“ეს არის ძალადობა მოსახლეობაზე!”

როგორც უკვე ვწერდით, ოზურგეთში, თაყაიშვილის ქუჩაზე, ჩინური გზებისა და ხიდების კომპანია, ტენდერით გათვალისწინებულ სამუშაოებს ასრულებს. თუმცა, არა ერთ გაუთვალისწინებელ ქმედებას სჩადის და გზის მშენებლობის ნაცვლად, როგორც ქუჩის მცხოვრებლები ამბობენ, იბზარება და ინგრევა მათი სახლების კედლები. ტროტუარების ყოვლად მოუხერხებელი, უხარისხო და პრაქტიკულ გარემოს ყველანაირად მოკლებული ხაზი, სადაც ეზოებში მანქანით შესვლა შეუძლებელია, მშენებელს არ ადარდებს.

თაყაიშვილის ქუჩის მცხოვრებლები აღშფოთებას ვერ მალავენ კომპანიის ზოგი წარმომადგენლის ცინიკური დამოკიდებულების გამო. მათი თქმით, იმისთვის რომ გადაადგილების პრობლემა არ შეექმნათ, კომპანიის წარმომადგენელმა ჯიპის მარკის მანქანის შეძენა ურჩია.

_ ჩინური კომპანიის ერთ-ერთმა წარმომადგენელმა, როცა ვკითხეთ, ასეთი დამრეცი და დაბრეცილი ტროტუარის ჯებირზე როგორ გადავახტუნოთ მანქანაო, არხეინად გვიპასუხა: “ჩემნაირი მანქანა იყიდეთო _ ჯიპის ყიდვა გვირჩია”, _ ამბობენ “გურია ნიუსთან” ადგილობრივები.

14 ივლისს, თაყაიშვილის ქუჩის მოსახლეობა კვლავ მოტყუების გამო, პროტესტით გამოვიდა და თქვეს, რომ სამკვირიანი ტაიმ-აუტის შემდეგ, კომპანიამ პირობის დარღვევით მუშაობა გააგრძელა.

ოზურგეთის მუნიციპალიტეტის მერიის მიერ გზების დეპარტამენტში გადაგზავნილ წერილს, სადაც მოსახლეობის მოთხოვნები იყო აღწერილი, შედეგი არ მოჰყოლია.

კერძოდ, განცხადებაში ნათქვამი იყო, რომ ოზურგეთში, თაყაიშვილის ქუჩაზე, შიდასახელმწიფოებრივი მნიშვნელობის გზის რეაბილიტაციას ასრულებს ჩინეთის გზებისა და ხიდების კორპორაციის საქართველოს ფილიალი. ადგილობრივმა მოსახლეობამ განცხადებით მიმართა მერიას, სადაც ნათქვამია, რომ სპეცტექნიკის მუშაობის შედეგად, ზიანდება საცხოვრებელი სახლები, დაიბზარა შენობების კედლები და წყლის მილების შეცვლამდე, არ სურთ ტროტუარების მოწყობა. ცალკე პრობლემაა წყლის სამკუთხა ღარების მოწყობა, რითაც იქმნება დისკომფორტი ეზოში შესასვლელებსა და მიერთებებზე. ზემოთ ხსენებული მოთხოვნა რომ დაკმაყოფილდეს, საჭიროა ადგილობრივი სპეციალისტების მობილიზება და დამაკმაყოფილებელი გადაწყვეტილების მიღება.

ამ განცხადებიდან სამი კვირის შემდეგ, 14 ივლისს, დილით, კომპანიის წარმომადგენლებმა საფეხმავლო ბილიკებზე ასფალტის საფარის დაგება ისე დაიწყეს, რომ წყლის მილების შეცვლის სამუშაოებს არ დაელოდნენ.

_ ხელისუფლებამ არ დაგვიცვა. რა ეშველება ჩემს დაბზარულ სახლს, ან ეზოში შესასვლელები რა დღეშია. ეს არის ძალადობა მოსახლეობაზე. ჯერ წყლის მილები არ გაუყვანიათ და ასფალტის დაგებას იწყებენ. გამოდის, რომ კვლავ თავიდან უნდა გადათხარონ. გადათხრა და დანგრევა გვაკლია?! ვერ ხედავდნენ, ამასწინანდელი სტიქიის დროს, როგორი მდინარე მიედინებოდა, სამი დღის განმავლობაში, ჩვენს ქუჩაზე? ჯერ ეს პრობლემა მოეგვარებინათ, _ გვითხრა თაყაიშვილის ქუჩის მცხოვრებმა დარეჯან ჩხაიძემ.

