ეფექტურია თუ არა სოფლის მხარდამჭერი პროგრამა სოფლის პრობლემების გადასაჭრელად

ჩოხატაურის მუნიციპალიტეტში სოფლის მხარდამჭერის პროგრამის ფარგლებში სოფლის კრებები მიმდინარეობს.

მერი მინდია ჟღერია, ადგილობრივი თვითმმართველობის წარმომადგენლებთან ერთად უკვე შეხვდა სოფლების _ დაბლაციხის,  ბუკისციხის, იანეულის, ზომლეთის, ვანის, ბუკნარის, ქვენობნის, ბასილეთის,ზოტის, ბჟოლიეთის, ხევის, ბუქსიეთის, თავპანტის, ნაბეღლავის, ქვაბღის, ჩხაკაურას, საყვავისტყის, გოგოლესუბნის, ამაღლების, შუა ამაღლების და სამების  მოსახლეობას.

როგორც მერიის გვერდზე გავრცელებულ ინფორმაციაში წერია, შეხვედრის ფარგლებში მოქალაქეებმა ისაუბრეს დასახლებაში არსებულ საჭიროებებსა და გამოწვევებზე, წარმოადგინეს კონკრეტული წინადადებები და დააფიქსირეს პრიორიტეტები, რომლებიც პროგრამის დაფინანსებით განხორციელდება.

პროგრამის ფარგლებში, საქართველოს რეგიონებში გასახორციელებელი პროექტების ფონდიდან, ჩოხატაურის მუნიციპალიტეტისთვის 730 000 ლარია გამოყოფილი. თითოეულ სოფელში მოსახლეობა თავად განსაზღვრავს, რომელი პროექტი უნდა დაფინანსდეს.

“სოფლის მხარდაჭერის პროგრამის” ფარგლებში შეხვედრები 25 თებერვლის ჩათვლით გაგრძელდება და მუნიციპალიტეტის ყველა სოფელში გაიმართება.

საპროექტო წინადადებები წარდგენილი უნდა იყოს შემდეგი მიმართულებებით:

• სასმელი წყლის სისტემები (მათ შორის: ჭაბურღილები, წყალსადენები, სათავე და გამწმენდი ნაგებობები, ჭები და ა.შ.);
• სარწყავი სისტემები და სანიაღვრე არხები;
• ნაპირსამაგრი სამუშაოები;
• გზები, ტროტუარები, გზისპირა მოსაცდელები და გზის შემადგენელი სხვა ინფრასტრუქტურა;
• ხიდები, ცხაურები, ხიდ-ბოგირები და გადასასვლელები;
• გარე განათება;
• სკოლების მიმდებარე ტერიტორიის კეთილმოწყობა;
• სკოლამდელი დაწესებულებები და შესაბამისი ინვენტარი;
• ამბულატორიის შენობები;
• სასაფლაოების შემოღობვა და კეთილმოწყობა;
• სპორტული ინფრასტრუქტურა, მოედნები და მათი ინვენტარი;
• სკვერები (მათ შორის, საბავშვო სკვერები), სარეკრეაციო სივრცეები და სველი წერტილები შესაბამისი ინვენტარით;
• წისქვილების რეაბილიტაცია და შესაბამისი ინვენტარი;
• მინი ჰესების რეაბილიტაცია/აღდგენა;
• გეოგრაფიული ობიექტების სახელდებისა და ტურისტული ადგილების მიმანიშნებელი ნიშნების განთავსება;
• საზოგადოებრივი ტრანსპორტი.

იმისათვის, რომ დასახლების საერთო კრება ჩატარდეს და გადაწყვეტილება მიიღოს, მნიშვნელოვანია, მასში მონაწილეობა მიიღოს სოფლის ამომრჩევლების მინიმუმ 20%-მა.

