“ესენი ან არ კითხულობენ შესულ განცხადებებს, ან ვერ კითხულობენ, ან აზრი ვერ გამოაქვთ!”

ეკომიგრანტი შოთა ბოლქვაძე მეუღლესთან ერთად ჩოხატაურის მუნიციპალიტეტის სოფელ ჯვარცხმაში პატარა, სიძველისგან ჩამოქცეულ სახლში ცხოვრობს. იგი წლების განმავლობაში იყო სოციალური დახმარების მიმღები, შემდეგ კი ეს დახმარება შეუწყდა.

შოთა ბოლქვაძე მუნიციპალიტეტის ხელმძღვანელებისგან სახლის კაპიტალურ შეკეთებას, სოციალური სააგენტოსგან კი შემწეობის დანიშვნას და განაცდური თანხის დაბრუნებას ითხოვს.

“მუნიციპალიტეტის ხელმძღვანელობას რამდენჯერმე მივმართე დახმარების თხოვნით. ჩვენ ეკომიგრანტები ვართ _ ხულოს რაიონიდან ჩამოგვასახლეს აქ, მაგრამ ეს სახლიც საცხოვრებლად უვარგისია _ ქარი რომელი მიმართულებითაც დაუბერავს, იქით იხრება. თუმცა, არავინ მაქცევს ყურადღებას, არც არასდროს მოუქცევია.

ადგილობრივ ხელისუფლებასთან რომ ვერაფერს გავხდი, წერილი მივწერე მაშინდელ პრეზიდენტს მარგველაშვილის, პრემიერ-მინისტრსაც, გუბერნატორთანაც თვეების განმავლობაში იდო ჩემი განცხადება, მაგრამ საშველი მაინც არ დამადგა. საქმის კურსშია მაჟორიტარი დეპუტატი ნინო წილოსანიც, რომელიც პირადად იმყოფებოდა ჩემთან და დამპირდა კიდეც დახმარებას. თუმცა, ეს არჩევნების პერიოდში იყო და არჩევნების შემდეგ დეპუტატთან ერთად გაქრა დანაპირებიც.

მუნიციპალიტეტმა გამომიყო მხოლოდ 3 კუბური მეტრი მასალა და თუნუქი სახურავისთვის, თუმცა, მე სახურავს არ ვითხოვდი, რადგან ჩემი სახლი საჭიროებს სრულ შეკეთებას. ამის თაობაზე მერთანაც კი მომივიდა შელაპარაკება. სწორედ, ამ დროს მოგვიხსნეს სოციალური დახმარება _ ერთ დღეს სახლში არ ვიყავი და მეუღლემ დამახვედრა ამბავი, რომ სოციალური აგენტი იყო გადამოწმებაზე. შევეჭვდი _ გეგმიური გადამოწმების დრო არ იყო, მაგრამ აღარ მივაქციე ყურადღება. თუმცა, დახმარების ასაღებად რომ მივედი ბანკში, აღმოჩნდა, რომ დახმარება შეწყვეტილი მქონდა. გასარკვევად სოციალური მომსახურების სააგენტოს მივაკითხე, სადაც მითხრეს, რომ გადამოწმების შემდეგ მომივიდა მაღალი სარეიტინგო ქულა. თუმცა, ჩემს სახლში იმ დროსთან შედარებით, როცა შემწეობის მიმღები ვიყავით, უკეთესობისკენ არაფერი შეცვლილა. პირიქით, მაშინ ორი თხა მყავდა, ახლა ისიც აღარ მყავს”, _ ამბობს შოთა ბოლქვაძე.

როგორც შოთა ბოლქვაძე გვიყვება, დახმარებისთვის საია-ს ოზურგეთის ფილიალის იურისტს თამაზ ტრაპაიძეს მიმართა, თუმცა, მისივე თქმით, ტრაპაიძე მალევე ჩამოშორდა საქმეს, თან ისე, რომ საქმეში მის ჩართვას არანაირი შედეგი არ მოჰყოლია:

