„ელექტრონული“ ასტროლოგია

ვერძი – უთო

გვერდიდან ხშირად ისე ჩანს, თითქოს თქვენს ცხოვრებაში ყველაფერი წესრიგშია, მაგრამ მხოლოდ თქვენ იცით, რა ტემპერატურამდე უნდა ახვიდეთ იმისათვის, რომ შექმნათ ეს “ყველაფერი წესრიგშია”-ს ეფექტი. შესაშურია თქვენი უნარი, ჟინი და მიზანსწრაფულობა, გაასწოროთ თუ გააუთოოთ სასურველ მდგომარეობამდე მოცემული რეალობა – ასეთი დაჭმუჭნილი და უსწორმასწორო. სამაგიეროდ, სულ სხვა იერს იღებს ის თქვენი ჩარევის შემდეგ – მოუწესრიგებელი, ქაოტური ნივთების მთა აკურატულად დალაგებული და საოცრად მოწესრიგებული ხდება. ქვეყანა ბევრად უკეთესი იქნებოდა, ეს უნარი რომ ბევრ ადამიანს ჰქონდეს!

კურო – ჩაიდანი

ეს ჰოროსკოპი რომ ავეჯის ყოფილიყო, თქვენ უყოყმანოდ დივანი იქნებოდით – საიმედო, საფუძვლიანი, ისეთი, როგორსაც ყოველთვის და ყველა სიტუაციაში დაეყრდნობოდი. მაგრამ ამჯერად თქვენ ჩაიდანი ხართ. ცუდი არაფერი იფიქროთ, აქ ეს საამაყოა. თქვენ სამოვარივით ხართ, ყოველთვის სუფრის თავში და დანარჩენი ჭურჭელი თქვენ გარშემო. ჩაი ბევრს სურს და ყველა თქვენთან მოდის დასახმარებლად. ფინჯნები პატარა და ცარიელია, თქვენ კი დიდი ხართ და სულ სავსე. შესაბამისად, ყოველთვის სწორედ თქვენ ავსებთ ყველა ფინჯანში სიცარიელეს. თან ყველას სურს ჩაიჭყიტოს, რა არის სამოვრის სახურავის ქვეშ, თითქოს არ იცოდნენ, რომ წყალი დროზე ადრე ვერ ადუღდება. წყალი კი არავისთვის გენანებათ, მაგრამ თუ დაცარიელდით, გამორიცხული არ არის, რომ გადაიწვათ.

ტყუპი – კომპიუტერი

თანაც მთელი კომპლექტაციით: ჭკვიანი პროცესორით, მკვეთრი მონიტორით და ერგონომიული კლავიატურით. თქვენ იტევთ და გადაამუშავებთ უზარმაზარ და ურთულეს ინფორმაციას, როცა არსებობს ასეთი ამოცანა… მაგრამ ამოცანის მისაცემად მაუსია საჭირო. კომპიუტერი თაგუნას გარეშე – სრულყოფილი სისტემაა, მაგრამ მისი გამოყენება შეუძლებელია. მაუსი – კომპიუტერთან მიდგომის საშუალებაა. თითქოს, ნებისმიერი თაგუნას მორგებაა კომპიუტერისთვის შესაძლებელი, მაგრამ სწრაფი სისტემების საუკუნეში დახვეწილი ოპტიკური მართვა უკეთესად აკლიკებს.

კირჩხიბი – გაზის ქურა

თანაც ძალიან კარგი ქურა. ყველას გამოკვებავთ, ყველასთვის აცხობთ, ყველაზე დარდობთ, მთელი ოჯახი თქვენ ირგვლივ ტრიალებს. თქვენშია მთელი სითბო და სულიერება, მაგრამ ხანდახან ხდება, რომ საკუთარ თავს ეკითხებით: “როდემდე უნდა ვაცხო და ვაცხო, როდისღა ვიცხოვრო?” და აქვე გაქვთ პასუხიც: “იმიტომაც ვაცხობ, რომ ქურა ვარ, ასეთია ჩემი ხვედრი”. სინამდვილეში, ყველაფერი ასე ცუდადაც არ არის; უბრალოდ, კარგი იქნება, თუ ხანდახან დაისვენებთ, ეს აუცილებელია როგორც თქვენთვის, ასევე გარშემომყოფებისთვის.

ლომი – მტვერსასრუტი

მთელი ქვეყნის ხმებს ახშობთ, თქვენს სიახლოვეს არაფერი ისმის და ყველაფერი ქრება. ძლევამოსილი ჰაერით ისრუტავთ მტვერსა და რუტინას, შეგიძლიათ დააშროთ ნებისმიერი ჭაობი, გააფერადოთ ირგვლივ ყველაფერი ნათელი ფერებით. თქვენ მიზანმიმართული ენერგიის საბადო ხართ და შეგიძლიათ უამრავი რამის შეთვისება, ისეთისაც, რაც საერთოდ არ გჭირდებათ. ყველა საქმეს ერთნაირი ენთუზიაზმით ეკიდებით, იქნება ეს ნემსი თუ უზარმაზარი კარადა. მთავარია, ნუ გაბრაზდებით, თუ კარადას ვერ დაძლევთ. უმჯობესია, სანამ ამხელა საქმეს შეეჭიდებით, წინასწარ დაფიქრდეთ, გჭირდებათ კი ეს?

