“დაანონსებული სასამართლო დავის დაწყებიდან ჩემი ლიკვიდაციის მუქარამდე“ _ ასე იწყებს სოციალურ ქსელში გაკეთებულ განცხადებას “ერთიანი ნაიციონალური მოძრაობის“ ოზურგეთის ორგანიზაციის თავმჯდომარე და ოზურგეთის მუნიციპალიტეტის საკრებულოს წევრი დავით მჟავანაძე.
დავით მჟავანაძე დღეს პრესკონფერენციას გეგმავს, მანამდე კი სოციალურ ქსელში წერს, რომ მას ფიზიკური ლიკვიდაციით ემუქრებიან.
“არც მეტი, არც ნაკლები ეკა ნინიძის ძმა ფიზიკური ლიკვიდაციით მემუქრება და სატელეფონო საუბარში მიცხადებს, რომ ის ამისთვის საქართველოში სპეციალურად ჩამოვა. მისი გაღიზიანება ერთი თვის წინ ჩემ მიერ გაკეთებულმა კომენტარმა გამოიწვია, თუმცა, აქ საქმე სხვა რამეშია. რატომღაც, ერთი თვის შემდეგ გაახსენდა ეკა ნინიძეს, რომ სასამრთლოში უნდა მიჩივლოს. მას შემდეგ, რაც მისმა მუქარამ შედეგი ვერ გამოიღო, საქმეში იგორ გიორგაძის ახლობელი ძმა ჩართო, რომელსაც რატომღაც ერთი თვე დასჭირდა მუქარის შემცველი ზარის გასახორციელებლად. უკვე დადასტურებით შემიძლია ვთქვა, რომ ეს არის სუს-ის მიერ დაორგანიზებული და ხელშეწეყობილი მოქმედება, რათა წინასაარჩევნოდ მოხდეს ჩემი განეიტრალება. არც ნინიძის საჩივრის და მითუმეტეს, არც მისი ძმის მუქარის შემდეგ არ ვაპირებ გაჩუმებას. ვაპირებ ბრძოლის გაგრძელებას გაორმაგებული ძალებით, ხოლო ძალოვანი უწყების წარმომადგენლებს მოვუწოდებ, დაუყოვნებლივ დაიწყონ ამ ფაქტის გამოძიება. ვაქვეყნებ იმ პირის ნომერს, ვინც, მისი თქმით, ჩემს მოსაკლავად უახლოეს მომავალში საქართველოში ჩამოსვლას გეგმავს. ხოლო აუდიო ჩანაწერს გადავცემ ძალოვანი უწყების წარმომადგენლებს”, _ წერს მჟავანაძე ფეისბუქის საკუთარ გვერდზე.
ოზურგეთის სკოლამდელი აღზრდის ცენტრის ყოფილი დირექტორი, ეკა ნინიძე “გურია ნიუსთან“ საუბრის დროს ამბობს, რომ დავით მჟავანაძის ფანტაზიებს საზღვარი არ აქვს.
“არ ვიცი, საიდან მოიტანა იგორ გიორგაძე და რა კომენტარი უნდა გავაკეთო“, _ თქვა ეკა ნინიძემ.
დაუკავშირდა თუ არა ჯაბა ნინიძე დავით მჟავანაძეს – ამასთან დაკავშირებით ნინიძე ამბობს, რომ მას თავის ძმასთან არ უსაუბრია, რადგან დაკავშირება ვერ მოახერხა.
“ჩემს ძმასთან არ მისაუბრია დიდი ხანია და ნამდვილად არ ვიცი, რა მოხდა. გუშინ ვაპირებდი დარეკვას, მაგრამ ვერ დავუკავშირდი, მეც მაინტერესებდა რა მოხდა. ჩემს ძმას მძიმე სამუშაო გრაფიკი აქვს და როდესაც დავუკავშირდები, შემდეგ აუცილებლად გეტყვით, რა მოხდა. მინდა ვთქვა, რომ ნამდვილად ვაპირებ საკრებულოს მივმართო და ვკითხო, ასეთი ადამიანი რატომ არის ფრაქციის თავმჯდომარე და რატომ ვუხდით ჩვენი ჯიბიდან ხელფასს“, _ ამბობს ეკა ნინიძე.
ეკა ნინიძესა და დავით მჟავანაძის შორის „ფეისბუქომი“ ნინიძის მიერ საკუთარ კედელზე დაწერილ სტატუს მოჰყვა.
„მოშიმშილე ენმ-ს ადგილობრივი ორგანიზაციის ლიდერს ბოდვითი აშლილობა დაეწყო, ლეიბის ქვეშ თაგვივით ხურხნის ფონზე. ისემც მაგას რა ვუთხრა, ნაშიმშილარი ეგ არ იყოს.
ციც, დათული, გაგიგეს და მიგიხვდნენ!!! რამდენი გადაგიხადა ნიკანორმა, თქვი ბარემ? იმას გაუყავი? პროვოკაციების მამას? მედროშეს? _ წერს ნინიძე და მჟავანაძეც იქვე პასუხობს: „მტყუანს შეს…ს შენზე ბანძმა, დღეში სამჯერ, ნუ, შაბათ-კვირის გამოკლებით“.
ინფორმაციისთვის 2018 წლის ივნისში, ოზურგეთის საკრებულოში „ნაციონალური მოძრაობის“ დეპუტატის, ბესო ქათამაძის ცემის ფაქტს, ოზურგეთში აქციები მოჰყვა, შემდეგ კი „ნაციონალმა“ დეპუტატებმა ოზურგეთის საკრებულოში შიმშილობის აქცია გამართეს, საკრებულოს სხდომის მოწვევის და დამნაშავეების დასჯის მოთხოვნით. ამ ფაქტს დიდი გამოხმაურება მოჰყვა სოციალურ ქსელში. მჟავანაძის და ნინიძის დაპირისპირებაც ამ ამბების პარალელურად მოხდა.
