შეკვეთილში (ოზურგეთის მუნიციპალიტეტი) 25 ივნისიდან ბიძინა ივანიშვილის საცხოვრებელ სახლთან შიმშილობა და საპროტესტო აქციები მიმდინარეობს.
აქციის პირველ დღეს შეკვეთილში, ბიძინა ივანიშვილის რეზიდენციასთან გურიისა და აჭარის ახლგაზრდები, ასევე ,,ნაციონალური მოძრაობისა” და ,,ევროპული საქართველოს” წარმომადგენლებმა საპროტესტო აქცია გამართეს
ისინი თბილისში, რუსთაველის გამზირზე მიმდინარე აქციას სოლიდარობას უცხადებენ და შინაგან საქმეთა მინისტრის, გიორგი გახარიას თანამდებობიდან გათავისუფლებას მოითხოვენ.
“შესაკრებთა ადგილის გადანაცვლებით ჯამი არ იცვლება. კობახიძესთან ერთად ჩვენ ვითხოვთ, გახარიამ დატოვოს თანამდებობა. მჯერა, რომ ახალგაზრდები გავიმარჯვებთ“- განაცხადა აქციის მონაწილე გიორგი ქამადაძემ.
აქციის მონაწილეები პერმანენტული აქციების მოწყობას გეგმავენ. რამდენიმე მათგანმა კი შიმშილობის დაწყება დააანონსა.
აქციის მეორე დღეს კი შეკვეთილში, პარტია „ქართული ოცნების“ თავმჯდომარის, ბიძინა ივანიშვილის სახლის მიმდებარე ტერიტორიაზე შიმშილობის აქციის ერთ-ერთი მონაწილე შეუძლოდ გახდა.
“ჯერ კიდევ გუშინ ვთხოვეთ პოლიციას, რომ მოსულიყო სასწრაფო და ემორიგევათ აქ, მაგრამ რეაგირება არ ყოფილა. იქ, სადაც მიმდინარეობს შიმშილობის აქცია, მუდმივად უნდა იდგეს სასწრაფო“, _ განაცხადა ერთ- ერთმა მოშიმშილემ, გიგა ნაგერვაძემ.
დაძაბული აღმოჩნდა აქციის მესამე დღე. შეკვეთილში, აქციის მონაწილეთა ნაწილმა, ,,ნაციონალური მოძრაობის” წარმომადგენლებმა დენდროლოგიურ პარკთან გადაინაცვლეს. ისინი იქ შეღწევას ცდილობდნენ, რისი საშუალებაც მათ სამართალდამცავებმა არ მისცეს. ხმაური რამდენიმე წუთის განმავლობაში გაგრძელდა.
“,2018 წელს ივანიშვილი დაგვპირდა, რომ დენდროლოგიური პარკი იქნებოდა საზოგადოების კუთვნილება. თუმცა, დღეს აღმოჩნდა რომ ეს პარკი მან მოიწყო თავისთვის. წინააღმდეგობის ბარიერი აღმართა ასობით პოლიციელმა, რაც მიუთითებს იმას, რომ გახარიას უწყება მის უსიტყვო მორჩილებაში იმყოფება”, _ განაცხადა ,,ნაციონალური მოძრაობის” ქობულეთის ორგანიზაციის თავმჯდომარე, საკრებულოს წევრმა, ბონდო თედორაძემ.
დენდროლოგიურ პარკში შესვლა კვლავ აპირებდნენ აქციის და შიმშილობის მეოთხე დღეს, მაგრამ ეს მცდელობაც უშედეგოდ დასრულდა. პარკთან მოხდა მხოლოდ ერთი კარავის გაშლა, რომლის დადგმასაც მცირე შეხლა-შემოხლა მოყვა სამართალდამცავებსა და აქციის მონაწილეებს შორის.
“გურია ნიუსი“ ერთ-ერთ მოშიმშილეს მინდია ადაძეს ესაუბრა.
“მე და ჩემმა ორმა მეგობარმა მივმართეთ პროტესტის უკიდურეს ზომას შიმშილობას. აქცია და შიმშილობა გაგრძელდება იქამდე, სანამდე არ შესრულდება ჩვენი მოთხოვნები: უნდა გადადგეს შინაგან საქმეთა მინისტრი გიორგი გახარია და იმ ადამიანების მიმართ სისხლი სამართლის საქმის აღძრა, რომლებმაც 20-12 ივნისს უმოწყალოდ დაასახიჩრეს და დაარბიეს ჩვენი თანამოქალაქეები.“ – გვითხრა ადაძემ.