“წამოვიღე დეკლარაცია სოციალური სააგენტოდან და დახმარებისთვის მივმართე საია-ს ადვოკატს თამაზ ტრაპაიძეს, რომელმაც მირჩია გამგეობიდან და სოციალური სააგენტოდან გამომეთხოვა ყველა განცხადება და მიმემართა სასამართლოსთვის. მოვითხოვე განცხადებები. გამგეობაში უნდა მოეცათ 11 განცხადების ასლი, მაგრამ მომცეს _ 7. მივმართე ისევ ტრაპაიძეს, რომელმაც დამიწერა საჩივარი და შევიტანე სოციალური მომსახურების სააგენტოში, საიდანაც იგივე პასუხი მივიღე, რომ მოხდა გეგმიური გადამოწმება და მაქვს მაღალი ქულა. ესენი ან არ კითხულობენ შესულ განცხადებებს, ან ვერ კითხულობენ, ან თუ კითხულობენ, აზრი ვერ გამოაქვთ, ან კიდევ ხალხს იგდებენ მასხრად. უფრო ხალხს იგდებენ მასხრად, თორემ, როგორც მე მომექცნენ, ამას სხვა არაფერი ჰქვია. კიდევ გავასაჩივრეთ, მომწერეს ისევ იგივე პასუხი. მივედი ისევ ტრაპაიძესთან, რომელმაც 5-6 თვე შემაყოვნა და მერე მითხრა, რომ კანონში შევიდა ცვლილება და აზრი აღარ აქვს გასაჩივრებას”.

შოთა ბოლქვაძის თქმით, მან დახმარებისთვის საია-ს თბილისის ორგანიზაციასაც მიმართა, სადაც მომზადებული წერილის პასუხად სოციალურ სააგენტოში განუცხადეს, რომ გასაჩივრების ვადები დარღვეული იყო:

“ავად ვიყავი და თბილისში წავედი სამკურნალოდ. ვისარგებლე შემთხვევით და ისევ “ახალგაზრდა იურისტებს” მივმართე, ვითხოვე საჩივრის მომზადება. მომიმზადეს საჩივარი, რომელიც შევიტანე თბილისშივე სოციალური მომსახურების სააგენტოში, საიდანაც მივიღე პასუხად, რომ გასაჩივრების დრო ამოწურული იყო და საჩივარი აღარ განიხილებოდა. დახმარებისთვის ისევ საია-ს მივაკითხე. ახლა სხვა ადვოკატი შემხვდა, რომელიც გაეცნო წერილს და მითხრა, რომ გასაჩივრების დრო გასული იყო, რაზეც მე ვუპასუხე, რომ რადგან უარს ამბობთ დახმარებაზე, საჩივარს საია-ს წინააღმდეგ შევიტან _ თუ ვადები დარღვეულია, ისევ თქვენი წარმომადგენლის გამო, რადგან ტრაპაიძემ დრო ფუჭად დამაკარგვინა-მეთქი. სიტყვის თქმაც არ დამამთავრებინეს, 15 წუთში ახალი საჩივარი მზად იყო. წავედი ისევ სოციალურ სამსახურში, რომელმაც განიხილა საქმე და ნაწილობრივ დამაკმაყოფილა _ თანხის ანაზღაურებაზე უარი თქვეს და დაავალეს სოციალური მომსახურების ჩოხატაურის განყოფილების უფროს სპეციალისტს ოჯახის გადამოწმება. მოვიდა უფროსი სპეციალისტი, მაგრამ რად გინდა _ ოთახების რაოდენობაში იწერება მხოლოდ საცხოვრებელი ოთახები, რაც ორია ამ სახლში, მან კი სამზარეულოც მიათვალა. საერთოდ თუ გავს რომელიმე ოთახი ოთახს?! თქვენც ხომ ხედავთ, არაფერ გვაბადია _ არც ტელევიზორია, არც მაცივარი. მეუღლე მეორე ჯგუფის შეზღუდული შესაძლებლობის მქონე პირია, პენსიონერი და მისი პენსიის იმედად ვართ. ადრე ვმუშაობდი, ქირაზეც დავდიოდი, ახლა აღარ შემიძლია. ცალ თვალში მხედველობა საერთოდ გამიქრა, ჩემს მეუღლეს მთელ სხეულზე სოკოვანი დაავადება აქვს. პენსიის თანხა მის წამლებსაც არ ყოფნის. ადამიანმა რომ იცხოვროს, რაღაც ცოტა მაინც ხომ უნდა ჭამოს?!”

როგორც შოთა ბოლქვაძემ გვითხრა, სოციალურ დახმარებაზე უარის თქმის ერთ-ერთი საფუძველი ოჯახს გარეთ მცხოვრები შვილები არიან:

“ორი ბიჭი გარდამეცვალა, გოგოები გათხოვდნენ. ახლა მეუბნებიან, რომ თქვენს ფაქტობრივ დამხმარეებად ითვლებიან შვილებიო. ამას რომ ამბობ, ჯერ გაიგე, თუ შეუძლია დახმარება, როგორ ცხოვრობენ და სად _ ორივე უმწეობის დახმარებას იღებს და მე როგორ დამეხმარებიან?! თუმცა, როცა გათხოვდნენ, მე თითონ შევიტანე განცხადება ოჯახის წევრის ცვლილების შესახებ სააგენტოში და მოვითხოვე გადამოწმება. გადამოწმების შემდეგაც ვიღებდი დახმარებას”.