ქალწული – ვიდეოკამერა

ყურადღებით აკვირდებით სამყაროს, ყველაფერს ამჩნევთ და იწერთ, შემდეგ კი გადმოსცემთ გაანალიზებულად და ციფრული სახით. დიახ, ეს გონიერი მოწყობილობაა, თუმცა, ნუ იფიქრებთ, რომ ის მხოლოდ მომხდარის ფოკუსირებას ახდენს. არა! ვიდეოკამერის მგრძნობიარე ოპტიკას შეუძლია გადააკეთოს სინამდვილე როგორც უკეთესობისკენ, ასევე უარესობისკენ. არსებობენ ადამიანები, რომლებიც ვიდეოკამერას არ უყვარს და კატეგორიულად არ აჩენს მათ ლამაზად, მაგრამ არსებობენ ისეთები, რომელთაც ყველა კუთხიდან ალამაზებს. თუ კამერას ვინმე შეუყვარდა, შეუძლია ის წამში ვარსკვლავად აქციოს.

სასწორი – რადიო

სასწორის ისრისთვის მოსაბეზრებელია ბანალური კილოგრამების რაოდენობის ჩვენება, მისთვის ბევრად სახალისოა ფმ-ის სიხშირეებზე ბოდიალი. რამხელა ქვეყანა დევს თქვენს დიაპაზონზე, რამდენ გრძნობას, აზრსა და მელოდიას იტევთ. და რა რთულია მხოლოდ ერთი სიხშირის ამორჩევა. არადა, უნდა აირჩიოთ, რადგან თქვენს ბოდიალს სხვადასხვა დიაპაზონზე საშინელი ხმაური და ზუზუნი მოჰყვება. მეორე მხრივ, შეიძლება 5 წუთი იბოდიალო იმისათვის, რომ შემდეგ კარგ მუსიკას მოუსმინო. თქვენ უყვარხართ, თქვენთან ყოველთვის მხიარულებაა, თქვენ სიახლოვეს მოწყენაც კი სასიამოვნოა.

მორიელი – სამზარეულოს კომბაინი

შეგიძლიათ გაბდღვნათ, დააქუცმაცოთ ყველაფერი, რაც კი ხელში მოგხვდებათ და შეწინააღმდეგებას აქ აზრი არ აქვს, თქვენ ხომ ყველაფერს ერევით, გარდა ქვისა. მსოფლიოს ბატონობა გინდათ და კარგად იცით, რომ დამანგრეველი ძალის გარეშე ჯერ ეს არავის გამოსვლია. ასეა მოწყობილი ეს სამყარო: შექმნის გზა ნგრევის გარეშე წარმოუდგენელია; შექმნა კი – თქვენი ბუნების მეორე მხარეა, გემრიელი კერძები მზადდება თქვენ მიერ დაქუცმაცებული პროდუქტებისგან.

მშვილდოსანი – ტელევიზორი

და არა მხოლოდ იმიტომ, რომ თქვენ ტელევიზორივით შეგიძლიათ გამოასხივოთ სითბო და ანათოთ, არამედ იმიტომაც, რომ გულუხვად უზიარებთ გარშემომყოფებს იმას, რაც შინაგანად გაგაჩნიათ. თუმცა ადამიანები ხშირად ამის გამო გლანძღავენ და უბედურების წყაროდ მიგიჩნევენ. არადა, თქვენ ხომ მხოლოდ იმას გადმოსცემთ, რაც ქვეყანაზე ხდება?

თხის რქა – მაცივარი

სამზარეულოს და მთელი სახლის მთავარი ფიგურა ხართ. მაცივარი ხართ, მაგრამ სულს კი ათბობთ. არავინ იცის, რას ინახავთ მაგ გარეგნული შეუდრეკელობისა და სიმკაცრის მიღმა. არადა, იქ ხშირად ბევრი გემრიელობა მოიძებნება, ხან კი სრული სიცარიელეა. ისე, როგორც არავის, მაცივარს უხდება კარლსონის ფილოსოფიური ფრაზა: “აქ არაფერია და არც არაფერი არასოდეს იქნება, თუ არაფერს შეინახავთ!”

მერწყული – სარეცხის მანქანა

არა იმიტომ, რომ სარეცხის მანქანაც წყალს უკავშირდება, არამედ იმიტომ, რომ სწორედ ამ მანქანასავით მთელი სერიოზულობითა და სკურპულოზობით ეკიდებით ყველა იმ საქმეს, რასაც დაგავალებენ. თქვენს სიძლიერეს კი მხოლოდ სქელი და მკვრივი ქსოვილი თუ გაუძლებს, თხელსა და სიფრიფანას ნაკუწებად აქცევთ. შეეცადეთ, მოზომოთ თქვენი ენერგია, აკონტროლოთ თავი – ხშირად ხდება, რომ ყველაფერი უკვე სუფთაა, თქვენ კი მაინც რეცხავთ და რეცხავთ. ისწავლეთ სწორი პროგრამის შერჩევა, შესაბამისად, გამოიყენეთ მოკლე ციკლი ან დელიკატური რეცხვის რეჟიმი.

თევზები – მობილური ტელეფონი

ისევე, როგორც მობილური ტელეფონი, თქვენც ერთი შეხედვით, მშვიდი ხართ და არავის ეხებით, თქვენთვის ხართ სადმე კუთხეში წყნარად, მაგრამ იქამდე, სანამ რეკვას არ დაგიწყებენ. ჩართული რეჟიმის დროს თქვენ უამრავ ინფორმაციას ატარებთ, მათ შორის, ზედმეტს და უსარგებლოსაც. მაგრამ რადგან ტელეფონი ხართ, არ შეგიძლიათ აირჩიოთ, ვის ეკონტაქტოთ და ვის არა. ხშირად ძალიან სწრაფად იღლებით და გესაჭიროებათ დატენვა. სამაგიეროდ, როგორც მობილური ტელეფონი, თქვენც მუდამ იხვეწებით და თქვენი ცხოვრების ყოველ ახალ ეტაპს ახალი მოდელით ხვდებით.