მოსახლეობის თხოვნით ადგილზე იმყოფებოდნენ საკრებულოს მაჟორიტარი დეპუტატი დავით მდინარაძე, ოზურგეთის მუნიციპალიტეტის მერიის შესაბამისი სამსახურების სპეციალისტები, მაგრამ შედეგი არ ჩანს.

მოსახლეობას ხელისუფლებისგან ქმედითი ნაბიჯების გადადგმას ითხოვს.

ჩვენ ვწერდით, რომ ივნისის ბოლოს, ოზურგეთში, თაყაიშვილის ქუჩის მოსახლეობის წარმომადგენლებს ჩინეთის გზებისა და ხიდების კომპანიის წარმომადგენლებს შეხვდნენ.

ამ კომპანიის ზედამხედველობის სამსახურის წარმომადგენელმა იოგენ გათნაგარმა მაშინ განაცხადა, რომ ისინი პროექტის მიხედვით აწარმოებენ სამუშაოებს.

კითხვაზე, თუ ვინ შეადგინა პროექტი, რა ღირებულების სამუშაოები უნდა ჩატარდეს, ბატონმა იოგენმა განაცხადა, რომ ეს ინფორმაცია არ არის საჯარო (?!) და შეუძლიათ საგზაო დეპარტამენტს მიმართონ.

ჩინური კომპანიის წარმომადგენლებმა საკრებულოს მაჟორიტარ დეპუტატ დავით მდინარაძესთან, ოზურგეთის მერიის წარმომადგენლებს გოჩა აბაშმაძესა და გია ნიკოლაიშვილთან ერთად მშენებლობის კრიტიკული ადგილები დაათვალიერეს და მოსახლეობის პრეტენზიები მოისმინეს.

ზედამხედველები აცხადებდნენ, რომ ისინი არსებული პრობლემების შესახებ მოახსენებდნენ ხელმძღვანელებს (როგორც ამ კომპანიის მდივანმა ლელა კოჭლამაზიშვილმა განაცხადა, საგზაო დეპარტამენტს მათთვის არ მიუწოდებია ოზურგეთის მუნიციპალიტეტის მერიის წერილი #36-3623142153, 22/05.2023 წ), არსებულ ვითარებაზე იმსჯელებენ და გადაწყვეტილებებს მიიღებენ. ამის შემდეგ დეპარტამენტმა მერიისგან წერილი მიიღო, თუმცა, შედეგი არ ჩანს.

ამიტომ 14 ივლისს, თაყაიშვილის ქუჩის მცხოვრებლებმა ჩინური კომპანიის მიერ გზის სამუშაოების წარმოებისას წარმოქმნილი პრობლემები, უკვე მესამედ გააპროტესტეს. ზოგადად კი, ისინი ყოველდღე გამოთქვამენ უკმაყოფილებას და გამუდმებით ითხოვენ დახმარებას.

მოსახლეობასთან სახალხო დამცველის წარმომადგენელი, თამარ ოგანოვაც მივიდა. იგი თაყაიშვილის ქუჩაზე ჩინური კომპანიის ნამუშევარს გაეცნო, მოსახლეობას შეხვდა და მათგან მოისმინა მშენებლობისას წარმოქმნილი პრობლემები.

თაყაიშვილის ქუჩის მცხოვრებლები “გურია ნიუსთან” ამბობენ, რომ ერთ-ერთ საჯარო დაწესებულებაში უთხრეს, თუ იცით, როგორი პატრონის მქონე კომპანიას დაუპირისპირდითო…

_ ჩვენ არავის დავპირისპირებივართ, თითოეული ჩვენგანის უფლებებს ვიცავთ. ნებისმიერ ზეწოლის ფაქტს გავასაჯაროებთ… _ ამბობს დარეჯან ჩხაიძე.

