ოზურგეთში, ცნობილი “კუბოქოთნების” თემა, რომელიც ბოლო სამი წელია აქტუალურია, კვლავ ყოველდღიური საუბრებით განახლდა “ჭადრების ბაღში“. ადგილობრივი მცხოვრებლები ხშირად საუბრობენ მისი გატანის აუცილებლობაზე.
არაერთი მოქალაქე ამბობს, რომ მოახლოებული ადგილობრივი თვითმმართველობის არჩევნების წინ, ეს უპირველესი მოთხოვნა იქნება _ გაიტანონ ეს ჟანგიანი ყუთები აქედან და საუკეთესო წიწვოვნები თუ ყვავილოვანი ხემცენარეები განალაგონ ან აქ, ან ისეთ სახალხო სივრცეში, როგორიც ოზურგეთს უამრავი აქვს.
_ კი, მაგრამ, რად უნდა ამას არჩევნების მოახლოება? რა საარჩევნო საკითხი ეს არის? რა თქვას ზოგმა, არ იცის… უბრალოდ, არ აიღებენ! თორემ სულ ვესაუბრებით სხვადასხვა პასუხისმგებელ პირებს. ახლახანაც გვქონდა საუბარი ერთ პასუხისმგებელ პირთან. გვითხრა, რომ აიღებენ. ეს დაპირება უკვე სამი წელია გვესმის. ძალიან მოსწონთ, ეტყობა, ეს კუბოები და უბრალოდ, არ აიღებენ, ასე ვფიქრობ. აბა, რა უნდოდა ამის გატანას, რომ სამ წელიწადში არ მოხერხდა? _ ამბობს ოზურგეთელი ვასიკო ჩხაიძე.
როგორც გვახსოვს და ამ თემას “გურია ნიუსმა” მრავალი სტატია მიუძღვნა, ეს ხალხის მიერ “კუბოქოთნებად” შერაცხული რკინის კონსტრუქციები ევროკავშირის მიერ გამოყოფილი დახმარების ფარგლებში გაკეთდა. მაშინ 200 მილიონი ლარი გამოიყო საპილოტე რეგიონებისთვის, მათ შორის, გურიისთვის. გვახსოვს ისიც, რომ საპილოტე რეგიონებს შორის, ყველაზე მეტი დაფინანსება მიიღო ოზურგეთმა. მერე სპეციალურმა კომისიამ განსაზღვრა, რომ ამ პროგრამის ფარგლებში დაფინანსებულიყო ქალაქ ოზურგეთის ცენტრალური მოედნისა და მიმდებარე პარკის რეაბილიტაცია.
ოზურგეთის თეატრალური მოედანი, რომელიც ზვიად გამსახურდიას სახელს ატარებს, მიმდებარე “ჭადრების ბაღით”, უმნიშვნელოვანესი ადგილია ოზურგეთისთვის. მიუხედავად იმისა, რომ მისი კეთილმოწყობისთვის, ყველა დროის ხელისუფლება ასი ათასობით ლარს ხარჯავდა, ტერიტორია სრულფასოვნად მაინც არ მოწესრიგდა.
