თბილისის საქალაქო სასამართლომ ჟურნალისტ ეკა მიშველაძის საზოგადოებრივი მაუწყებლიდან გათავისუფლება უკანონოდ ცნო. შესაბამისი გადაწყვეტილება სასამართლომ დღეს გამოაცხადა.
ეკა მიშველაძის ინფორმაციით, სასამართლომ საზოგადოებრივ მაუწყებელს მისთვის კომპენსაციის სახით 30 000 ლარის გადახდა დააკისრა.
”სასამართლომ ძალიან მაგარი გადაწყვეტილება მიიღო. ყველაზე მთავარი, რაც იყო ამ სარჩელში, ეხებოდა იმას, რომ უკანონოდ მოხდა ჩემი გათავისუფლება. ეს აღიარა და ეს დაადგინა სასამართლომ. შრომითი ხელშეკრულების დარღვევა მოხდა და გადაწყვეტილება იყო უკანონო, რაც სასამართლომ დაადასტურა. არ მოხდება ჩემი აღდგენა, თუმცა მე მივიღებ კომპენსაციას”, _ აცხადებს მიშველაძემ.
თუმცა, სასამართლოს გადაწყვეტილება უკანონოდ მიაჩნიათ საზოგადოებრივ მაუწყებელში და ისინი ეკა მიშველაძის სარჩელთან დაკავშირებით თბილისის საქალაქო სასამართლოს გადაწყვეტილების სააპელაციო სასამართლოში გასაჩივრებას გეგმავენ.
საზოგადოებრივი მაუწყებლის იურისტის, დიმიტრი ბერძენიშვილის განცხადებით, ტელეკომპანია გადაწყვეტილებას გაასაჩივრებს იმ ნაწილში, რომელიც სასამართლომ ეკა მიშველაძის სასარგებლოდ დააკმაყოფილა.
მისი თქმით, ეკა მიშველაძის სარჩელი მხოლოდ გათავისუფლების ბრძანების ბათილად ცნობისა და კომპენსაციის ნაწილში დაკმაყოფილდა, რის მოტივაციადაც სასამართლომ დაასახელა, რომ დაირღვა „შრომის კოდექსის“ გარკვეული მუხლები, ხოლო ყველანაირი პოლიტიკური მოტივაცია გამორიცხა.
”ნაწილობრივ დაკმაყოფილდა სარჩელი. დაკმაყოფილდა მხოლოდ იმ ნაწილში, რომ ბათილად ცნო გათავისუფლების გადაწყვეტილება და საზოგადოებრივ მაუწყებელს დაეკისრა კომპენსაცია. სხვა ნაწილში – მორალურ ზიანზე, აღდგენაზე, სასამართლომ თქვა უარი. სასამართლომ თავადვე გამორიცხა, რომ არანაირ პოლიტიკურ დისკრიმინაციას ადგილი არ ჰქონია. სასამართლო ამბობს, რომ ერთადერთი, რაზეც დააფუძნა თავისი გადაწყვეტილება არის ის, რომ გათავისუფლების პროცესში არ იყო დაცული „შრომის კოდექსის“ პირობები. ეს მყიფე არგუმენტია. აღსანიშნავია, რომ ყველანაირი დისკრიმინაცია – პოლიტიკური დისკრიმინაცია თუ პოლიტიკური მოტივი გათავისუფლებასთან დაკავშირებით, სასამართლომ გამორიცხა”, _აცხადებს ადვოკატი.
ცნობისთვის, საზოგადოებრივმა მაუწყებელმა ეკა მიშველაძე სამსახურიდან 2016 წლის თებერვალში გაათავისუფლა. ეს გადაწყვეტილება მან სასამართლოში გაასაჩივრა. მიშველაძის ინტერესებს „საქართველოს ახალგაზრდა იურისტთა ასოციაციის“ ადვოკატები იცავდნენ.
