,,რუსეთის მხრიდან უკრაინაზე თავდასხმა უგუნური ნაბიჯი იქნება და ამ შემთხვევაში, თურქეთი იმოქმედებს ისე, როგორც ნატოს წევრმა უნდა იმოქმედოს“,_ ამის შესახებ თურქეთის პრეზიდენტმა, რეჯეფ თაიფ ერდოღანმა განაცხადა.
როგორც reuters წერს, თურქეთის პრეზიდენტმა განაცხადა, რომ საჭიროა ყოვლისმომცველი დიალოგი, რომელიც უსაფრთხოების სფეროში რუსეთის ზოგიერთი შეშფოთების გადაწყვეტას ითვალისწინებს და ასევე განუმარტავს მოსკოვს, რომ მისი ზოგიერთი მოთხოვნის შესრულება შესაძლებელი არ არის.
„იმედი მაქვს, რომ რუსეთი უკრაინას არ დაესხმება თავს და ოკუპაციას არ განახორციელებს. ასეთი ნაბიჯი რუსეთისა და რეგიონისთვის გონივრული ქმედება არ იქნება. საჭიროა დიალოგი, რათა მოვუსმინოთ რუსეთს და აღმოვფხვრათ უსაფრთხოების სფეროში მათი გონივრული შეშფოთებები“, _ განაცხადა რეჯეფ თაიფ ერდოღანმა.
თურქეთის პრეზიდენტის განცხადებით, ყირიმში რუსეთის ქმედებებთან დაკავშირებით, რომელიც უკრაინის ტერიტორიულ მთლიანობას აზიანებს, ანკარას მკაფიო პოზიცია აქვს და ამ პოზიციის შეცვლა შეუძლებელია.
ასევე ერდოღანმა აღნიშნა, რომ მზადაა სიტუაციის დეესკალაციის მიზნით უკრაინისა და რუსეთის ლიდერებს უმასპინძლოს.
„თურქეთი თავიდანვე მხარს უჭერს უკრაინის ტერიტორიულ მთლიანობასა და სუვერენიტეტს. ჩვენ გამოვავლინეთ მკაფიო პოზიცია რუსეთის ქმედებების მიმართ, განსაკუთრებით ყირიმში, რომელიც საზიანოა უკრაინის ტერიტორიული მთლიანობისთვის. ჩვენი პოზიციის შეცვლა შეუძლებელია.
თურქეთს სურს, რომ დაძაბულობა რუსეთსა და უკრაინას შორის მოგვარდეს მანამ, სანამ ის ახალ კრიზისად გადაიქცევა“, – აღნიშნა რეჯეფ თაიფ ერდოღანმა.