დღეს ხალხი უკვე ღიად საუბრობს, რომ მიუხედავად არაერთხელ განახლებისა, ამას ყველა სჯობდა, რაც წინა ხელისუფლებების დროს გაკეთებულა კონკრეტულად ამ სივრცეში:
_ მე არაერთხელ გამოვთქვი თქვენთან ჩემი აზრი ამ საკითხზე და ახლაც ამ პოზიციაზე ვარ! რა მიკვირს, იცით? რაც ლამაზი იყო, რასაც ეს საუცხოო ჭადრების ბაღი ჰქვია, სრულიად იგნორირებულია და დაიფარა, დაიმალა ამ პროექტის გახორციელების შემდეგ! რაც ლამაზია, არ ჩანს! არადა, პროექტი ხომ იმიტომ გახორციელდა, რომ უკეთესი გამხდარიყო ეს სივრცე? სტუმარი თუ ნებისმიერი აქ ჩამვლელი ხედავს მხოლოდ ჟანგიან რკინის კონსტრუქციებს, რომელშიც ჩარგულია საუცხოო მცენარეები. მომკლა ამათმა საცოდაობამ. თითქოს, შველას ითხოვენ, ტოტებგაფარჩხული… აბა, მე ყოველდღე დავდივარ ამ პარკში და კი ვხედავ შიდა სივრცეში რა სილამაზეა. სტუმარი და გამვლელი კი ვერაფერს ხედავს, უფრო სწორად, ხედავს კუბოებს! ეს ყველაფერი ასე დამახინჯდა. თეატრის წინ, წლის მანძილზე, არაერთი ღონისძიება ტარდება და ჩანს მხოლოდ ეს კუბოები. ხალხი ზედ ადის, ბავშვები უფრო, ითელება ირგვლივ ყველაფერი. არც ბაღში მდებარე შადრევანი ჩანს… საერთოდ სიმახინჯეა ეს, მეტი არაფერი და გაიტანონ აქედან. ეს მცენარეებიც გაანაწილონ, აქაც და სხვაგანაც არის პარკი. ადგილის მეტი რაა ოზურგეთში. არც ისე რთულია ამის მოხერხება და გაიტანონ. ადრე თუ გვიან, ამას აქ მაინც აიღებენ და რაც ნაკლებად დააგვიანებენ გადატანას, მით უკეთესი, _ გვეუბნება ოზურგეთის მკვიდრი, ჭავჭავაძის ქუჩის მცხოვრები ლილი დოლიძე და დასძენს, რომ ის უამრავი ადამიანის აზრს ახმოვანებს:
_ ამ პროექტის მაქებარი ჯერ არავინ მინახავს. დაიღალა ხალხი ამ კუბოებზე საუბრით, _ გვითხრა მან.
როგორც ჩვენ ვწერდით ჭადრების ბაღის “ბიოგრაფია” ასეთია:
ბაღის გაშენება გურიის ერთ-ერთ უკანასკნელ მთავარს მამია მეხუთე გურიელს (გურიის მთავარი 1809-1826 წწ) სახელს უკავშირდება. როგორც ამბობენ, იგი ამჟამინდელი “ჭადრების ბაღსა” და “სამკუთხა ბაღის”, ასევე, მინიმუმ, თეატრისწინა მოედნის, თეატრის და მის მიმდებარე ტერიტორიას მოიცავდა. სწორედ ამ სამთავრო ბაღში, შოტლანდიელი აგრონომის იაკობ მარის რჩევით დაირგო პირველი ჩაის ბუჩქი 1809 წელს. 15-წლიანი შრომით, მარმა განაახლა რუსი ჯარისკაცების მიერ აჩეხილი ბაღი, გააშენა ლიმონის, ფორთოხლის და სხვა სუბტროპიკული მცენარეების ნერგები. აქვე გამოიცადა “იზაბელას” პირველი ნერგები. საბჭოთა ოკუპაციის შემდეგ, პირდაპირ ბაღის ტერიტორიაზე გაჭრეს ქუჩები, ერთიანი “მთავრის ბაღი” კი სამად გაყვეს და სახელებიც შესაბამისი მიანიჭეს: ლენინის, სტალინის (ახლანდელი “სამკუთხა ბაღი”) და ბერიას ბაღები. 1937 წელს ახლანდელი “ჭადრების ბაღის” ტერიტორიაზე ჭადრის ხეები დარგეს; ზოგი წყაროს ცნობით, ნარგავებს ჩაქუჩ-ნამგლის ფორმა მისცეს, ზოგის მიხედვით კი ასობგერა “მ”-ს _ ფილიპე მახარაძის გვარის საპატივცემულოდ. მანამდე კი, 1934 წლის 27 ივლისის სსრ კავშირის ცაკ-ის დადგენილებით, ქალაქს, სადგურს და მთელ რაიონს ფილიპე მახარაძის პატივსაცემად მახარაძე ეწოდა. დიდი რეკონსტრუქცია ამ ტერიტორიამ 50-იან წლებშიც განიცადა: მოედანი გადააკეთეს, დიდი კვარცხლბეკი წამოჭიმეს და ზედ იოსებ სტალინის ძეგლიც დადგეს, მაგრამ მისი გახსნა 1954 წელს, ბელადის გარდაცვალების მერე მოხდა, პიროვნების კულტის და სტალინის დაგმობის გამო კი, ძეგლის დადგმისთანავე… აღება მოუხდათ! უნდა აღინიშნოს, რომ სწორედ ამ ბაღში მდგარი ეკლესიის ეზოში, კონკრეტულად არავინ იცის სად, 1911 წელს დაკრძალეს ჩოხატაურელი წმინდანი, ქართული საგალობლების გადამრჩენი ფილიმონ ქორიძე, რომელიც ეკლესიისა და სამშობლოს წინაშე გაწეული ღვაწლისა და თავდადებისთვის, საქართველოს ეკლესიის წმიდა სინოდმა, 2011 წლის 20 დეკემბერს წმინდანთა დასში შერაცხა, წოდებით _ წმიდა ფილიმონ მგალობელი, ერისთვის თავდადებული.
