თვითმმართველობის არჩევნებამდე 2 დღით ადრე მარნეულის რაიონის სოფელ ყიზილაჯლოში შეიარაღებული თავდასხმის შედეგად დაჭრილმა, ჯეიხუნ ჩოიდაროვმა პირველი განცხადება გააკეთა. „ქართული ოცნების“ წევრი, რომელიც სისხლიანი გარჩევის შემდევ კლინიკაში უმძიმესი ჭრილობებით გადაიყვანეს, ამბობს, რომ ეს იყო პოლიტიკური დაპირისპირებით გამოწვეული თავდასხმა.
სისხლიანი გარჩევის უკან პოლიტიკური ინტერესების არსებობაზე ჯეიხუნ ჩოიდაროვმა გამომძიებელ ჟურნალისტთა ჯგუფს უამბო, რომელმაც აუდიოჩანაწერი „კურიერს“ გადასცა.
საავადმყოფოს თანამშრომლები, სადაც დაჭრილი ჩოიდაროვი გააიყვანეს, „კურიერს“ უყვებიან, რომ გამომძიებლებმა ექიმებს ოთახი მოამზადებინეს, სადაც “ქართული ოცნების” წევრმა, რომელიც მარნეულის საკრებულოს წევრი გახდა, პირველი ჩვენება მისცა. მან გამოძიებასთან კონკრეტული გვარებიც დაასახელა. გავრცელებული ინფორმაციით, ბრალდებულები უკვე დაკავებული არიან.
ოპოზიციაში დარწმუნებულები არიან, რომ ყიზილაჯლოს წინასაარჩევნო სისხლიანი თავდასხმა მმართველი პარტიის შიდა პოლიტიკური გარჩევა იყო.
შეგახსენებთ, რომ სოფელ ყიზილაჯლოში ხუთი ადამიანი, მათ შორის “ქართული ოცნების” მაჟორიტარობის კანდიდატი ჯეიხუნ ჩოვდაროვი და საკრებულოს მოქმედი დეპუტატი 20 ოქტომბერს დაჭრეს. შემთხვევა “ქართული ოცნების” შტაბთან გვიან ღამით მოხდა. თვითმხილველების ინფორმაციით, ცეცხლი სოფელ ყიზილაჯლოში “ქართული ოცნების” საარჩევნო შტაბს გაუხსნეს.
სროლის დროს შენობაში რამდენიმე პირი იმყოფებოდა. დაჭრილები საავადმყოფოში შტაბის წევრებმა ავტომანქანებით გადაიყვანეს. შემთხვევის ადგილზე ჩავიდა შინაგან საქმეთა მინისტრი.
“ნუ განვიხილავთ ამას ცალსახად პოლიტიკურ ჭრილში. პოლიტიკური სარჩული, ჩემი თხოვნა იქნება, რომ მოვხსნათ ამ თემას. მიუხედევად ამისა, ჩვენ ყველა ვერსიაზე ვმუშაობთ. ვფიქრობ, უახლოეს საათებში ჩვენ გარკვეული ინფორმაცია, უფრო მეტი ინფორმაცია გვექნება,” – განაცხადა მაშინ გიორგი მღებრიშვილმა.