რაც შეეხება პროექტის საორიენტაციო ზღვრულ ღირებულებას, ასეა განსაზღვრული: საყვავისტყე _ 16 000 ლარი, დაბლაციხე _ 12 000 ლარი, ბუკისციხე _ 12 000 ლარი, იანეული 12 000 ლარი, გოგოლესუბანი _ 16 000 ლარი, შუა ამაღლება _ 16 000 ლარი, ამაღლება _ 16 000 ლარი, სამება _ 16 000 ლარი, ზომლეთი _ 12 000 ლარი, ვანი _ 12 000 ლარი, ბუკნარი _ 16 000 ლარი, ქვენობანი _ 16 000 ლარი, ბასილეთი _ 12 000 ლარი, ზოტი _ 16 000 ლარი, ბჟოლიეთი _ 12 000 ლარი, ხევი _ 12 000 ლარი, ბუქსიეთი_ 100_0 ლარი, თავპანტა _ 10000 ლარი, ნაბეღლავი 0 10000 ლარი, ქვაბღა _ 12 000 ლარი, ჩხაკაურა _ 12 000 ლარი, წიფნარი _ 12 000 ლარი, ბურნათი _ 12 000 ლარი, კოხნარი _ 16 000 ლარი, ნაკადული _ 10 000 ლარი, შუა ფარცხმა _ 16 000 ლარი, ზემო ფარცხმა _ 16 000 ლარი, ქვემოხეთი _ 12 000 ლარი, მამულარი _ 10 000 ლარი, კალაგონი _ 10 000 ლარი, ჩომეთი _ 10 000 ლარი, განთიადი _ 10 000 ლარი, გოგოური _ 10 000 ლარი, თხილაგანი _ 10 000 ლარი, ახალშენი _ 10 000 ლარი, ახალშენი _ 12 000 ლარი, ხიდისთავი _ 12 000 ლარი, წიფნაგვარა _ 10 000 ლარი, ჭაჭიეთი _ 10 000 ლარი, მეწიეთი _ 10 000 ლარი, ზენობანი _ 10 000 ლარი, გურისტყე _ 10 000 ლარი, გაღმა დობირო _ 10 000 ლარი, გამოღმა დობირო _ 10 000 ლარი, შუა სურები _ 10 000 ლარი, ჩაკიტაური _ 10 000 ლარი, ჭალა_ ქადაგაური _ 10 000 ლარი, ზემო სურები _ 10 000 ლარი, შველაურ-ციციბაური _ 10 000 ლარი, წითელგორა _ 10 000 ლარი, თავსურები _ 10 000 ლარი, ტობახჩა _ 10 000 ლარი, გუთური _ გუთური _ 16 000 ლარი, ქვემო ერკეთი _ 12 000 ლარი, ზემო ერკეთი _ 12 000 ლარი, შუბანი _  10 000 ლარი, ქვემო ონჭიქედი _ 10 000 ლარი, ზემო ონჭიქედი _ 10 000 ლარი, გორაბერეჟოული _ 16 000 ლარი, ვაზიანი _ 12 000 ლარი, ჯვარცხმა _ 16 000 ლარი, ინტაბუეთი _ 10 000 ლარი.

რა პროექტებს ანიჭებს მოსახლეობა წელს პრიორიტეტს _ ამის გარკვევა სხვადასხვა ადმინისტრაციულ ერთეულებში მერის წარმომადგენლებთან ვცადეთ.

ბუკისციხეში მერის წარმომადგენელმა თემურ შარაშიძემ  პასუხის მისაღებად  მერიის პრესსამსახურთან გადაგვამისამართა; მსგავსი პასუხი გაგვცა მერის წარმომადგენელმა ზოტში, ომარ ირემაძემაც.

რაც შეეხება ზომლეთში მერის წარმომადგენელს, ამირან ხაჯიბეგოვს, მის  კოლეგებს არც ის ჩამორჩა:

“მერიის პრესსამსახურს მიმართეთ, ყველაფერს დეტალურად აგიხსნიან. მე თავს შევიკავებ“, _ გვპასუხობს ხაჯიბეგოვი.

