კატარის მუნდიალის ორივე ნახევარფინალური შეხვედრა წინასწარ მიჩნეული ფავორიტების დამაჯერებელი გამარჯვებით დასრულდა. ხორვატიამ და მაროკომ მოწინააღმდეგეებს ჯეროვანი წინააღმდეგობა ვერ გაუწიეს. საერთო ჯამში, მეოთხედფინალური სტადიის მატჩები გაცილებით მწვავედ და დაძაბულად წარიმართა.
საფრანგეთი – მაროკოს შეხვედრაში აფრიკის წარმომადგენელს ლამისაა მთელი მსოფლიო გულშემატკივრობდა, რასაკვირველია …ფრანგების გარდა.
სწორედ ამ ფაქტორზე ისაუბრა ცნობილმა იტალიელმა მწვრთნელმა კლაუდიო რანიერიმ.
„არგენტინა – საფრანგეთი ყველაზე სასურველი ფინალია? ალბათ, მას შემდეგ, რაც ბრაზილია გავარდა. მაგრამ ნახეთ როგორი ძალისხმევა დასჭირდათ ფრანგებს ფანტასტიკური მაროკოს ნაკრების დასამარცხებლად? რა კარგად თამაშობდა რეგრაგის გუნდი დაცვაში. მათ გოლიც დაიმსახურეს. არაჩვეულებრივი იყო მარჯვენა ფრთა: ჰაქიმი–ზიეში. მთელი მსოფლიო ფრანგების გარდა, მაროკოს გულშემატკივრობდა, რადგან ადამიანებს უყვართ ზღაპრები,“ – განაცხადა კლაუდიო რანიერიმ.
საინტერესო გახლდათ მაროკოს ეროვნული გუნდის მთავარი მწვრთნელის ვალიდ რეგრაგის კომენტარი:
„ჩვენ მაქსიმუმი გავაკეთეთ, რაც ყველაზე მთავარია. მატჩისწინა გახურებაზე აგერდი დავკარგეთ, პირველ ტაიმში საისი და მაზრაუი, რაც ჩვენთვის ბევრია. არაფერი მაქვს სათქმელი. საფრანგეთის ნაკრების მსგავს გუნდთან ოდნავი შეცდომაც ძვირად ფასობს. თამაშში კარგად ვერ შევედით, პირველ ტაიმში ძალიან ბევრი ხარვეზი გვქონდა, მეორე ტაიმი უკეთესი იყო, მაგრამ მეორე გოლმა თამაში მოკლა. თუმცა, ეს წაგება ვერ წაგვართმევს იმ ყველაფერს, რაც აქამდე გავაკეთეთ.
ყველაზე მნიშვნელოვანი ისაა, რომ კარგი იმიჯი ვაჩვენეთ, მსოფლიოს დავანახეთ, რომ მაროკოში ფეხბურთი არსებობს და ძალიან მხურვალე გულშემატკივრები გვყავს. იმისათვის, რომ მაღალ დონეზე ვიყოთ და მსოფლიოს ჩემპიონატი მოვიგოთ, ცოტა მეტი კიდევ უნდა ვიმუშაოთ, მაგრამ ახლაც არც ისე შორს ვართ“.
რასაკვირველია ემოციებს ვერ მალავდა საფრანგეთის ეროვნული გუნდის თავკაცი დიდიე დეშამი.
„ყველამ იცოდა, რამდენად მნიშვნელოვანი იყო ეს მატჩი. თუმცა, წინ ბოლო მატჩიც გველოდება. უკვე ერთი თვეა, რაც ერთად ვართ, რაც ადვილი არასდროსაა, მაგრამ ერთად ყოფნა გვიხარია.
კვირას ტიტულისთვის არგენტინასთან ვიბრძოლებთ. უნდა გამოვიყენოთ ეს მომენტი, დავაფასოთ და ვისიამოვნოთ იმით, რომ ფინალში ვართ, ხოლო ოთხ დღეში თასისთვის ვითამაშებთ და ბოლო მატჩისთვის მოვემზადებით. სიამაყეს ვგრძნობ, ეს მნიშვნელოვანი ნაბიჯი იყო, მაგრამ კიდევ ერთი ნაბიჯი გვაქვს გადასადგმელი,“- განაცხადა დიდიე დეშმმა.