ოზურგეთის მუნიციპალიტეტის მერიის მიერ საქართველოს საავტომობილო გზების დეპარტამენტის თავმჯდომარის გიორგი წერეთლის სახელზე 2023 წლის 19 მაისს (# 36-3623139104) გაგზავნილი წერილის ასლის შინაარსზე თაყაიშვილის ქუჩის მცხოვრები ჟურნალისტი, ნუგზარ ასათიანი გულნატკენი საუბრობს:

_ მინდა, ვკითხო ოზურგეთის მუნიციპალიტეტის მერის მოადგილეს, ნიკა ბოლქვაძეს (იგი აწერს დეპარტამენტში გაგზავნილ წერილს ხელს), წერეთელმა არაფერი გიპასუხათ? რატომ ერთხელ არ მოხვედით და შეხვდით თაყაიშვილის ქუჩის მოსახლეობას? იქნებ, შევძლოთ და გავეცნოთ, რას ითვალისწინებს თაყაიშვილის ქუჩის “რეაბილიტაციის” პროექტი. ან რა უპირატესობა აქვს ჩინეთის გზებისა და ხიდების კომპანიას, ამჟამად ოზურგეთის მუნიციპალიტეტში მიმდინარე პროექტების გამახორციელებელ კომპანიებთან (შპს “პალადა”, “ახალი გზა”, “ფემინიკონტრაქშენ გრუპ”, “შარაგზა პირველი”, “კოხტის ძირი 2010″… “გზამშენს” მგონი პროექტი არ აქვს) შედარებით. არ ვიცით პროექტის ღირებულება, დაფინანსების წყარო, საპროექტო ორგანიზაცია, რას ითვალისწინებს პროექტი და ა. შ. ან თქვენთვის არაფერს ნიშნავს, რომ რადგან ვიცავ ჩემი უბნის მოსახლეობის უფლებებს, ჩინურმა კომპანიამ ეზოში მისასვლელი ჩამიკეტა? ვიცი, წესიერი კაცი ხართ და მიკვირს თქვენი ასეთი დუმილი… _ ამბობს ნუგზარ ასათიანი.

ასათიანი, ასევე, ამბობს, რომ მასთან სახლში ჩინური კომპანიის წარმომადგენელი მივიდა. მის საუბარს მძღოლი, ტატო მამალაძე თარგმნიდა. მან გვითხრა, რომ საგზაო დეპარტამენტმა სიტყვიერად კი გვითხრა, მოსახლეობას შესასვლელები და ღობეები მოვუწესრიგეთ, მაგრამ ფულს არ გვაძლევენო.

მუშებმა “დააზუსტეს”, დეპარტამენტს ასეთი პროექტები აქვს, სხვაგანაც ასე აკეთებენ და თქვენი მერია უნდა დაგეხმაროთო.

თაყაიშვილის ქუჩის მცხოვრებლები ცალკე იმაზე წუხან, რომ მალე წყლის კომპანია დაიწყებს წყლის მილების შეცვლას და კვლავ გადათხრიან ქუჩას. რაც დააგეს ან აგებენ, ყოვლად მოუხერხებელი, პრაქტიკულობას მოკლებული და უხარისხოა:

_ 21-ე საუკუნეში ინფრასტრუქტურის ასე მოწყობას ვინ გეგმავს? აკი, ჩინელებს, თუკი სურთ, გადასარევად აგებენ გზებს და აშენებენ ხიდებს?

ამ კითხვებზე პასუხს კვლავ ელოდებიან თაყაიშვილის ქუჩის მცხოვრებლები. მართალია, დაპირება კვლავ ძალაში რჩება, თუმცა, წინა დაპირების, როგორც თავად ამბობენ, “შესრულება” მათი კვლავ “გადაგდებით” სცადეს:

_ არ გავჩერდებით. ყველა ძალადობას და მოტყუების მცდელობას გავახმაურებთ, _ ამბობენ ისინი.

“გურია ნიუსი” თვალს ადევნებს ამ გაჭიანურებულ და საკმაო დარღვევებით მიმდინარე გზის რეაბილიტაციას, რათა განვითარებული მოვლენების თაობაზე ვაცნობოთ როგორც თაყაიშვილის ქუჩის ყველა მცხოვრებს, ისე ჩვენს მკითხველებს.