ამერიკის სურსათისა და წამლების ადმინისტრაციამ (FDA) ოთხშაბათს დაამტკიცა წონის კლების წამალი Zepboun. წამლის შემადგენელი აქტიური ნივთიერება ტირზეპატიდია. პრეპარატი, კომპანია Eli Lilly-ს მიერ არის წარმოებული.
წამალს, სახელად Mounjaro, რომელიც დიაბეტი 2 ტიპის სამკურნალოდ იყო დამტკიცებული, 2022 წლის მაისიდან დაერქმევა Zepbound წონის დაკლებისთვის.
აშშ-ის ბაზარზე პრეპარატი რამდენიმე კვირაში გამოჩნდება და შეუერთდება უკვე არსებულ წარმატებულ პრეპარატებს, Novo Nordisk-ის Ozempic-სა და Wegovy-ს. ახალ პრეპარატს დიდ წარმატებას უწინასწარმეტყველებენ.
ეს არის მედიკამენტების ახალი კლასის ნაწილი, რომელიც მოიცავს სემაგლუტიდს, ცნობილია როგორც Ozempic დიაბეტისთვის და Wegovy წონის დაკლებისთვის, რომელთა პოპულარობა ბოლო წლებში გაიზარდა.
Zepbound არის მეორე პრეპარატი სიმსუქნის მედიკამენტების ახალ კლასში, რომელიც დამტკიცებულია წონის დაკლებისთვის, Wegovy-ის შემდეგ.
,,ეს არის ალბათ ყველაზე ეფექტური მკურნალობა სიმსუქნის წინააღმდეგ საბრძოლველად ბარიატრიული ქირურგიის გარდა. მაგრამ ბევრისთვის, Mounjaro-ს პოვნა ძნელი იყო იმ წლის განმავლობაში, რაც ბაზარზე გამოვიდა.“ – თქვა დოქტორმა სკოტ ჰეგანმა, ვაშინგტონის უნივერსიტეტის მედიცინის ასისტენტმა პროფესორმა.
Zepbound-ის კლინიკურმა კვლევებმა აჩვენა, რომ იძლევა საშუალო წონის 20%-ზე მეტ დაკლებას უფრო მაღალი დოზებით 72 კვირის განმავლობაში, უფრო ძლიერი შედეგები, ვიდრე სხვა დამტკიცებული მედიკამენტებით. მოზრდილებს, რომლებსაც აქვთ სიმსუქნე ან აქვთ ჭარბი წონა წონასთან დაკავშირებული მინიმუმ ერთი მდგომარეობით, შეუძლიათ გამოიყენონ პრეპარატი, წონის ქრონიკული მართვისთვის.
JPMorgan-ის ანალიტიკოსთა პროგნოზით, წონაში კლების GLP-1 კატეგორიის პრეპარატების წლიური გაყიდვების მაჩვენებელი 2032 წლისთვის 140 მილიარდ დოლარს მიაღწევს და ბაზრის დომინანტები Eli Lilly და Novo Nordisk-ი იქნებიან.
Zepbound კვირაში ერთხელ, ინიექციის სახით კეთდება და განკუთვნილია იმ ჭარბწონიან პაციენტთათვის, რომლებსაც წონასთან დაკავშირებული სულ მცირე ერთი დაავადება მაინც აწუხებთ, მაგალითად, სისხლის მაღალი წნევა, მე-2 ტიპის დიაბეტი ან ქოლესტერინი.
„სიმსუქნე და ჭარბწონიანობა სერიოზული დაავადებებია და შეიძლება სიკვდილის გამომწვევი მიზეზიც გახდნენ, მათ შორის, გულის დაავადებების, ინსულტისა და დიაბეტის. მაშინ, როდესაც აშშ-ში სიმსუქნისა და ჭარბწონიანობის მაჩვენებლები იზრდება, ახალი პრეპარატის დამტკიცება მნიშვნელოვანია საჭიროების თვალსაზრისით“, — ამბობს FDA-ს წარმომადგენელი ჯონ შარეტსი.
Zepbound-ში შემავალი აქტიური ნივთიერება ტირზეპატიდი აქამდეც იყო დამტკიცებული სავაჭრო სახელით Mounjaro, რომელიც დიაბეტის საკონტროლებლად გამოიყენება და ასევე Eli Lilly-ის ნაწარმია.
კლინიკურ ცდაში 2500 ზრდასრული ადამიანი მონაწილეობდა; ისინი Zepbound-იღებდნენ, იცავდნენ დიეტას და ვარჯიშობდნენ. დაშვებული მაქსიმალური დოზის მიღებისას, წონის კლება საშუალოდ 22 კილოგრამი იყო, ყველაზე დაბალი დონის მიღებისას კი 15,4 კგ. პლაცებოს შემთხვევაში წონის კლება საშუალოდ მხოლოდ 3 კგ იყო.
ცდის დაწყებისას, მონაწილეთა საშუალო წონა 105 კგ იყო.
ზრდასრული ამერიკელების დაახლოებით 70 პროცენტი მსუქანი ან ჭარბწონიანია; დიეტისა და ვარჯიშის შედეგად სხეულის მასის 5-10 პროცენტის კლება დაკავშირებული აღმოჩნდა გულ-სისხლძარღვთა დაავადებების რისკის შემცირებასთან.
„ახალი პრეპარატი იმედს გაუჩენს მრავალ ჭარბწონიან ადამიანს, რომლებსაც ეს დაავადება ტანჯავთ და წონის მენეჯმენტის უკეთეს ვარიანტებს ეძებენ“, — ამბობს ორგანიზაცია Obesity Action Coalition-ის ხელმძღვანელი ჯო ნადგლოვსკი.
Zepbound-ის ფასი საკმაოდ მაღალია, ერთი თვის დოზა 1060 დოლარი ღირს.
მზარდი პოპულარობის მიუხედავად, აღმოჩნდა, რომ წონაში კლების პრეპარატთა ახალი კლასი, სახელად GLP-1, ამაღლებს კუჭ-ნაწლავის გარკვეულ პრობლემათა რისკს.
მათ შორის არის კუჭის პარალიზი, პანკრეატიტი და ნაწლავის გაუვალობა.
„მართალია, ეს გვერდითი ეფექტები იშვიათია, მაგრამ ამ პრეპარატთა ფართო მოხმარებიდან გამომდინარე, პაციენტებმა მაინც უნდა გაითვალისწინონ“, — ამბობს კანადის ბრიტანეთის კოლუმბიის უნივერსიტეტის მკვლევარი მოჰიტ სოდი.
FDA-ს განცხადებით, Zepbound-ის გვერდით ეფექტებს შორის არის ღებინება, ფაღარათი, ყაბზობა, მუცელში დისკომფორტი და ტკივილი, რეაქცია ნანემსარ ადგილზე, დაღლილობა, ალერგიული რეაქციები, ბოყინი, თმის ცვენა და გასტროეზოფაგური რეფლუქსური დაავადება.
The New York Times-ის სტატიის და ამერიკის სურსათისა და წამლების ადმინისტრაციის (FDA) მიერ გამოქვეყნებული ინფორმაციის მიხედვით.
ავტორი
