ლანჩხუთში, ქალაქის ცენტრალურ ნაწილში გურიელის ქუჩა ერთ-ერთია, სადაც მოუწესრიგებელი ინფრასტრუქტურა აქაურ მცხოვრებთა მთავარი თავსატკივარია და როგორც თავად ამბობენ, წლებია, არავის უზრუნია აქ არსებული პრობლემის მოგვარებაზე.
მოსახლეობის თქმით, დაპირება ხელისუფლების მხრიდან, რომ გურიელის ქუჩაც მოხვდებოდა იმ ქუჩათა ნუსხაში, სადაც ინფრასტრუქტურული სამუშაოები გახორციელდებოდა ჯერ კიდევ ერთი წლის წინ მიიღეს, თუმცა, ჯერჯერობით, ისევ ძველებურადაა ყველაფერი.
“ყველაზე მეტად რაც გვაწუხებს, ეს საკანალიზაციო სისტემის არარსებობაა. წვიმის მოსვლის გვეშინია _ ფეკალიებით ივსება ეზოები. აქ გასული წლის ზაფხულში იყვნენ მოსულები მერიის წარმომადგენლები და უშუალოდ მათგან მივიღეთ დაპირება, რომ კანალიზაციის პრობლემას მოგვიწესრიგებდნენ, მაგრამ მოტყუებულები დავრჩით _ ახლა ამბობენ, არაო. თურმე, სანიაღვრე არხის გაკეთება გადაწყდა ჩვენს ქუჩაზე. გვეუბნებიან, საკანალიზაციო სისტემის გაყვანა სირთულეებთანაა დაკავშირებულიო. არადა, აქვე ჩვენი ქუჩის კვეთაზე გადის კანალიზაციის მთავარი სისტემა და არანაირ პრობლემას არ ქმნის მასთან ახალი ხაზის მიერთება.
ამ რამდენიმე ოჯახს, რომლებიც ხელისუფალთაგან მოძულებულ გურიელის ქუჩის მონაკვეთს შემოვრჩით, რამდენიმეს ეზოში იმის ადგილიც აღარ დარჩა, რომ ტუალეტის ორმო ამოიღონ, ან თუ დარჩა, ეს ადგილი ქუჩის მხრიდან მიუწვდომელია”, _ ამბობენ გურიელის ქუჩის მცხოვრებლები.
როგორც ირკვევა, მოსახლეობამ მათ ქუჩაზე არსებულ პრობლემებთან დაკავშირებით საქმის კურსში მუნიციპალიტეტის წინამორბედი ხელმძღვანელობაც ჩააყენა, თუმცა ამაოდ: “მუნიციპალიტეტის წინა ხელმძღვანელის მოღვაწეობის დროსაც არაერთხელ ვითხოვდით, ამხელა ინფრასტრუქტურული სამუშაოების წარმოების პირობებში, ჩვენი პატარა მონაკვეთიც გაეთვალისწინებინათ. გვეუბნებოდნენ, ასფალტს ვერ დაგიგებთ, სანამ კანალიზაცია არ გაკეთდება, კანალიზაციის მოსაწესრიგებლად კი ქალაქისთვის საერთო პროექტია შესადგენიო, ესაო, ისაო და ამასობაში ლანჩხუთის ლამის ყველა ქუჩა და ყველა შუკა მოაასფალტეს… როგორი ხარისხით, ეს სხვა თემაა”.
გურიელის ქუჩის გულისწყრომა იმანაც გაამძაფრა, რომ კანალიზაციის ახალი ხაზი მერიის გადაწყვეტილებით ქალაქის ერთ-ერთ ქუჩაზე გაყავთ, ამ დროს კი მათ უარი უთხრეს.
“გვაქვს უტყუარი ინფორმაცია, რომ მერიის ნებართვით და ორგანიზებით ქალაქ ლანჩხუთში, ებრალიძის ქუჩაზე გაჰყავთ კანალიზაციის ხაზი, რომელიც საერთო სისტემას შეუერთდება. ეს ფაქტი ტელეფონით საუბრისას დაგვიდასტურა კიდეც მერიის ინფრასტრუქტურის სამსახურის ხელმძღვანელმა ლევან ჩხაიძემ და თან “დაგვამშვიდა”, რომ ესაა ძალიან მოკლე მონაკვეთი, რომელიც დიდ დანახარჯებთან არ არის დაკავშირებულიო. როგორც ჩანს, მას ზომის საკუთარი სისტემა გააჩნია.
არადა, ჩვენი სათხოვარი ბევრად ნაკლებია იმაზე, რაც ებრალიძის ქუჩაზე კეთდება. ღმერთმა ხელი მოუმართოს იმ ხალხს, სულაც არ მიგვაჩნია, რომ სათანადო ყურადღებას არ იმსახურებენ ხელისუფლების მხრიდან _ მთავარია, ხელისუფლებაში “დაგუბაშებულმა” “კარგმა ბიჭებმა” თავიანთი საქციელით არ გვიბიძგონ კონფლიქტისკენ”, _ ამბობს ამ ქუჩის ერთ-ერთი მობინადრე ქეთევან ნაკაშიძე.
სხვათა შორის, ადგილზე მისულებს გურიელის ქუჩის მცხოვრებლებმა საცურაო აუზის მიმდებარედ დაზიანებული საკანალიზაციო სისტემა გვაჩვენეს, საიდანაც ფეკალური მასა ამოედინებოდა: “აი, ასეთი გამართული ინფრასტრუქტურაა ლანჩხუთში. ვითომ ჩვენი არ გვეყოფოდეს, ეს ფეკალიაც ჩვენი ჭიშკრების წინ, სანიაღვრე არხებში მიედინება.”
როგორც მერიის ინფრასტრუქტურის სამსახურის უფროსთან, ლევან ჩხაიძესთან საუბარში გავარკვიეთ, გურიელის ქუჩაზე ინფრასტრუქტურული სამუშაოების გახორციელების დაწყება უახლოეს დღეებშია დაგეგმილი და მერიის გადაწყვეტილებით, აქ სანიაღვრე არხები გაკეთდება. რაც შეეხება კანალიზაციის ხაზის გაყვანას და მის საერთო სისტემასთან შეერთებას, ჩხაიძე ამას საკმაოდ რთულ საქმედ მიიჩნევს.
როგორც ის ამბობს, ამ პრობლემის გადასაჭრელად მხოლოდ სურვილი არაა საკმარისი:
“ეს საკითხი საკმაოდ დიდ სირთულეებთანაა დაკავშირებული. ამ ქუჩაზე რომ კანალიზაციის ხაზი გავიყვანოთ, მაშინ მის მიმდებარედ ვადაჭკორიას ქუჩაზე ასფალტის საფარის დიდი ნაწილი უნდა აიყაროს. ამის გარდა, ისიც გასათვალისწინებელია, რომ კანალიზაციის მთავარი ხაზიც მოსაწესრიგებელია _ არის შემთხვევები, როცა იქედან ფეკალური მასები ამოდის.
ჩვენ გვქონდა ამაზე საუბარი შესაბამის სამსახურებთან, ავუხსენი კიდეც მოსახლეობას, თუ რა პრობლემებთანაა ეს დაკავშირებული, მაგრამ მათ ამის გაგება არ სურთ”, _ ამბობს ჩხაიძე.
