დღეს, დილიდან, ოზურგეთში ერთი კილოგრამი თხილი 2,50 ლარი ღირს.
ჯერჯერობით, ერთნაირად იბარებენ ყველა სახეობის თხილს.
_ასე გამოზოგილად რომ უმატებენ დღიურად ხუთ და ათ თეთრს, დაასახელეთ რაიმე პროდუქტი, პროდუქცია, ასე გამოზოგილად რომ ეძიძგილავებოდნენ ხალხს ყოველდღიურად გროშების გამოძალვაში. წელს ხარისხით ნაკლებია თხილი, სულ წვიმები იყო, თუმცა, როცა ხარისხი აქვს, ვინ უმატებს ფასს? ეს ფასი მუშას არ ჰყოფნის. შეწამვლაში რომ ერთ კილოგრამზე სამი ლარის წამალი დაიხარჯება და ფასი 2 ლარია, არ გაუტყდება ადამიანს გული? რატომ შექმნეს რაღაც „მეთხილეთა ასაოციაცია“, სადაც ათასლარიანი ხელფასებით დანიშნეს ტიპები და ვითომ საქმეს აკეთებენ? ან დახმარება რომ იყო ვაუჩერებით, რაა შედეგი, მიიღო ყველამ? ან როგორ მიიღეს? -გვითხრეს თხილს ჩამბარებელმა ქალბატონებმა ოზურგეთში, ნინო ნაკაიძემ და მზია ქერქაძემ.
თხილის შეგროვებასა და კრეფაზე ასევე ჭირს მუშახელის მოძიება და საყოველთაო დავამ სოცქსელში გადაინაცვლა. დღიურად მკრეფავები, სულ ცოტა, 50 ლარს ითხოვენ, რაზეც პლანტაციების მეპატრონეები ბუზღუნებენ. დავა სოცქსელშიც გადაიზარდა:
„ერთი საათი „პერერივი“ “ გინდათ, მთქნარებით კრეფთ, 50 და70 ლარს რომ ითხოვთ დღიურად, მოკრეფთ ას კილოს დღეში?“
„მიბრძანდით და კრიფეთ თქვენი დამპალი თხილი, გაუცელავ ეზოებში, უყურე ამათ“…– განცხადებების გვერდზე ერთმანეთს „ხოტბას“ ასე ასხამენ პლანტაციების მეპატრონეები და მკრეფავთა ჯგუფები.
„გურია ნიუსი“ ვრცლად თხილთან დაკავშირებულ პრობლემებზე სტატიას მალე შემოგთავაზებთ.
ავტორი