სწორედ ამიტომ მიიჩნევენ ოზურგეთელები, რომ ამ ბაღის ისტორია, ქვეყნის ისტორიის საპირწონე თუ არა, ძალიან მსგავსია და მისი რეაბილიტაცია-მოწესრიგება, ნებსით თუ უნებლიეთ, კუბოებთან არ უნდა ასოცირდებოდეს!
სამი წლის წინ, როცა ოზურგეთის მერიამ ტენდერი გამოაცხადა (2022 წლის 1 ივნისი) მისი სავარაუდო ღირებულება 2,157,146 ლარი იყო. ტენდერში სამი კომპანია მონაწილეობდა, რომელთაგან ყველაზე დაბალი ფასი _ 1,941,333 ლარი დააფიქსირა კომპანიამ _ შპს “მანგისტაუ ინფრასტრუქტურა სტროი-1-ს ფილიალი საქართველოში”.
თუმცა, ოზურგეთის მუნიციპალიტეტის მერიის მიერ, მოხდა ამ კომპანიის დისკვალიფიცირება და გაიმარჯვა შპს “ჯორჯიან სთოუნმა”, რომელთანაც 2022 წლის აგვისტოში ხელშეკრულება გაფორმდა. მას უნდა შეესრულებინა მილიონ 955 555 ლარის სამუშაოები ხუთ თვეში. ეს სამუშაოები 2023 წლის იანვარში უნდა დასრულებულიყო.
მოგვიანებით, კომპანიამ ხარჯის 10 პროცენტით გაზრდა მოითხოვა. ამ თანხის დამატება ოზურგეთის მუნიციპალიტეტის ბიუჯეტიდან მოხდა და ჯამმა, 2 მილიონ 151 000 ლარი შეადგინა.
ფასის ზრდის მიზეზად მაშინ სამუშაოების შესრულების დროს გამოკვეთილი “გაუთვალისწინებელი გარემოებები” დასახელდა.
განსაზღვრულ ხუთ თვეში, ანუ 2023 წლის იანვარში არ მოხერხდა სამუშაოების დასრულება. მშენებელ ორგანიზაციას სამუშაოების დასრულების ვადა 2023 წლის 18 აპრილამდე გადაუვადეს, თუმცა, სამუშაოები ზაფხულამდე გაჭიანურდა და როგორც იქნა, დაგვიანებით, მაგრამ მაინც დასრულდა ამ ფორმით.
მას შემდეგ ამ “კუბოქოთნებზე” საუბარი, საყვედური, ქილიკი არ შემწყდარა. თუმცა, ჯერჯერობით, ადგილზე დგას ყველა ქოთანი, რაც, თვით არაერთ საჯარო მოხელეს არ მოსწონს. და დღეს ჩვენთან კერძო საუბარში გულღიად აღუნიშნავთ.
“კუბოქოთნების” გარდა, აქ სხვა ფორმის საყვავილე დაბალი ქოთნებიც არის განლაგებული, რაზეც მოსახლეობას პროტესტი არ გამოუხატავს და მოეწონა.
დღემდე უცნობია კონსტრუქციების პროექტის ავტორის ვინაობა, მიუხედავად ხალხის მიერ არაერთგზის მოთხოვნისა, ეთქვათ, ვის მოუვიდა აზრად ასეთი სიმახინჯის შექმნა.
_ ალბათ, კარგი უნდოდა და ცუდი გამოვიდა. შეცდომა ხდება, თუმცა, აღიარებაც არაა სირცხვილი და გაიტანონ ეს აქედან, _ ამბობს ოზურგეთელი ავთანდილ ბერიშვილი.
