შინაგან საქმეთა სამინისტროს მიერ მომზადებული კანონპროექტის ამოქმედების შემთხვევაში, ე.წ. კანონიერ ქურდებს საქართველოს საზღვრის გადაკვეთისას დაუყოვნებლივ დააკავებენ და მათ დანაშაულში მონაწილეობაზე მტკიცებულებებს წარადგენენ, – ამის შესახებ ბრიფინგზე შს მინისტრის მოადგილემ, ნათია მეზვრიშვილმა განაცხადა.
„საქართველოში საზღვრის გადმოკვეთის შემდეგ, ე.წ. კრიმინალურ ავტორიტეტს დაუყოვნებლივ დავაკავებთ. დაკავებთ მაშინაც თუ დავადასტურებთ, რომ ამ ადამიანებს რაიმე ფორმით გავლენა აქვთ მოხდენილი საქართველოში, მაგალითად, დანაშაულებრივ საქმიანობაზე, ან მონაწილეობა აქვთ მიღებული თუნდაც ელექტრონული კომუნიკაციით რაიმე დანაშაულში. ჩვენ გვჭირდება მტკიცებულებები, რათა დადგეს გამამტყუნებელი განაჩენი… მხოლოდ აღიარების საფუძველზე პირი ვერ დაისჯება. მტკიცების მიმართულებით ჯერ კიდევ არსებული კანონმდებლობა პრობლემებს ქმნიდა. თუ გვექნება აღიარებასთან ერთად მტკიცებულებების ერთობლიობა დადგება პასუხისმგებლობის საკითხი“, – განაცხადა ნათია მეზვრიშვილმა.
მინისტრის მოადგილემ იმედი გამოთქვა, რომ ახალი პროექტის ამოქმედების შემდეგ ეგრეთ წოდებული “კანონირი ქურდების” მიმართ გამოტანილი გამამტყუნებელი განაჩენების სტატისტიკა გაიზრდება.
ე.წ. კანონიერ ქურდებს საქართველოში საზღვრის გადმოკვეთისთანავე აკავებდნენ კანონიერი ქურდობის ბრალდებით. ამ მუხლით დაკავებულების დიდი ნაწილი 2014 წლიდან სასამართლოს გამამართლებელი განაჩენით ტოვებდა, რადგან, როგორც სფეროზე მომუშავე ექსპერტები ამბობენ, ბრალდების მხარეს მხოლოდ აღიარებითი ჩვენებით, ან სტატუსით – „კანონიერი ქურდი“ დანაშაულის მტკიცება უჭირდა.
მხოლოდ 2017 წლის განმავლობაში 10-დან 9 ე.წ. კანონიერი ქურდი გამართლდა.
საქართველოს შინაგან საქმეთა სამინისტრომ მოამზადა საკანონმდებლო პაკეტი, რომლის მიხედვითაც ე.წ. ქურდულ სამყაროსთან მიმართებაში დასჯადი პირების წრე ფართოვდება.
საკანონმდებლო ცვლილებები ქურდული სამყაროს საქმიანობის მხარდაჭერას, ქურდული შეკრების ორგანიზებას და ქურდული სამყაროს წევრისთვის, ასევე კანონიერი ქურდისთვის მიმართვას დანაშაულად აცხადებს, ასევე ამკაცრებს სასჯელს ქურდული სამყაროს წევრობასა და კანონიერი ქურდობისთვის.
საკანონმდებლო ცვლილებების შედეგად, „კანონიერ ქურდობაზე“ თავისუფლების აღკვეთა 9-დან 15 წლამდე იქნება, ნაცვლად ამჟამად მოქმედი 7-დან 10 წლამდე თავისუფლების აღკვეთისა.
უწყების ცნობით, ცვლილებები ასევე გავრცელდება „ქურდული სამყაროს“ წევრობაზე, რაზეც თავისუფლების აღკვეთა ნაცვლად 5-დან 8 წლამდე, იქნება 7-დან 10 წლამდე.
