ოზურგეთელმა პედაგოგმა ეკა ნინიძემ თავის მამასთან და ძმიშვილთან ერთად კორონავირუსი დაამარცხა.
ეკა ნინიძემ “გურია ნიუსისთვის“ დაწერა თუ როგორ დაამარცხა მან კორონავირუსი.
ეკა ნინიძე: ერთხელ, 2020 წლის მარტში, კორონობა რომ ფესვს იდგამდა მსოფლიოში, მოსწავლეებს ვთხოვე, დაესვათ რამდენიმე კითხვა კორონავირუსისთვის და გაეცათ პასუხი შეძლებისდაგვარად.
სანდრო (V კლასელი) – ძვირფასო კორონა-მეთქი ვერ გეტყვი, მაგრამ მაინც მოგესალმები კორონა! იცი, რა მაინტერესებს? ღამურების ორგანიზმში რომ ბედნიერად ცხოვრობ, ადამიანებმა რა დაგიშავეთ? რატომ გინდა რომ ადამიანები გააქრო დედამიწიდან?
კორონას პასუხი სანდროს – იმიტომ, რომ ადამიანებმა დედამიწა დააავადეს, დააბინძურეს, ხელი შეუწყვეს გლობალურ დათბობას და მე დედამიწას უნდა დავეხმარო, რომ გადარჩეს!
ეს იყო მარტში, პირველი ლოქდაუნისას, პირველი ონლაინ გაკვეთილისას. გადიოდა თვეები და სულ მეფიქრებოდა გაბრაზებული COVID 19, არ ვიცოდი როგორ შემეყრებოდა იგი მე და როგორ გავუმკლავდებოდი მე მას.
ვიცავდი რეკომენდაციებს, არ დავდიოდი მრავალრიცხოვან შეკრებებზე. უარი ვთქვი ახლობლის ქორწილში წასვლაზე და ერთ დღეს მაინც მოვიდა.
პირველად ოჯახის პატარა წევრს დაუდასტურდა. ეს არის მომენტი, როცა სიტყვა დადებითი თავზარდამცემია და გინდა იყო უარყოფითი, მაგრამ ნერვიულობის დრო არ არის. იწყებ კომპეტენტურებისგან რჩევის მიღების მცდელობას. პასუხი ერთმნიშვნელოვანია, დაელოდეთ სიმპტომებს. პატარას, რომელიც 12 წლისაა, სიცხე 37-დან 37,8-მდე უთამაშებს. სხვა არანაირი გამოხატულება, როგორც ბაბუა ამბობს: ამას კორონიანის რა ეტყობა, ხეზე გავა რომ გაუშვაო. თუმცა დიდი კაცივით აფასებს მდგომარეობას და პირბადეს არ იხსნის,რომელსაც იცვლის ყოველ ორ საათში და სვამს ძალიან დიდი რაოდენობით წყალს. უფრო მეტი ხალისისთვის ვაწყობთ წყლის სმაში შეჯიბრს.
…პირველი ნიშანი კეფის ბოლოში, ხერხემლის ზედა ნაწილში აუტანელი ტკივილი იყო, რომელიც ორივე მხრის გასწვრივ გადადიოდა. გახსენდება ყველა პოსტი, კოვიდდადებითების და ხვდები, რომ მოვიდა. უკვე საკუთარ პასუხს აღარც ელოდები და აგრძელებ იგივე რეჟიმში, რომლითაც დახვდი პირველ დადებით პასუხს ოჯახში.
მეგობრის კითხვაზე თუ როგორ ხარ, იღიმი და პასუხობ: ქვედა კიდურები გტკივა, კუნთები და ყველა სახსარი გტკივა, ზურგი, ბეჭები და თავი გტკივა აუტანლად, მაგრამ კარგად ვარ. კარგად ვარ, ნიშნავს იმას, რომ სუნთქავ უპრობლემოდ და არ საჭიროებ სტაციონარს, ჯერჯერობით, მაინც.
დღე მეორე – ოჯახის უხუცეს წევრსაც იგივე სიმპტომები დაეწყო, ზუსტად ისეთი, როგორიც შენ და აქ უკვე ორივე ყურში ზარივით რეკავს: ასაკოვან ადამიანებს გავუფრთხილდეთ.
მერე კოვიდ სასტუმროს 12-დღიანი კარანტიანი. სასტუმრო ბათუმში ზღვის ნაპირას: კოლიზეუმი. ზღვის ულამაზესი ხედით და აბსოლუტური კომფორტით.
თითოეულ ჩვენგანს არაერთხელ გვითქვამს, რომ ექიმები, საერთოდ მედპერსონალი არიან გმირები, ნამდვილად გმირები არიან, ისინი ამ ომში წინახაზზე იბრძვიან. მაგრამ მათთან ერთად გმირები არიან ამ კოვიდ სასტუმროების, კარანტინის მომსახურე პერსონალები, რომლებიც ექიმების მხარდამხარ იბრძვიან. აინტერესებთ ,,კატეს“ პასუხი, ,,დედიმერის“ მაჩვენებელი… უკვე იმდეენი პაციენტი გაუსტუმრებიათ, რომ ზუსტად იციან 4 ქულიანი ,,კატე“ რას ნიშნავს და 650 ,,დედიმერი“. გამხნევებენ და გიღმიან, ცდილობენ სახელით მოგმართონ, დაგჭირდება რამე და გვერდით გედგნენ, დისტანციურად.
12 დღის განმავლობაში, არც ერთხელ კარებთან დატოვებული სადილ-ვახშამი. მსუბუქი კაკუნი კარებზე და გაღიმებული გოგოები, ეკიპირებაში რომ ძვლის სუნთქავდნენ. ადამიანური დამოკიდებულება, რომელიც თურმე ასე მიჩქმალა კოვიდმა, თურმე არსებობს და მერე როგორ…
დიახ, ექიმებთან და მედიკოსებთან ერთად, კოვიდს სწორედ ამ სასტუმროების პერსონალი ამარცხებს და ისინიც გმირები არიან.
არ დამავიწყდება სასტუმროდან წამოსვლის დროს, როგორ სიხარულით გვაცილებდნენ: მე, ჩემს 12 წლის ძმიშვილს და 82 წლის მამას. როგორ უხაროდათ, რომ ბაბუმ კოვიდს ,,კუდით ქვა ასროლინა“.
დიახ, ყველაფერი წარმავალია, ეს კორონობაც დასრულდება და ადამიანური ემოციებიც ისევ თავის მდინარეში შეცურავს, რომელიც ცხოვრებას ფერადოვნებას ანიჭებს.
კორონა დამარცხდება, აუცილებლად დამარცხდება, ჩვენ ერთად გავიმარჯვებთ!