_ სოფლიდან რომ ჩამოვდივარ, რაღაც საქმეზე და აქ გავლა მიხდება, მექანიკურად ჭადრების ბაღში ვჯდები. გულს უხარია, სივრცეს ვხედავდით. ახლა ეს რაა? აუცილებლად გასატანია. თეატრის მოედანი ოზურგეთის სახეა და იქ ეს ჟანგიანი კონსტრუქციები არ უნდა იყოს, _ გვეუბნება რეზო თავაძე.
“გურია ნიუსს” დღემდე არაერთი მოქალაქე მომართავს, ახლა კი, ადგილობრივებმა ნატალია დოლიძემ, ავთო ბერიშვილმა, ნუკრი ჭეფხოძემ, ლილი დოლიძემ და სხვებმა კიდევ ერთხელ შეგვახსენეს, რომ ვიდრე ეს ქოთნები აქედან არ გაუტანიათ, თუნდაც ასჯერ უნდა დაიწეროს. ეს ჩვენი თხოვნაც არის და მოთხოვნაცო.
მკითხველს შევახსენებთ, რომ მოქალაქეების ასეთი პოზიციის გამო იყო, რომ პროექტის დასრულების მომდევნო თვეებში ოზურგეთის მუნიციპალიტეტის მერმა, ავთანდილ თალაკვაძემ განცხადება ოფიციალურად გააკეთა. ეს გავრცელებული იყო სოციალურ ქსელში და ასევე წერდა “გურია ნიუსი”:
“ჩემო ძვირფასო თანამოქალაქეებო, ჩემო ოზურგეთელებო, რა თქმა უნდა ყველას გვინდა ჩვენი ქალაქი იყოს მაქსიმალურად ლამაზი, ჯანსაღი და თანამედროვე. მოგეხსენებათ, ბოლო პერიოდში ჩვენი ქალაქის განახლებისთვის ძალიან მნიშვნელოვანი პროექტები მომზადდა და ხორციელდება, მათ შორის, თეატრთან მდებარე ცენტრალური მოედნის რეაბილიტაციის პროექტი.
ეს არის ადგილი, რომელიც არა ერთ საინტერესო, საზეიმო ღონისძიებას და ფესტივალს უმასპინძლებს. სამწუხაროდ, სამუშაოების დასრულებამდე, ერთი დეტალი _ კერძოდ საყვავილეების ჯერ კიდევ დაუსრულებელი იერსახე, გახდა აქტიური განხილვის თუ კრიტიკის საგანი.
ჩვენი სურვილია, ნებისმიერი პროექტი, რაც მუნიციპალიტეტის განვითარებას ემსახურება, იყოს ცალსახად დადებითი ემოციების მომტანი.
აქედან გამომდინარე, თავს ვალდებულად ვთვლით, ქალაქის განახლების და რეაბილიტაციის სამუშაოების დასრულებამდე, წინსწრებად შეგატყობინოთ, რომ საბოლოო იერსახეს ეს მოედანი შემოდგომაზე მიიღებს, როცა მისი ყველა კომპონენტი, მათ შორის საყვავილეები, საუკეთესო ფორმით გაკეთდება, გამწვანდება და შეიღებება.
გურულების მდიდარი ფანტაზია, სხარტი იუმორი და ენამოსწრებულობა მარადიულია, როგორც მარადიულია ჩვენი ოზურგეთი, სადაც თითოეული მოქალაქის კომფორტზე და დასვენებაზე ზრუნვა ჩვენი საპატიო ვალდებულებაა“, _ განაცხადა მაშინ ოზურგეთის მუნიციპალიტეტის მერმა.
თუმცა, მას შემდეგ სამი შემოდგომა გავიდა და ეს ქოთნები ისევ დგას.
“გურია ნიუსი” ოზურგეთის მუნიციპალიტეტის მერიის ინფრასტრუქტურის სამსახურის უფროსს, გოჩა აბაშმაძეს დაუკავშირდა:
“ალბათ, მოხდება ამ ქოთნების გატანა. კი, იყო მერის დაპირება და საუბარიც იყო ამაზე, ალბათ, გაიტანენ“, _ მოკლედ გვითხრა მან.
ჩვენ ამ თემას კვლავ მივუბრუნდებით, რადგან დიდია ოზურგეთის საზოგადოების ინტერესი და მოთხოვნა, “ჭადრების ბაღის” სივრციდან გაიტანონ ეს კონსტრუქციები.
ავტორი
