაკუთრებით, მის ცენტრალურ ნაწილში. როგორც გაირკვა, აქ დატბორვის მთავარი მიზეზი გაუმართავი სანიაღვრე არხები იყო _ მოჭარბებული წყლის რაოდენობა არხებმა ვერ გაატარა. მოვარდნილმა ღვარცოფმა ქალაქის ტერიტორიაზე არაერთი ქუჩა, ეზო, საცხოვრებელი სახლი და საკარმიდამო ნაკვეთი დატბორა. ცენტრალურ ავტომაგისტრალზე მოძრაობა, ფაქტობრივად, პარალიზებული იყო. წყლით იყო სავსე პირველი საჯარო სკოლის მიმდებარე ტერიტორიაც, სადაც მოსწავლეების გადაყვანაში მშობლებს კეთილმოწყობის სამსახურის თანამშრომლები ეხმარებოდნენ.
სტიქიისგან დაზარალებული მოსახლეობა “გურია ნიუსთან” საუბრისას მთავარ აქცენტს სანიაღვრე არხების გაუმართაობაზე აკეთებდა:
“ასე იმიტომ ხდება, რომ სანიაღვრე არხები გააკეთეს არასწორად. ეზოებში არ შემოისვლება, ისეთი ამბავია. ქალაქის ცენტრალური ნაწილია, მაგრამ პატრონი არავინაა. ყოველ გაწვიმებაზე ტალახით ივსება ქუჩები. არადა, ათი ათასობით ლარი გახარჯეს ქალაქის ცენტრალური ნაწილის რეაბილიტაციაზე. რა არის რეაბილიტირებული?! მარმარილოს ფილები აყარეს და უბრალო ფილაქნები რომ ჩააფინეს, ის?! სანიაღვრე არხები გაეკეთებინათ წესიერად, ის ჯობდა. ეტყობა, თავად არ დადიან ფეხით და ვერ ხედავენ, ყოველ გაწვიმებაზე რა ხდება ქუჩებში. ნახონ, რა მდგომარეობაა რკინიგზის სადგურის მიმდებარედ _ ტყეა არხებში ამოსული, გამწმენდი არავინაა და როგორ გაატარებს წყალს?! ერთსაათიანმა წვიმამ ამ დღეში ჩაგვაგდო და დიდხანს რომ გაგრძელებულიყო, ჩაგვრეცხავდა, ალბათ ფიჩორში. სამწუხაროდ, ერთ დიდ სოფლადაა გადაქცეული მთელი ლანჩხუთი, ნაპატრონები და გაკეთებული არაფერი ეტყობა აქაურობას. ელემენტარული სანიაღვრე არხების პრობლემა არ მოგვარებულა და რაზეა საუბარი!”
ძლიერი წვიმის შედეგად ლანჩხუთში შექმნილი მდგომარეობის გამო, კრიტიკას ადგილობრივი ხელისუფლების მისამართით არც საკრებულოს ყოფილი წევრი ლევან ჩხაიძე იშურებს:
“არავინ არაა პატრონი. სად არიან საკრებულოს თავმჯდომარე ან დეპუტატები, რატომ არ მოვიდნენ?! ან სადაა სამსახური, რომელიც აქ უნდა იყოს?! ეგენი ხელფასებს იღებენ, ჩვენ კი წაგვიღო წყალმა! ზუგდიდის ამბები ხომ იცით _ დაიბარეს იქაურები სუს-ში. ასე მოუწევთ მაგათაც. აქ ხიდი უნდა გააკეთონ. სამი წელია მოდიან, ნახავენ და მეტი არაფერი. გაწვიმდება და ვართ ასეთ დღეში”, _ამბობს ჩხაიძე.
სანიაღვრე არხების გაუმართაობაზე საუბრობდნენ ყოფილი უნივერმაღის შენობის სარდაფში განთავსებული ობიექტების მეპატრონეებიც.