სამწუხაროდ „ტრადიცია“ არ დაირღვა და მატჩის შემდეგ საფრანგეთის რიგ ქალაქებში არეულობები მოხდა. ერთმანეთს ფრანგი და ეთნიკურად მაროკოელი გულშემატკივრები დაუპირისპირდნენ. პოლიციამ ცრემლსადენი გაზი და წყლის ჭავლი გამოიყენა მოჩხუბართა დასაშოშმინებლად.
პოლიციამ დაადასტურა, რომ არეულობისას 14 წლის ბიჭი დაიღუპა. მანქანასთან, რომელშიც ფრანგი ფანები ისხდნენ, უცნობები მივიდნენ და საფრანგეთის დროში ჩამოხევა მოინდომეს, რომელიც ავტომობილის ფანჯრიდან ჩანდა. მძღოლმა უცებ დასძრა მანქანა და წინ მდგომ ბიჭს დაეჯახა. 14 წლის ყმაწვილი საავადმყოფოში გარდაიცვალა.
ფეხბურთის სპეციალისტებისა და თაყვანისმცემლების მოსაზრებით, საფრანგეთი – არგენტინის ფინალური დაპირისპირება უპირველესად მესი – მბაპეს დაპირისპირებად გადაიქცევა.
საფრანგეთის ნაკრების მცველმა ტეო ერნანდესმა უკვე განაცხადა რომ ფინალისთვის კარგად ემზადებიან და ლიონელ მესის არ ეშინიათ.
„ვამაყობ, რომ გამარჯვება შევძელით და ბედნიერი ვარ გოლის გატანის გამოც. ზედიზედ მეორედ ფინალში გასვლა წარმოუდგენელია. ჩემი ძმა ლუკასი ახლა მიუნხენშია და თამაშს ტელევიზორით უყურა, მატჩის მერე დამირეკა და მომილოცა. იმედი მაქვს, რომ კვირას ჩვენთან ერთად იქნება.
ფინალში ვართ და ეს ყველაზე მთავარია. ოთხი დღე გვაქვს იმისთვის, რომ ენერგია აღვიდგინოთ და ფინალისთვის მოვემზადოთ. საფრანგეთს მესის არ ეშინია. მისგან თავი ისე უნდა დავიცვათ, როგორც ზიეშისგან, ჰაკიმისგან ან ნებისმიერი სხვა მოთამაშისგან. ვიცით, რომ არგენტინას საოცარი ფეხბურთელები და ძალიან ძლიერი გუნდი ჰყავს“, – განაცხადა ტეო ერნანდესმა.
ახლო წარსულში ცნობილმა თავდამსხმელმა დიდიე დროგბამ განაცხადა, რომ სამხრეთამერიკელები კილიან მბაპეს ყველა ხერხით შეჩერებას შეეცდებიან:
„არგენტინელებმა კარგად იციან, რომ ფრანგებს არ უყვართ, როცა ფეხებში ურტყამენ. ისინი აგრესიულები არიან და მბაპეს თამაშის საშუალებას არ მისცემენ. ყველანაირი ხერხით შეეცდებიან მის შეჩერებას.
მაგრამ ფრანგებს ასევე ჰყავთ ტჩუამენი, გრიზმანი და დემბელე. მათ როგორ გააჩერებენ?“
საფრანგეთის ნაკრების ყოფილმა ვარსკვლავმა, დავიდ ტრეზეგემ კი ლეგენდარული ტიერი ანრი კილიან მბაპეს შეადარა:
„მათი მსგავსება იმით იწყება, რომ ორივე „მონაკოში” იწყებდა კარიერას. ისიი ჩქაროსნული, სწრაფი მოთამაშეები არიან. მათი ამოცანა გამარჯვებები და ტიტულების მოგებაა. თავის დროზე ანრიმ მსოფლიო უკეთესობისკენ შეცვალა და ისტორიაში შევიდა. იმავეს აკეთებს მბაპეც, თუმცა ჯერ 24 წლისაც არ არის.“
არგენტინის ნაკრების ყოფილი ფეხბურთელი მაურისიო პინედა აცხადებს, რომ მესი იმდენად კარგადაა ფიზიკურად მომზადებული, 50 წლამდე შეძლებს თამაშს.