მისივე თქმით, მოშიმშილეების რიცხვმა იკლო.
მინდია ადაძე: ორი შეუძლოდ გახდა შიმშილობის დროს. ექიმების რჩევით, მათისთვის არ შეიძლება შიმშილობის გაგრძელება. რაც შეეხება დანარჩენ სამ მოშიმშილეს, მინდა გითხრათ, რომ თავს კარგად ვგრძნობთ. არ არის გამორიცხული მოშიმშილეების რიცხვი გაიზარდოს.
“გურია ნიუსი“ ასევე დაინტერესდა, რა კავშირშია გიორგი გახარიას გადადგომის მოთხოვნასა და პარკში შესვლას? – რაზეც ადაძემ გვიპასუხა:
“იმედის“ ტელევიზიით ბიძინა ივანიშვილის პარკის შესახებ არაერთი სიუჟეტი გავიდა და იქ საუბრობდნენ, რომ ეს პარკი იქნებოდა ხალხის. ჩვენ გვაინტერესებდა თუ ხალხის არის, რატომ არ იხსნება? გვინდოდა ჩვენი თვალით ვნახოთ, რა ხდება იქ.“
მინდია ადაძესთან საუბრის შემდეგ, “გურია ნიუსი“ პოლიტიკოს და ოპოზიციონერს მედეა ვასაძეს დაუკავშირდა. ის აქციაზე ხშირად დადის შეკვეთილში:
“პრაქტიკულად მიზანი არის ის, რომ სოლიდარობას ვუცხადებთ იმ ახალგაზრდებს, რომლებიც შეკვეთილში შიმშილობს. ჩვენი სახლებში ყოფნა არავითარ შემთხვევაში, არ იქნება გამართლებული. პირდაპირ ვიტყვი აქციის მონაწილეების და ახალგაზრდების მოთხოვნები პრაქტიკულად სრულ შესაბამისობაშია იმ საკითხებთან, რომლის გატარება ჩვენ ხელისუფლების მხრიდან აუცილებლად მიგვაჩნია. გიორგი გახარია აუცილებლად უნდა გადადგეს, ასევე უნდა მოხდეს ის ცვლილება კონსტიტუციაშია, რომელიც დაკავშირებული არჩევნებთან დაკავშირებით უნდა გატარდეს. ამით კი, პრაქტიკულად უნდა მივიღოთ ის გარემო, სადაც ობიექტური, სამართლიანი, მიუკერძოებელი არჩევნების ჩატარება იქნება შესაძლებელი. “ – თქვა ჩვენთან საუბრის დროს მედეა ვასაძემ.
მედეა ვასაძე ასევე ამბობს, რომ ხელისუფლება არაადეკვატურია არსებული ვითარების დროს.
“გუშინ მინისტრების განცხადებები სრულიად არ შეესაბამება, ბოლო დროს საქართველოში განვითარებულ ვითარებას. მე, ვფიქრობ, რომ არამარტო გახარიას, შეიძლება მთლიანად მთავრობის გადაყენების მოთხოვნა დააყენონ აქციის ორგანიზატორებმა. მინდა ვთქვა: ეს აქცია შედეგის მიღწევამდე უფრო გაღრმავდება და კიდევ უფრო გაძლიერდება. იმიტომ, რომ მუხტი არის ძალიან მაღალი.“
საუბრის დასასრულს მედეა ვასაძესაც ვკითხეთ რა კავშირშია გიორგი გახარიას გადადგომის მოთხოვნასა და პარკში შესვლას შორის?
“ეს მოთხოვნა იყო სიმბოლური. მე პირადად დიდი სიამოვნებით მოვინახულებდი აჭარიდან წამოღებული და გადარგულიცხეების მდგომარეობას. იცით, რომ, ამ კუთხით ყველაზე მეტად აჭარის რეგიონი დაზარალდა. შორიდან, რაც ვნახე პარკი ჯერ კიდევ მოუწესრიგებელია და არსებითად იქ შესვლა, არაფერს იძლეოდა. აქციის დროს გაჩნდა იდეა და სიმბოლურად გვინდოდა გვენახა ეს პარკი. “ – გვითხრა მედეა ვასაძემ.
როგორც აქციის მონაწილეებმა გვითხრა, აქცია მანამდე გაგრძელდება, სანამდე მათი მოთხოვნები არ დაკმაყოფილდება.
