ევროკავშირი რუსი ოპოზიციონიერის ალექსეი ნავალნის “ნოვიჩოკით“ მოწამლვის გამო, ექვს რუს თანამდებობის პირს სანქციებს უწესებს. ამის შესახებ ინფორმაციას independent ავრცელებს.
გამოცემის ინფორმაციით, ექვს კაციან სიაში მოხვდნენ რუსეთის უსაფრთხოების ფედერალური სამსახურის დირექტორი, ალექსანდრ ბორტნიკოვი და კრემლის პოლიციის უფროსი, ყოფილი პრემიერ-მინისტრი, სერგეი კირიენკო, თავდაცვის მინისტრის მოადგილეები – პაველ პოპოვი და ალექსეი კრივორიუჩკო, პრეზიდენტის დიპლომატიური წარმომადგენელი, სერგია მენიაილოსი და კრემლის წარმომადგენელი, ანდრეი იარინი.
როგორც independent წერს, ევროკავშირის სასანქციო სიაში ასევე მოხვდა ორგანიზაცია ორგანული ქიმიისა და ტექნოლოგიის სახელმწიფო სამეცნიერო კვლევითი ინსტიტუტიც (GosNIIOKhT). სანქციების თანახმად, ევროკავშირში მოქმედ ბიზნესებს აღნიშნულ ინსტიტუტთან რაიმე სახის კავშირი ეკრძალებათ.
გარდა ამისა, ევროკავშირის მიერ დაწესებული შეზღუდვები ითვალისწინებს ევროკავშირის ტერიტორიაზე შესვლის აკრძალვასა და ევროპულ ბანკებში ფინანსური აქტივების გაყინვას.
როგორც ცნობილია, 13 ოქტომბერს ლუქსემბურგში გამართულ შეხვედრაზე ევროკავშირის მინისტრები ალექსეი ნავალნის მოწამვლის გამო რუსეთის სანქცირებაზე შეთანხმდნენ.
ცნობისთვის, რუსი ოპოზიციონერი და პუტინისა და კრემლის კრიტიკოსი, ალექსეი ნავალნი, საავადმყოფოში უგონო მდგომარეობაში 20 აგვისტოს მოათავსეს. ნავალნის ოჯახის წევრები ამტკიცებენ, რომ ოპოზიციონერი პუტინის დაკვეთითაა მოწამლული. თავის მხრივ, კრემლი ამ ბრალდებას უარყოფს.
