მართალია, თვალის ერთი გადავლებით, ლანჩხუთში ქალაქის იერსახე შელამაზებული ჩანს, თუმცა, ირკვევა, რომ საქმე მთლად მოსაწონად ვერაა, რის გამოც, ლანჩხუთელთა ნაწილი გულისწყრომას ხშირად გამოხატავს.
საქმე ისაა, რომ ვინაიდან წვიმის დროს სანიაღვრე არხები წყალს ვერ ატარებდა და ტერიტორია იტბორებოდა, ქალაქის ცენტრალური მაგისტრალის რეაბილიტაცია გახორციელდა და ჟორდანიას ქუჩაზე, ცენტრალური მაგისტრალის გასწვრივ, გარე განათების, სანიაღვრე არხებისა და წყალმომარაგების ქსელის რეაბილიტაცია და საფეხმავლო ბილიკები მოეწყო.
თუმცა, ამ თემაზე საუბრისას, ლანჩხუთელები შესრულებული სამუშაოების უხარისხობაზე აკეთებენ აქცენტს. მათი საუბრიდან ირკვევა, რომ წვიმის დროს ტროტუარები იტბორება და გავლა ჭირს, არადა, მთავარი ფაქტორი, რის გამოც ცენტრალური მაგისტრალის გასწვრივ საფეხმავლო ბილიკები მოეწყო და სანიაღვრე არხების რეაბილიტაცია გახორციელდა, სწორედ ამ პრობლემის მოგვარება იყო.
“წვიმის დროს იმხელა გუბეები დგას, “ვალინკა” თუ არ გაცვია, კოჭებამდე წყალში ცურავ. ველოსიპედით რომ გაივლი, ქვემოდან გესხმება ტალახიანი წყალი. საშინელებაა, რაც წვიმისას ხდება. ესაა გაკეთებული საქმე?! ხალხის დაცინვაა ეს!” _ საკუთარ პოზიციას აჟღერებენ რიგითი ლანჩხუთელები.
ცნობისთვის, ერთ-ერთი ასეთი მონაკვეთი ლანჩხუთის მერიის შენობის მიმდებარედაა და იქაური ფანჯრებიდან კარგად უნდა მოჩანდეს ზემოთ ნახსენებ ადგილზე შექმნილი ვითარება. ამ ფაქტის ამსახველ ფოტოს “გურია ნიუსს” ადგილობრივი მკითხველი უზიარებს.
მერიის შენობისვე მიმდებარედაა ცენტრალური მაგისტრალის ის მონაკვეთიც, სადაც ჟორდანიასა და კოსტავას ქუჩების კვეთაა და სანიაღვრე არხი გადის. საუბარია ტროტუარზე, რომელიც მოულოდნელად წყდება და გზის გასაგრძელებლად ქვეითად მოსიარულეებს საკმაოდ მოზრდილ არხზე გადახტომა უწევთ. ისინი კი, ვისაც გადახტომის ძალა არ შესწევთ, ცენტრალურ გზაზე უნდა გადავიდნენ და ასე გააგრძელონ სვლა.
ამის თაობაზე “გურია ნიუსი”, თემასთან დაკავშირებით მოქალაქეების მხრიდან სოციალურ ქსელში აქტიურობიდან გამომდინარე, რამდენიმე თვის წინაც წერდა: “გამოცხადდა ტენდერი, გაკეთდა ტროტუარი, ქვეყნის ფული დეიხარჯა და… ამის დამთავრება რაღა უსაშველო შეიქნა, თქვე კაი დედმამიშვილებო?! ამ მეტრანახევარიზა დეიქცეოდა ქვეყანა, რომ ტროტუარი გზას მიერთებოდა?! დავიჯერო “იმ შენობიდან” არ ჩანს ეს?! ეტყობა “მთავრობის” ფანჯრებს დიდი ფარდა აქვს! სადილს რომ გააკეთებ და მარილს არ უზამ, ისეთი გაკეთებულია”, _ წერდნენ ლანჩხუთელები.
მაშინ მოქალაქეთა მხრიდან გაჟღერებულ პრეტენზიებზე ხელისუფლების წარმომადგენელთა მხრიდან “გურია ნიუსმა” პასუხად მოკლე განმარტება მიიღო: “გაკეთდება ძალიან მალე”, თუმცა, კონკრეტული, ჯერჯერობით, არაფერია და ეს “მალე” სანამდის გაგრძელდება, ღმერთმა უწყის.
ავტორი