„მესი – სრულყოფილებაა. ის 50 წლამდე შეძლებს თამაშს. დღეს ცოტა სხვაგვარად მოქმედებს, მაგრამ ბურთის მიღებისას მაინც სხვებზე სწრაფია. დარწმუნებული ვარ, ეს მისი ბოლო მსოფლიო ჩემპიონატი არ არის. ის კვლავაც ითამაშებს და გააგრძელებს დომინირებას.“
ფინალურ შეხვედრაში გამარჯვებაში დარწმუნებულია თავად ლეო მესი.
„რეკორდები კარგია, მაგრამ გუნდური წარმატება უფრო მნიშვნელოვანია. მძიმე ბრძოლების შემდეგ მიზნამდე ერთი ნაბიჯი დაგვრჩა. ყველაფერს გავაკეთებთ, რომ ამჯერად წარმატებით დავამთავროთ ტურნირი.“ – განაცხადა არგენტინის ეროვნული გუნდის კაპიტანმა.
საფრანგეთის პრეზიდენტმა ემანუელ მაკრონმა, გამოცემასთან „L’Equipe“ საფრანგეთი – არგენტინის მსოფლიო ჩემპიონატის ფინალური მატჩის წინ თავისი პროგნოზი გამოთქვა.
„უფრო მკაფიო პროგნოზს უშუალოდ შხვედრის დაწყების წინ გეტყვით. ვფიქრობ, ჩვენ ფავორიტები ვართ, მაგრამ არგენტინელები მატჩიდან მატჩამდე სულ უკეთ თამაშობენ. გუნდი აშკარად პროგრესირებს. ვფიქრობ, მათ ნაკლებად შეკრული შემადგენლობა ჰყავთ. ველოდები ითამაშებს თუ არა რაბიო. მასზე ძალიან ბევრია დამოკიდებული. მიუხედავად იმისა, რომ მაროკოსთან ნახევარფინალშიც მის გარეშეც კარგი გუნდი თამაშობდა. ვფიქრობ, გავიმარჯვებთ. თან მგონია, რომ ფინალურ მატჩში ბევრი გოლი გავა.“
გუშინ, ცნობილი გახდა რომ საფრანგეთის ნაკრებში ე.წ. „აქლემის ვირუსით“ უკვე მესამე ფეხბურთელი დაინფიცირდა. დაიო უპამეკანოსა და ადრიენ რაბიოს შემდეგ ვირუსი კინგსლი კომანისაც აღმოაჩნდა. ინფორმაცია ოფიციალურად დიდიე დეშამმა დაადასტურა.
„კომანს სიცხე ამ დილით ჰქონდა. დოჰაში ტემპერატურა ცოტათი დაეცა და კონდიციონერი ისევ ჩართული გვქონდა. დაფიქსირდა გრიპის მსგავსი რამდენიმე შემთხვევა. დაიო უპამეკანომ ინგლისთან მატჩში თავი ცუდად იგრძნო, ეს ხდება მაშინ, როცა ფეხბურთელები მოედანზე დიდ ძალისხმევას დებენ, ამ დროს ორგანიზმი სუსტდება და უფრო მიდრეკილია სხვადასხვა ვირუსების მიღებისკენ. სიფრთხილის ყველა საჭირო ზომას ვიცავთ და ვცდილობთ, ვირუსი არ გავრცელდეს”,- განაცხადა დიდიე დეშამმა.
გუშინ, ესპანურმა გამოცემამ „AS“ გაავრცელა ცნობა, რომ საფრანგეთის ნაკრებისა და .მადრიდის „რეალის“ თავდამსხმელი, კარიმ ბენზემა, მსოფლიო ჩემპიონატის ფინალური მატჩის წინ, ეროვნულ გუნდს შეუერთდება.
ბენზემამ კატარის მუნდიალი ტრავმის მიზეზით გამოტოვა. ახლა ის თითქმის ჯანმრთელადაა და ესპანური გუნდის უფროსობა წინააღმდეგი არ იქნება, თუ ფეხბურთელი საფრანგეთის ნაკრების ბანაკში დაბრუნდება და ფინალურ მატჩს დაესწრება.
ორი დღის წინ, ფრანგების მთავარმა მწვრთნელმა, დიდიე დეშამმა, არ უპასუხა ჟურნალისტებს ბენზემას ნაკრებში შესაძლო დაბრუნების შესახებ დასმულ კითხვაზე.
ავტორი
