გავრცელებული ინფორმაციით, დღეს, დღის მეორე ნახევარში, სამტრედიის მუნიციპალიტეტში ერევნიდან შემოსულ ტრაილერის მძღოლს კორონავირუსი დაუდასტურდა.
იმის დასადგენად, რამდენად შეესაბამებოდა სიმართლეს გავრცელებული ინფორმაცია, ,,გურია ნიუსი” სამტრედიის სამედიცინო ცენტრის ბაზაზე არსებულ ცხელების ზონას დაუკავშირდა და ცხელების ზონის ექიმს, მანანა შენგელიას ესაუბრა.
,,სამტრედიის ცხელების ზონაში ამჟამად ორი პაციენტი გვყავს, ერთი წლის ბავშვი და თერთმეტი წლის მოზარდი, რომლებიც სავარაუდო შემთხვევადაც არ მოიაზრებიან, რადგან არ გააჩნიათ ეპიდისტორია. რაც შეეხება ერევნიდან დაბრუნებულ ტრაილერის ინფიცირებულ მძღოლს, ჩვენს მუნიციპალიტეტში მსგავს ფაქტს ადგილი არ აქვს”, _ განაცხადა ,,გურია ნიუსთან” საუბრისას ექიმმა ინფექციონისტმა.
შეგახსენებთ, რომ სამტრედიაში ,,ჯეო ჰოსპიტალსის” სამედიცინო ცენტრის ბაზაზე პირველი აპრილიდან ცხელების ზონა ამოქმედდა, სადაც დღემდე 407 პაციენტი ჰყავთ გატარებული. აქედან მხოლოდ ორი იყო ინფიცირებული _ ვანის მუნიციპალიტეტის მკვიდრის ცნობილი შემთხვევა. მას შემდეგ სამტრედიის ცხელების ზონაში კოვიდ 19-ის დადასტურებული შემთხვევა არ დაფიქსირებულა.
