ოზურგეთის ბაზარში წინასააღდგომო ვაჭრობა ადრიანად დაიწყო. ხალხი სადღესასწაულოდ ემზადება და განსაკუთრებით კვერცხისა და საღებავი საშუალებების ყიდვას ჩქარობს, რადგან რამდენიმე თვის წინ გავრცელებულმა ქათმის ჭირმა ფრინველის რაოდენობა შეამცირა და აქედან გამომდინარე, კვერცხიც არც ისე დიდი რაოდენობით შემოდის. დღეისთვის, კვერცხის ფასი საშუალოდ, 40-50 თეთრია. პასკის სანელებლების ფასი, გასულ წელთან შედარებით, არ შეცვლილა და ერთი შეკვრა ისევ ერთი ლარი ღირს.
რაც შეეხება კვერცხის ბუნებრივ საღებავს, ენდროს ფესვებს, ისიც შეკვრებად იყიდება და შარშანდელთან შედარებით ფასი მომატებულია. თუ შარშან ერთი საშუალო შეკვრა 50 თეთრი ღირდა, ახლა ერთი ლარი ღირს.
კითხვაზე, თუ რატომ გაძვირდა ბიოსაღებავი, გამყიდველმა ქალბატონმა სრული სერიოზულობით გვითხრა, ფაროსანამ გაანადგურა და წელს ნაკლებად არისო.
_ სერიოზულად ამბობთ თუ ხუმრობთ? _ ვკითხეთ მას.
_ დიახ, რა არის აქ დასამალი? _ გვითხრა მან და მეზობელ დახლზე მეორე გამყიდველს გასძახა, ხომ მითხარი ფაროსანა დაესია, შეჭამა და ამიტომ ჩამოიტანეს თბილისში ცოტა რაოდენობით, ხომ? ჩვენ კი იქედან მოგვაქვს…
ქალბატონს როცა ვურჩიეთ, ნუ დაიჯერებს, რომ ფაროსანა მცენარის ფესვებს ღრღნის, გულუბრყვილოდ გააგრძელა:
“მე რა ვიცი, რაც მითხრეს, ის გავიმეორე, ისე ფაროსანა მაგას მართლა არ ჭამს? კაია მაგას მაინც თუ არ შეჭამს და ფესვებს მაინც თუ დატოვებს მიწაში, მერე მაინც ხომ ამოვა ეს მცენარეები… რა ვიცი, არ დეილია ეს მავნებლები, _ თქვა მან და ირგვლივ მოვაჭრეებს ხალისიანი ხმით გასძახა, ხომ გეიგონეთ, მახრასავით არ ყოფილა აგი მომსპარი ფაროსანა, მიწაში კიდო მიძვრებაო, რომ თქვეს, გამისკდა გული, ვიფიქრე გადაახმობს ტყიან-გორიანად ყველაფერს-თქვა“…
