ჩოხატაურის მუნიციპალიტეტის საკრებულოს ფრაქცია “ჩოხატაური საქართველოსთვის” თავმჯდომარე გოგი ბოლქვაძე დაბა ბახმაროში ასაშენებელი ორბი ჯგუფის წარმოდგენილ არქიტექტურულ ესკიზის ირგვლივ შექმნილ სიტუაციას ეხმაურება.
“მინდა გამოვეხმაურო დაბა ბახმაროს სარეკრეაციო ტერიტორიაზე, ორბი ჯგუფის საკუთრებაში არსებულ მიწის ნაკვეთზე წარმოდგენილ არქიტექტურული ესკიზის ირგვლივ შექმნილ სიტუაციას. რომლის შესახებაც, რათქმაუნდა კითხვები როგორც საზოგადოების ნაწილს ასევე თითოეულ პოლიტიკურ თუ საჯარო მოხელის მხრიდანაც დარწმუნებული ვარ თავის დროზე დასმული იქნება.
მე მჯერა, თითოეული ჩოხატაურელი მუნიციპალიტეტის განვითარებას ხედავს კურორტ ბახმაროში.
ეს რაც ხდება, დაპირისპირება თუ აჟიოტაჟი გამოწვეულია, პროექტის არასწორი და ნაკლები ინფორმაციის შედეგად, პროექტისადმი ცნობადობის არა სრული ახსნით. დარწმუნებული ვარ, არცერთ ჩოხატაურელს, ჩოხატაურის ტურისტული პოტენციალის განვითარების, ამაღლების წინააღმდეგ გამოსვლა არ სურს, არ მჯერა ადამიანს არ უნდოდეს ბახმაროს განვითარება, ისევე როგორც მუნიციპალიტეტის რომელიმე ხეობის არანაკლებ ტურისტული პოტენციალით.
მეგობრებო, 2008 წლიდან თითოეულ შეხვედრასა და განხილვაში ვიყავი ჩართული, როგორც პირველ რიგში ერთ-ერთი რიგითი ჩოხატაურელი და ამავ დროულად, ჩოხატაურის მთავარი არქიტექტორი. ბახმაროს საკითხებთან დაკავშირებით შექმნილ ყველა კომისიის წევრი გახლდით, მართლაც ბევრი რამ გამოვიარეთ დაწყებული 2008 წლიდან 2019 წლამდე. ბევრი ხარვეზები იყო საზღვრებში. მთელი რიგი საკითხები. დეტალებში არ შევალ. ბევრ კოლეგას მოგეხსენებათ და იცით.
ბახმაროს მიენიჭა რეკრიაციული ზონის სტატუსი რადგან, შექმნილიყო მიწათსარგებლობის გეგმა, ამ გეგმამ გარკვეული წლები იმუშავა. 2015 წელს კიდევ განახლდა განაშენიანების რეგულირების გეგმა, შემდეგ 2017 წლის ივლისში საქართველოს მთავრობამ ახალი დადგენილებით სარეკრეაციო ზონის სტატუსთან ერთად ახალი სარეკრეაციო ტერიტორიის მიწათსარგებლობის გენერალური გეგმაც დაამტკიცა. ნომერ პირველი ამოცანა იყო ზაფხულის სეზონის გაზრდა, ეს თვენახევრითაც რომ მოხდეს, მუნიციპალიტეტის შემოსავალი მნიშვნელოვნად გაიზრდება, დასაქმებული ადამიანების რაოდენობაც გაიზრდება. სამომავლო პერსპექტივა არის ის, რომ ამას დაემატება ზამთრის სეზონი. საბოლოოდ მივიღებთ 4-სეზონიან აქტიური დასვენების ადგილს, რომელსაც შეეძლება ერთ პიკურ დღეს, 10 ათასი ადამიანი დაიტიოს, დამსვენებლების და მომსახურე პერსონალის ჩათვლით. რაც შეხება მიწათსარგებლობის გეგმას, ეს გეგმა მოიცავს ზონირებას. ზონირება არის საფუძველი ნებართვის გაცემისთვის, სადაც დგინდება კოეფიციენტი, სიმაღლე, განაშენიანების სიმჭიდროვე და სხვა პარამეტრები. ასევე გეგმავს ძირითადი ინფრასტრუქტურის განვითარებას – გზები, წყალი, კანალიზაცია და ასე შემდეგ. რათქმაუნდა აუცილებლად დაისმება კითხვები. პირველ რიგში ეს მასშტაბური ტიპის სასტუმრო კომპლექსის პროექტი თავისი სამშენებლო კლასიდან გამომდინარე, აუცილებლად შესათანხმებელი იქნება შესაბამის სამინისტროში, ამ მშენებლობის ნებართვას ვერ გასცემს ჩოხატაურის მუნიციპალიტეტის მერია. პროექტმა უნდა გაიაროს კანონმდებლობით დადგენილი ნორმებით შესაბამისი სანებართვო პირობები, განხილული უნდა იქნას თითოეული დეტალის ძლიერი და სუსტი მხარე, დაისმება კითხვები სად და როგორ მოხდება კომპლექსის საკანალიზაციო და მოხმარებული წყლის გადინება, ჩაშვება და ასე შემდეგ.
ასე რომ მეგობრებო, პროექტი საბოლოოდ მშენებლობის ნებართვის გაცემამდე ბევრჯერ განიცდის ცვლილებას, როგორც არქიტექტურული იერსახით, ასევე თავისი გარემოზე ზემოქმედების მახასიათებლებით.
შემდეგ კი აუცილებლად ერთად ვიმსჯელოთ რა და როგორ წაადგება ჩვენს მუნიციპალიტეტს მომავლის წინსვლასა და განვითარებაში”,_ წერს გოგი ბოლქვაძე.
