აქცია და ხალხმრავლობა იყო გასულ ოთხშაბათს ლანჩხუთში, სოფელ ტაბანათში, სადაც ჭანტურიების ოჯახისთვის სოლიდარობის ნიშნად დილიდანვე შეიკრიბა მოსახლეობა, ადგილზე იმყოფებოდა მუნიციპალიტეტის ხელმძღვანელობა, მობილიზებული იყო პოლიცია.
ჭანტურიების საკარმიდამო ნაკვეთზე გადის ავტომაგისტრალის _ სამტრედია-გრიგოლეთის მეოთხე ლოტზე ავტობანის მშენებლობა. იმ მოტივით, რომ ჩქაროსნული ორმხრივი მიმართულების ავტობანი ჭანტურიების საცხოვრებელ სახლებთან ძალიან ახლოს გადის და, მათი თქმით, შემდგომში იქ ცხოვრება გაუსაძლისი იქნება ხმაურის, მტვრის, ვიბრაციისა და გამონაბოლქვის გამო, ოჯახი სრულ გასახლებას ითხოვს. საავტომობილო გზების დეპარტამენტმა კი ჭანტურიების კუთვნილი 4 805 კვ.მ მიწის ნაკვეთიდან მხოლოდ 592 კვ.მ ნაკვეთი გამოისყიდა, რაც ავტობანისთვისაა საჭირო.
საბოლოოდ, მხარეებს შორის შეთანხმება ვერ შედგა და პირველი ინსტანციისა და საკასაციო სასამართლოების განჩინების საფუძველზე, რომელიც დაუყოვნებლივ აღსრულებას ითვალისწინებდა, საავტომობილო გზების დეპარტამენტმა ექსპროპრიაციის წესით იხელმძღვანელა და გაწმენდითი სამუშაოების გასახორციელებლად ოთხშაბათს მძიმე ტექნიკის იძულების წესით შეყვანის გადაწყვეტილება მიიღო.
ტაბანათში მდგომარეობამ კულმინაციურ წერტილს სწორედ მაშინ მიაღწია, როცა ავტობანზე მომუშავე ჩინური კომპანიის კუთვნილი ტექნიკა ჭანტურიების მიწის ნაკვეთს მიადგა სამუშაოების გასახორციელებლად, რა დროსაც ადგილზე მობილიზებულმა პოლიციის თანამშრომლებმა ოჯახის წევრები და მათი მხარდამჭერი მეზობლები, ფაქტობრივად, საცხოვრებელი სახლის ეზოში დაატყვევეს. ამ დროს მათ შორის სიტყვიერი დაპირისპირებაც მოხდა, ინციდენტის დროს კი ოჯახის 80 წლის ქალბატონი ცუდად გახდა და სასწრაფო სამედიცინო დახმარების ბრიგადის გამოძახება გახდა საჭირო.
“იმ თანხისთვის, რომელიც საავტომობილო გზების დეპარტამენტმა ჩაგვირიცხა 592 კვმ. მიწის ნაკვეთის საფასურად, ხელიც არ გვიხლია. გვითხრან, როგორ შეიძლება ავტობანიდან 15 მეტრში ცხოვრება. ჯერ კიდევ არ გაკეთებულა ავტომაგისტრალი და მიმდებარე ტერიტორიაზე არსებული სამუშაოების გამო, სახლის კედლები და აივანი დაიბზარა. ჩამორთმეულ მიწის ნაკვეთზე, ჩვენი სახლიდან რამდენიმე მეტრში, გაბურღვითი სამუშაოები რომ დაიწყება, ძნელი წარმოსადეგი არაა, რა დღეში ჩავარდება ჩვენი ოჯახი.
ეს საკარმიდამო ნაკვეთი ჩვენი შემოსავლის ერთადერთი წყაროა, სანერგე მეურნეობა გვაქვს გაშენებული და ახლა გამოდის, რომ ის დაკარგავს თავის დანიშნულებას, მოსავლის მოსაყვანად გამოუსადეგარი დარჩება”, _ ამბობს ოჯახის ერთ-ერთი წევრი მარინა ჭანტურია.
ადგილზე ხმაური და შელაპარაკება მაშინაც მოხდა, როცა ჩინური კომპანიის წარმომადგენლებმა სასიმინდის აღების ნებართვა ითხოვეს. აღმოჩნდა, რომ სასიმინდის მხოლოდ ერთი ბოძი მდებარეობს ექსპროპირებული მიწის მიჯნაზე და სამუშაოების გახორციელებას ხელს უშლის.
“ტერიტორია, სადაც სასიმინდე მიდგას, არ არის იძულების წესით ჩამორთმეული, ამ ტერიტორიის საფასური არ გადაუხდია სახელმწიფოს. ახლა გამოდის, რომ სასიმინდე სამ ფეხზე ზედ ავტობანის საზღვარზე უნდა დარჩეს, ან მისი სხვა ადგილას გადატანა საკუთარი ხარჯებით უნდა მოვახდინო. იქნება ეს აქ და ხელს ვერავინ ახლებს _ ის ჩემს კუთვნილ ტერიტორიაზე და ჩემს საკუთრებას წარმოადგენს!” _ ცხარობდა მარინა ჭანტურია.
სასიმინდე, საბოლოოდ, ადგილზე დარჩა, თუმცა, პირუტყვის სადგომი აღებას ვერ გადაურჩა, რომელიც სწორედ ექსპროპირებულ მიწის ნაკვეთზე აღმოჩნდა.
ჭანტურიების თქმით, მათი შემთხვევა უთანასწორობის კლასიკური ნიმუშია:
“ჩვენ კი არ ვეწინააღმდეგებით ქვეყნის წინსვლას და განვითარებას, უბრალოდ, ვითხოვთ ასახლებას და სრულ კომპენსაციას, რადგან ამ 592 კვ. მეტრის ჩამორთმევით ჩვენი აქ დარჩენა უკიდურესად სახიფათოა. ჩვენს შემთხვევაში კარგად ჩანს, როგორ აბუჩადაა აგდებული უმწეო ადამიანი. თან არ ვითხოვთ რაღაც განსაკუთრებულს _ ანალოგიურ მდგომარეობაში მყოფი ოჯახი ჩვენსავე მეზობლად გაასახლეს და სრული კომპენსაციაც მისცეს.
თავად მოიყვანონ აუდიტი, ნახონ, შეამოწმონ და შეაფასონ. სრულ ნდობას ვუცხადებთ _ რა თანხასაც მათი მოყვანილი აუდიტი იტყვის, ჩვენ იმაზე ნაკლებზეც თანახმა ვიქნებით”, _ ამბობენ ჭანტურიები, რომლებიც სახელმწიფოს ძალადობაში ადანაშაულებენ და დავის სასამართლოში გაგრძელებას გეგმავენ.