“ღელე, რომელიც ქალაქის ცენტრში გადის, გადაივსო და ავტომაგისტრალზე გადავიდა. ფეხით კი არა, ავტომობილითაც საკმაოდ ჭირდა გავლა. წყალი ყველგან ისე მოედინებოდა, როგორც ღელეში. არც ერთმა სანიაღვრე არხმა არ გაატარა წყლის ჭარბი რაოდენობა. ვისაც უნივერმაღის ქვედა სართულზე ობიექტები გვაქვს გახსნილი, ყოველ გაწვიმებაზე ასეთ მდგომარეობაში ვვარდებით. ღმერთს მადლობა, წყლის ნაკადი რომ არ შემოიჭრა ერთიანად, თორემ მერე გენახათ ჩვენი გასაჭირი”, _ ამბობდნენ სარდაფში განთავსებული ობიექტების მეპატრონეები, რომელთა ნაწილმა სტიქიისგან დასაცავად ჩასასვლელ კიბეებთან ტომრების ბარიკადები აღმართა.
ის, რომ სანიაღვრე არხები გასაწმენდია, ეს საკრებულოს წევრებმაც აღიარეს სტიქიის მომდევნო დღეს გამართულ ბიუროს სხდომაზე, სადაც კითხვებზე პასუხის გასაცემად ინფრასტრუქტურის სამსახურის უფროსი ლევან ჩხაიძე იმყოფებოდა.
ჩხაიძის მისამართით კითხვა ბიუროს ოპოზიციონერ წევრს კახა ასკურავას ჰქონდა, რომელმაც აქცენტი იმ მილიონებზე გააკეთა, რომელიც გასულ წლებში სტიქიის თანხიდან ლანჩხუთში გაიხარჯა:
“მარტო იმის მაგალითზე რომ ვიმსჯელოთ, რაც ქალაქის ტერიტორიაზე ხდებოდა, სრული კატასტროფა იყო. არადა, ბოლო რამდენიმე წელში არა ერთი მილიონი ლარი დაიხარჯა მუნიციპალიტეტში სტიქიის თანხებიდან და ძალიან საინტერესოა, რას მოხმარდა იგი?! ძნელია, სტიქიას წინ აღუდგე და მისი მასშტაბები წინასწარ გათვალო, მაგრამ, როცა ამხელა თანხები იხარჯება, იმის გარანტია მაინც უნდა გვქონდეს, რომ შემდგომში ზარალი რაც შეიძლება მინიმუმამდე იყოს დასული. არადა, პირიქითაა _ ყოველ ჯერზე მეტად გვაზარალებს სტიქია. გარდა იმისა, რომ უხვი ნალექი მოვიდა, ფაქტია, რომ ქალაქის დატბორვა გაუწმენდავმა სანიაღვრე არხებმა გამოიწვია”, _ აღნიშნა ასკურავამ, რომელსაც ბიუროს სხვა წევრებიც დაეთანხმნენ და ინფრასტრუქტურის სამსახურის უფროსს არხების გაწმენდა ურჩიეს, რომელიც, მათივე თქმით, 2008 წლის შემდეგ არ გაწმენდილა.
ჩხაიძის განმარტებით, მთავარი მიზეზი, რის გამოც არხების გაწმენდა ვერ ხდება, თავად მოსახლეობიდან მოდის.
“ქალაქის ცენტრალური ნაწილის დატბორვა მოხდა ორი სანიაღვრე არხით. მრავალი წელია უკვე, მოსახლეობამ შეავიწროვა ეს არხები და თვითნებურად ჩაიღობა მიწები, ამიტომ ვერ ხერხდება იქ ტექნიკის შეყვანა და მათი გაწმენდა”, _ განმარტა ლევან ჩხაიძემ ასკურავას პასუხად, თუმცა, მისი განმარტება დამაჯერებელი ვერ დარჩა ბიუროს წევრებისთვის.
“რა უფლება აქვს ვინმეს, სახელმწიფო საკუთრება მიითვისოს?! ასობით ადამიანი თუ ზარალდება ერთის გამო, აუცილებლად უნდა გატარდეს შესაბამისი ღონისძიებები. რკინიგზის სადგურთან რა უშლის ხელს არხის გაწმენდას?! 2008 წელს თავიდან ბოლომდე გაიწმინდა ეს არხი, არაფერს შეუშლია ხელი”, _ თქვეს დეპუტატებმა.