როგორც ქვენობანში მერის წარმომადგენელმა პაატა ჩხაიძემ გვითხრა, სოფელში წელს გარე განათების ქსელის გაფართოება და შიდა გზების რეაბილიტაცია იგეგმება.

როგორ მოხდა პრიორიტეტების შერჩევა? ხალხმა თავად მოითხოვა თუ მერიამ შესთავაზა მზა ვარიანტები? შარშანდელი დაპირებებიდან რა შესრულდა? ხომ არ არის დარჩენილი რომელიმე სოფელში პროექტი, რომელიც ახლაც მიმდინარეობს,_ ამ კითხვით მერიის პრესსამსახურს 17 თებერვალს, სტატიის მზადების დროს  მივმართეთ.

პრესსამსახურში აღნიშნეს, რომ შეხვედრები 25 თებერვლის ჩათვლით გრძელდება, რის შემდეგაც შეხვედრის ოქმები მერიის გვერდზე გამოქვეყნდება, თუმცა, ჩვენ კითხვებს რაც შეეხება, მერიის პრესსამსახურში ამბობენ, რომ ინფორმაციის დაზუსტებას გარკვეული დრო სჭირდება.

“როგორც კი დაზუსტებული ინფორმაცია გვექნება, მოგაწვდით“, _ გვპასუხობენ მერიის პრესსამსახურში.

ინფორმაციისთვის, მერიის პრესსამსახურიდან ჯერჯერობით პასუხი არც გასულ კვირას გამოქვეყნებული სტატიის დროს გაჩენილ კითხვებზე არ გვაქვს.

ეხმარება თუ არა რეალურად სოფლის მხარდამჭერი პროგრამა სოფლის პრობლემების  ეფექტურად აღმოფხვრას, _ ამ კითხვით ჩოხატაურში ოპოზიციის წარმომადგენლებს მივმართეთ.

“სოფლის მხარდაჭერის პროგრამით” სოფლებზე დაახლოებით (10 000 ლარიდან _ 15 000 ლარამდე) გამოყოფა უფრო ფორმალური აქტივობაა, ვიდრე რეალური განვითარების მექანიზმი.

ეს თანხა, ფაქტობრივად, სიმბოლურია იმ პრობლემების ფონზე, რაც დღეს სოფლებს აწუხებთ: მოუწესრიგებელი გზები, სასმელი წყლის სისტემა, გარე განათება, სანიაღვრე არხები, ინფრასტრუქტურული ავარიული მდგომარეობა.

ერთი სოფლისთვის 10 000  ლარი ხშირად მხოლოდ გზის ერთი მცირე მონაკვეთის შეკეთებას ან დროებით “შელამაზებას” ჰყოფნის და არა პრობლემის სისტემურ მოგვარებას.

“სოფლის კრებები” ხშირად წარმოჩინდება როგორც დემოკრატიული ჩართულობის მაგალითი, თუმცა, რეალურად მოსახლეობას არჩევანი უწევს მცირე თანხის ფარგლებში, უკვე წლების განმავლობაში მოუგვარებელ საკითხებს შორის _ ანუ არჩევანი კეთდება არა განვითარებაზე, არამედ იმაზე, რომელი პრობლემის “ნაწილობრივ შეკეთებას” ეყოფა ეს თანხა.

ამ მასშტაბის დაფინანსება ვერ ცვლის სოფლად არსებულ მძიმე სოციალურ და ეკონომიკურ სურათს. ეს უფრო პოლიტიკური ჟესტია, ვიდრე გრძელვადიანი სტრატეგია. თუ სახელმწიფოს მიზანი სოფლის გაძლიერებაა, საჭიროა არა ფრაგმენტული “10 000-ლარიანი” პროექტები, არამედ სისტემური, მრავალწლიანი ინვესტიციები, რომელიც რეალურად შეცვლის სოფლის ცხოვრების ხარისხს.