ბოლქვაძე განმარტებას ითხოვს, სხვადასხვა დროს, სხვადასხვა აგენტის მიერ შევსებულ, მისივე თქმით, იდენტურ დეკლარაციებში რატომ მიენიჭა მის ოჯახს სხვადასხვა სარეიტინგო ქულა:

“სამმა აგენტმა გადაამოწმა ოჯახის მდგომარეობა სხვადასხვა დროს, დეკლარაციაც ასლებივით ჰგავს ერთმანეთს, თუმცა, სარეიტინგო ქულა, რომლითაც სოციალური დახმარება უნდა მივიღოთ, ყოველთვის ზღვარს ზემოთაა, თან სამივე განსხვავებულია. მაინტერესებს, აბსოლუტურად ერთნაირი დეკლარაციები რატომაა შეფასებული სხვადასხვა ქულით?! _ ამ კითხვით ჯანმრთელობის სამინისტროსაც კი მივმართე. თუმცა, რეაგირება არც ამჯერად ყოფილა. ახლა თქვენ მოგმართეთ, იქნებ, მედიაში გასული ამ კითხვის შემდეგ მაინც მივიღო პასუხი და ვინმემ ყურადღება მომაქციოს. მოვითხოვ სოციალური დახმარების იმ თანხის ანაზღაურებას, რაც ამ წლებში უნდა მიმეღო და სოციალურად დაუცველის სტატუსის მონიჭებას”, _ გვითხრა ბოლქვაძემ.

შოთა ბოლქვაძის ოჯახის საკითხთან დაკავშირებით “გურია ნიუსმა” კომენტარი ითხოვა სოციალური მომსახურების სააგენტოსგან. წერილში, რომელიც ჩვენი შეკითხვის პასუხად მივიღეთ, ნათქვამია, რომ ოჯახის გადამოწმებისას დეკლარაცია გაცნობილ იქნა უფლებამოსილი პირისთვის, კერძოდ, შოთა ბოლქვაძისთვის და დეკლარაციაში შეტანილი მონაცემები დადასტურებულია მისივე ხელმოწერით:

“ოჯახი სოციალური დახმარების მიმღები იყო 2008 წლის ივნისიდან 2017 წლის მარტის ჩათვლით.

2017 წლის აპრილში, გრაფიკის მიხედვით მოხდა გადამოწმება. ოჯახს მიენიჭა ქულა 65 230. შესაბამისად, ქულის ოდენობიდან გამომდინარე, შეუწყდა სოცდახმარება. 2018 წლის აპრილში ოჯახის განმეორებითი განცხადების საფუძველზე ოჯახი კვლავ გადამოწმდა და მიენიჭა 85 220 ქულა, რომელიც არ იძლევა სოციალური დახმარების დანიშვნის საფუძველს. ოჯახის გადამოწმების დროს ოჯახის დეკლარაცია გაცნობილ იქნა უფლებამოსილ პირისთვის, კერძოდ, შოთა ბოლქვაძისთვის და დეკლარაციაში შეტანილი მონაცემი დადასტურებულია მისივე ხელმოწერით. დეკლარაციები მუშავდება დადგენილი მეთოდოლოგიით, გამოითვლება სარეიტინგო ქულა და ქულის ოდენობა არ განისაზღვრება რაიონული განყოფილების მიერ. ბენეფიციარს წერილობით აღნიშნულთან დაკავშირებით ეცნობა რაიონული განყოფილების მიერ მ/წ 21 ივნისს.

რაც შეეხება დეკლარაციების იდენტურობას, იდენტური ვერ იქნებოდა, რადგანაც შემოწმებულია სხვადასხვა დროს და სხვადასხვა აგენტის მიერ”, _ წერია სააგენტოს პრესსამსახურიდან მოწოდებულ ინფორმაციაში.

მუნიციპალიტეტის მერი, ირაკლი კუჭავა ამბობს, რომ ბოლქვაძეს მუნიციპალიტეტმა რამდენჯერმე გაუწია დახმარება. იმავეს ამბობს მერის წარმომადგენელი სოფელ ჯვარცხმაში ავთანდილ შარაშენიძე:

“შოთა ბოლქვაძეს მუნიციპალიტეტი რამდენჯერმე დაეხმარა. სახურავიც გამოუყო, მე თავად მივუტანე, მაგრამ ჯერაც არ გამოუყენებია. არანაირ დახმარებაზე ბოლქვაძისთვის უარი არ გვითქვამს”, _ ამბობს “გურია ნიუსთან” საუბრისას ავთანდილ შარაშენიძე.