ის, რაც წლების წინ მხოლოდ სურვილი იყო, უკვე რეალობად იქცა _ კურორტი ბახმარო მეორე წელია ზამთარში ექსტრემალური სპორტის მოყვარულებს და პროფესიონალებს მასპინძლობს.
თუკი კურორტს შარშან 50 უცხოელი ტურისტი სტუმრობდა, წელს ეს რიცხვი 300-ს ასცდა.
აღსანიშნავია, რომ წელს, პირველად ბახმაროში ქართული ტურებიც გახორციელდა და დღეს უკვე ყველამ იცის, რომ ევროპის ყველაზე მაღალ კურორტზე დამსვენებელს ზაფხულშიც შეუძლია სტუმრობა და ზამთარშიც:
_ წლების წინ ეს სურვილი იყო, რომელიც მხოლოდ განცხადებებით შემოიფარგლებოდა, თუმცა, მეორე წელია შევძელით დაგვემტკიცებინა ყველასთვის, რომ მონდომებას შედეგი ყოველთვის აქვს. მუშაობა იმაზე, რომ ბახმარო ზამთარში ტურისტებისთვის ხელმისაწვდომი ყოფილიყო, 4 წლის წინ დავიწყეთ. ჩოხატაურის მუნიციპალიტეტის მერმა ირაკლი კუჭავამ და საკრებულოს თავმჯდომარემ ზაალ მამალაძემ ყველაფერი გააკეთეს იმისთვის, რომ სიტყვა საქმედ გვექცია. დიდი წვლილი აქვს ამაში გურიის ყოფილ გუბერნატორს გია სალუქვაძეს. ერთიანობით, თავდაუზოგავი მუშაობით შევძელით და დღეს, ჩვენი საამაყო კურორტის შესახებ ყველგან საუბრობენ. კეთდება სიუჟეტები, როგორც ქართული, ასევე, უცხოური მედიით და ეს განსაკუთრებით მისასალმებელია, _ ამბობს ჩოხატაურის მუნიციპალიტეტის ა(ა)იპ კურორტს “ბახმაროს” დირექტორი დავით საჯაია.
მისივე ინფორმაციით, უკვე არსებობს ბახმაროს განვითარების გენერალური გეგმა, რომელზეც რამდენიმე უწყება მუშაობდა და რომლის შესახებაც განცხადება პრემიერ-მინისტრმა მთავრობის სხდომაზე გასულ წელს გააკეთა.
_ ბახმაროს სარეკრეაციო ზონის სტატუსი 2017 წლის ივლისში მიენიჭა. უკვე დამტკიცებულია ტერიტორიის მიწათსარგებლობის გენერალური გეგმაც. პროექტზე “არტსტუდიო პროექტმა” იმუშავა. შეისწავლეს გეოგრაფიული, ტოპოგრაფიული და კლიმატური პირობები. გაკეთდა ინფრასტრუქტურის და საკუთრების ანალიზი; შეაფასეს მოსალოდნელი საფრთხეები და კურორტის სათხილამურო პოტენციალი.
სპეციალისტების შეფასებით, რაც გენერალურ გეგმაშიც წერია, ბახმაროში, ამ ეტაპზე მკაფიოდ იკვეთება, რომ საფრთხეებისადმი ადაპტირება და შესაძლებლობების მაქსიმალური გამოყენება კავკასიის ერთ-ერთ სამთო “ბრილიანტი” 4-სეზონიან კურორტს მოგვცემს, _ აღნიშნავს საჯაია.
მისივე თქმით, ექსპერტები, რომლებიც კურორტზე თვეების განმავლობაში მუშაობდნენ, შედარებისათვის ბახმაროს შემდეგნაირად წარმოაჩენენ:
“მასშტაბში შემცირებული დაბა ბაკურიანი, გოდერძის მსგავსი უხვი ნალექითა და მეტეო-პირობებით, ბაკურიანზე და გოდერძზე მეტად დახრილი მთის ფერდებით და შეუდარებელი ხედებით, რაც განსაკუთრებულ ხიბლს მისცემს ზამთრის ვიზიტორებს”, _ აი, ასე, სიტყვა-სიტყვით წერია გენერალურ გეგმაში, რაც საჯაროა და მისი ნახვა ნახვა ნებისმიერ ადამიანს შეუძლია, _ აღნიშნავს დავით საჯაია და დასძენს, რომ პროექტზე მომუშავე ექპერტების შეფასებები მკაფიო პოზიციით ასეთია:
“მსოფლიო კლასის უნიკალური ხედები; ჩრდილო ფერდების აბსოლუტური დომინირება; წითელი და შავი კლასის სასრიალო ტრასების დომინირება (რაც ზოგადად იშვიათობაა თრიალეთის ქედზე); ტრასების ურთიერთდაკავშირების გეომორფოლოგიური სირთულეები; მთის თხემებსა და ქედებზე ქარის უარყოფითი გავლენის ნიშნები; კარგი საინჟინრო-გეოლოგიური გარემო; უხვი ზედაპირული წყალი”.
