თბილისში, სახელმწიფო უნივერსიტეტის ბაგების სტუდქალაქის ტერიტორიაზე PR აკადემიის უნივერსიტეტის ოთხსართულიანი შენობის სამშენებლო სამუშაოები მიმდინარეობს.
შენობის აშენებას „ფეისბუქში“ პოეტი რობერტ მესხი ეხმაურება.
როგორც ის წერს, მშენებლობამ ბაგების სტუდქალაქის ტერიტორიაზე, შესაძლოა, მრავალწლიანი წიწვიანი ხეების მორიგი გენოციდი გამოიწვიოს.
პოეტი ასევე ბაგებსა და ვერეს ხეობის, მშენებლობების გამო, კატასტროფის წინაშე დგომის შესახებ საუბრობს.
„ყ უ რ ა დ ღ ე ბ ა
თბილისის სახელმწიფო უნივერსიტეტის ბაგების სტუდქალაქის ტერიტორიაზე მოსალოდნელია მრავალწლიანი წიწვიანი ხეების მორიგი გენოციდი. ამ დილით შემოღობილი დაგვხვდა სტუდქალაქის შადრევნის მიმდებარე პარკის ტერიტორია, რომელზეც თბილისის მერია და ქალაქის არქიტექტურის სამსახური PR აკადემიის უნივერსიტეტის ოთხსართულიანი შენობის აგებას აპირებს. ბაგები და ვერეს ხეობა ზოგადად, მშენებლობის ბუმის გამოისობით, ისედაც კატასტროფის წინაშეა. მდინარე ვერემ ეს თვალნათლივ დაგვანახა 2015 წლის 13 ივნისს, მაგრამ ბუნების ეს გაკვეთილი, სამწუხაროდ, გაკვეთილადვე დარჩა. დაუსრულებელ კორპუსომანიას უამრავი ნარგავი ეწირება. დღეს საფრთხის წინაშე სტუდქალაქის მიმდებარე ტერიტორია და შიდა ეზოა, სადაც ჯერ კიდევ გვხვდება ტყე-პარკები და მწვანე საფარი…“ _ წერს ის საკუთარ ფეისბუქგვერდზე.
ემუქრება თუ არა ბაგების სტუდქალაქის მიმდებარე ტერიტორიაზე ხეებს განადგურება _ ამ საკითხზე „გურია ნიუსს“ პიარ აკადემიის დირექტორი, ნათია გორცაძე ესაუბრა.
როგორც ის ამბობს, ტერიტორიაზე, სადაც მშენებლობა მიმდინარეობს, ყველა ხე და ბუჩქი აღრიცხულია და მხოლოდ 3 ხის გადარგვა მოხდება.
„ეკონომიკის სამინისტრომ 1 წლის წინ ეს ტერიტორია აუქციონზე გაიტანა. აუქციონამდე კი ყველა შესაბამისი უწყებიდან მშენებლობის შესახებ ნებართვები მიიღო, რის შემდეგაც აუქციონზე ჩვენ შევიძინეთ. როგორც კი ნაკვეთი შევიძინეთ, პირველივე დღეებში ბოტანიკური ბაღიდან სპეციალური ექსპერტები მოვიყვანეთ და თითოეული ხე შევაფასეთ. ამის შემდეგ პროექტი შევადგინეთ და მერიაში შევიტანეთ. პროექტი შედგენილია ზუსტად იმ ნახაზის მიხედვით, სადაც თავისუფალი ადგილია. მშენებლობის გამო იმ 3 ფოთლოვანი ხის და ბუჩქების გადარგვა მოხდება, რაც შუაში დგას. ჩემი მოტივაციაა, რომ ამ ტერიტორიაზე მწვანე საფარი მთლიანად შენარჩუნდეს. უნივერსიტეტი თავისთავად გულისხმობს ეკოლოგიური გარემოს დაცვას და ამიტომ შიგნითაც გათვალისწინებულია გამწვანება, რომ სტუდენტებმა ჯანსაღ გარემოში ისწავლონ. შესაბამისაd, ეს ტერიტორია თავის ეკონომიკურ სტატუსს შეინარჩუნებს და გააძლიერებს კიდეც. გვინდა, რომ სექტემბერში უკვე უნივერსიტეტი გავხსნათ, რადგან სწავლის მსურველებს, შენობა, რომელიც იჯარით გვაქვს აღებული, ვეღარ აუდის“, _ ამბობს გორცაძე.
ემუქრება თუ არა დატბორვის საფრთხე PR აკადემიის უნივერსიტეტის ოთხსართულიან შენობას, მდებარეობს თუ არა ის მდინარე ვერეს ხეობის დატბორვის არეალში_ამ საკითხის გასარკვევად „გურია ნიუსი“ თბილისის მერიის არქიტექტურის სამსახურს დაუკავშირდა.
„PR აკადემიის უნივერსიტეტის ოთხსართულიან შენობის მშენებლობის ნებართვა გაცემულია. რაც შეეხება დატბორვის საფრთხეს, ვერეს ხეობაში დატბორვის არეალში არ შედის. მდინარე უფრო დაბლა მიედინება“, _ ამბობენ თბილისის მერიის არქიტექტურის სამსახურში.