სხვაგვარად, “სოფლის მხარდაჭერის პროგრამა” რჩება როგორც ბიუჯეტური ხაზის შესრულება და არა რეალური პრობლემების გადაწყვეტა“, _ გვპასუხობს პარტია “ახალის” ჩოხატაურის ორგანიზაციის ხელმძღვანელი, ბაჩო ახალაძე.

მსგავსი მოსაზრება გააჩნია პარტია “გახარია საქართველოსთვის” ჩოხატაურელ ლიდერს, რომან კალანდაძეს:

“ყველაფერი გაძვირებულია, სამშენებლო მასალიდან დაწყებული. 5 წლის უკან იგივე თანხით უფრო ბევრი რაღაცის გაკეთება შეიძლებოდა, ვიდრე ახლა. მიზერული თანხაა  და საბოლოოდ არ გამოდის არაფერი.  უნდა დაამატოს მუნიციპალიტეტმა თანხა და უფრო მეტი საქმე გაკეთდება“, _ გვეუბნება რომან კალანდაძე.

საკრებულოს წევრს “ლელოდან” მამუკა ცინცაძეს ამ საკითხზე ასეთი მოსაზრება გააჩნია:

“ფულის საშოვნელი პროგრამა უფროა, ვიდრე სოფლის განვითარების.  წინა წლებში მერიის წარმომადგენელი დააყენებდა აქტივს, და რაც მერიას უნდოდა, იმას აკეთებინებდნენ სოფელს. როგორ შეიძლება ყველა სოფელს ერთდროულად უნდოდეს გზა და განათება? ძირითადად,  მერია წყვეტს, რა უნდა გააკეთოს ამ პროგრამით. წელს  ერთი კვირაა სახლიდან არ გავსულვარ და  არ ვიცი,  რა ხდება“.

“გურია ნიუსი” თემაზე მუშაობას აგრძელებს და ინფორმაციას სოფლის კრებების შესახებ მოგაწვდით, თუმცა, ადგილობრივი ხელისუფლების წარმომადგენლების მსგავსი დამოკიდებულება საჯარო ინფორმაციის მოწოდების მიმართ საქმეს ნამდვილად არ წაადგება _ ჩვენ ყოველთვის ვცდილობთ, ყველა მხარის მოსაზრება გავაცნოთ მკითხველს, რომელსაც აინტერესებს, რას აკეთებენ ჩოხატაურის კეთილდღეობისთვის მის მიერ არჩეული ჩინოვნიკები.

ინფორმაციისთვის აღნიშნული წერილი გაზეთში უკვე გამოქვეყნებული იყო, როდესაც მერიის პრესსამსახურმა ჩვენს კითხვებზე პასუხი 18 თებერვალს მოგვაწოდა.

მერიიდან მიღებულ ინფორმაციას უცვლელად გთავაზობთ:

_ რომელ სოფელში რა შეირჩა გასაკეთებლად სოფლის კრების შედეგად ?

_  „სოფლის მხარდაჭერის პროგრამის“ ფარგლებში დაგეგმილი კრებები დასრულდება მიმდინარე წლის 25 თებერვალს. შერჩეული პროექტების შესახებ საბოლოო გადაწყვეტილებები შეჯერდება კრებების დასრულების და საპროექტო დოკუმენტაციის შედგენის შემდეგ.

_ მოსახლეობამ თავად აირჩია პრიორიტეტები თუ მერიამ შესთავაზა მზა ვარიანტები?

_ მოსახლეობა თავად ირჩევს პრიორიტეტულ პროექტებს.

_ შარშანდელი პრიორიტეტებიდან რა შესრულდა ? (ხომ არ არის სადმე პროექტი, რომლის დასრულებაც ვერ მოხერხდა და კვლავ მიმდინარეობს ?)

_ 2025 წლის სოფლის მხარდაჭერის პროგრამის ფარგლებში შერჩეული ყველა პროექტი შესრულებულია. დაუსრულებელი/მიმდინარე პროექტები არ გვაქვს.