კურორტის დირექტორის თქმით, ბახმარო მალე გახდება 4-სეზონიანი აქტიური კურორტი:
_ ეტაპობრივად იგეგმება ელექტროენერგიის, კანალიზაციის, გაზისა და წყლის შეყვანა. ინფრასტრუქტურული პროექტების ნაწილი წელს გახორციელდება და ზაფხულში ამოსულ დამსვენებელს სიახლეები წელსაც აუცილებლად დახვდება, _ ამბობს დავით საჯაია.
კიდევ ერთი სიახლე ის არის, რომ გენგეგმის ფარგლებში შემუშავდა ხუთი ტიპის საცხოვრებელი და მცირე ზომის (10 საწოლამდე) სასტუმრო/დასასვენებელი სახლების არქიტექტურული პროექტები. 5 მზა პროექტიდან სამი პროექტი (ესკიზი) სასტუმროს ტიპის ნაგებობისთვისაა, ორი კი კერძო საცხოვრებელი სახლის. მისი გამოყენება ნებისმიერ მსურველს შეეძლება. პირს, რომელიც ამ პროექტების მიხედვით დაიწყებს მშენებლობას, პროცესში ექნება საშუალება, თავისი სურვილისამებრ გადააკეთოს შენობა.
დავით საჯაიას ინფორმაციით, ამ ყველაფრის გარდა, გენერალურ გეგმაში ასევე დეტალურად არის გაწერილი ტურისტული გეგმა:
“მიდის მუშაობა იმაზე, რომ ზამთრის სეზონზე ფუნქციონირებისას მოეწყოს შეჯიბრებები (თხილამურები, სნოუბორდი, სირბილი, ველორბოლა, ტრიატლონი); ტურები თოვლმავალი მანქანით; ეტლებში შებმული ცხენები; გასაბერ ციგებზე სრიალი; ყინულზე სრიალი; ღამის ფესტივალები/ღონისძიებები ფოიერვერკებით; “სნოუშუინგი”; სათხილამურო არეალში რელიეფური პარკი; სამარხილო-სასრიალო გორაკი; საგუნდაო მოედანი – საგუნდაო მოედანების სავარაუდო განთავსების ადგილები; სპა, ორთქლის აბანო; ჰელი სქი _ შვეულმფრენის პორტი; გაუკვალავ გზებზე სრიალი გიდის დახმარებით; პარაგლაიდინგი.
რაც შეეხება ზაფხულს _ გენერალური გეგმის თანახმად, ზაფხულის აქტივობები და ტურისტული მომსახურების საშუალებები მოიცავს: დოღის, საცხენოსნო ტურისტული მარშრუტების და ინფრასტრუქტურის, ლელობურთში შეჯიბრის, ტურისტული საინფორმაციო ცენტრის, გადასახედი ადგილების, ტობოგანის და სხვა აქტივობების განვითარებას.
როგორც იცით, დოღი ბახმაროს განუყრელი აქტივობაა, რომელიც 19 აგვისტოს, ფერისცვალების დღესასწაულს ემთხვევა და ასობით ადამიანს უყრის თავს. ხელისუფლება აქტიურად მუშაობს და უახლოეს ხანში გაკეთდება საცხენოსნო ტრასები და სამაყურებლო ნაწილი.
სამომავლოდ, ვფიქრობთ, რომ ბახმაროში ლელობურთიც გაიმართოს, რომელიც, დოღის შემდეგ, ერთ-ერთ მნიშვნელოვან სანახაობრივ მოვლენად იქცევა ზაფხულის სეზონისთვის და ამაზე აქტიური მუშაობა ადგილობრივ ხელისუფლებას უკვე დაწყებული აქვს, _ ამბობს დავით საჯაია.
მისივე თქმით, იმისთვის, რომ გეგმაში ჩაწერილი ყველა პუნქტი შესრულდეს, პრემიერის მიერ შექმნილი ჯგუფი, რომელშიც სხვადასხვა სამინისტროების პირველი პირები შედიან, აქტიურად მუშაობენ:
_ კიდევ ერთხელ მინდა ვთქვა, რომ ეს ყველაფერი მხოლოდ სიტყვები არ არის. ამ წლების განმავლობაში ჩვენ, ერთობლივი მუშაობით შევძელით და რეალური ნაბიჯები გადავდგით. ჩოხატაურის მუნიციპალიტეტის ხელმძღვანელობამ ყველაფერი გააკეთა დაპირებების შესასრულებლად.
წინ ბევრი სამუშაო გვაქვს, თუმცა, ამის არ გვეშინია, რადგან გვერდით გვიდგას გურიის გუბერნატორი მერაბ ჭანუყვაძე, ინფრასტრუქტურის მინისტრი ზურა ალავიძე, ფინანსთა სამინისტრო, ეკონომიკის სამინისტრო, ჩოხატაურის მერი ირაკლი კუჭავა, საკრებულოს თავმჯდომარე ზაალ მამალაძე. ბახმაროს ჰყავს ძალიან ბევრი გულშემატკივარი და ეს ყველაფერი სტიმულია ჩვენთვის, ჩემი ყველა თანამშრომლისთვის, რომლებიც, თამამად შემიძლია ვთქვა, რომ თავს არ ზოგავენ ბახმაროსთვის. კურორტისთვის, რომელსაც უკვე უწოდეს ბრილიანტი, _ აღნიშნავს დავით საჯაია.
