აშშ-ს და რუსეთის დელეგაციების შეხვედრა საუდის არაბეთის ქალაქ ერ-რიადში დასრულდა _ შეხვედრა ოთხსაათნახევარს მიმდინარეობდა.
რუსეთის პრეზიდენტის თანაშემწის იური უშაკოვის თქმით, შეხვედრაზე რუსეთ-უკრაინის ომის საკითხი განიხილებოდა.
„ჩვენ ეს თემა განვიხილეთ და ჩამოვაყალიბეთ ჩვენი ფუნდამენტური შეხედულებები. შევთანხმდით, რომ მომლაპარაკებელთა გუნდები ამ საკითხზე დაუკავშირდებიან ერთმანეთს“, _ თქვა უშაკოვმა.
მისი თქმით, განიხილეს ვლადიმერ პუტინისა და დონალდ ტრამპის შეხვედრის საკითხები: „ეს თემა განვიხილეთ, თუმცა, პრეზიდენტების შეხვედრა არ გაიმართება მომავალ კვირაში“.
უშაკოვის თქმით, საუბარი „ძალიან სერიოზული“ იყო, თუმცა, კითხვაზე, უახლოვდებიან თუ არა ერთმანეთს აშშ და უკრაინა, მან უპასუხა, რომ „ჯერ ამის თქმა ძნელია“, თუმცა, „ამაზე საუბარი იყო“.
აშშ-ს სახდეპის ოფიციალური წარმომადგენლის თემი ბრიუსის თქმით, ვაშინგტონი და მოსკოვი შეთანხმდნენ, რაც შეიძლება სწრაფად „შეიქმნას საკონსულტაციო მექანიზმები“ და ჩამოყალიბდეს შესაბამისი გუნდები, რომლებიც იმუშავებენ რუსეთ-უკრაინის ომის საკითხის გადაჭრაზე.
„ერთი სატელეფონო ზარი, რომელსაც მოჰყვება ერთი შეხვედრა, არ არის საკმარისი ხანგრძლივი მშვიდობის დასამყარებლად.
ჩვენ უნდა ვიმოქმედოთ და დღეს გადავდგით მნიშვნელოვანი ნაბიჯი წინ“, – განაცხადა სახელმწიფო დეპარტამენტის წარმომადგენელმა.
ამ შეხვედრიდან რამდენიმე ხანში, Fox News-მა გამოაქვეყნა ინფორმაცია, რომ “რუსეთმა და შეერთებულმა შტატებმა შეიმუშავეს სამეტაპიანი სამშვიდობო გეგმა რუსეთ-უკრაინის ომის დასასრულებლად”.
Fox News ირწმუნება, რომ “გეგმა გულისხმობს ცეცხლის შეწყვეტას, უკრაინაში არჩევნების ჩატარებას და მხოლოდ ამის შემდეგ საბოლოო სამშვიდობო შეთანხმებაზე ხელმოწერას”
“რუსეთი და შეერთებული შტატები უკრაინაში არჩევნებს განიხილავენ, როგორც “მოგვარების პროცესის წარმატების გასაღებს”, _ ამბობენ Fox News-ის წყაროები.
ეს პირობა, ტელეკომპანიის აზრით, გამოიწვევს დავას მხარეებს შორის:
„პუტინი მარიონეტული პრეზიდენტის არჩევის ალბათობას აფასებს, როგორც საკმაოდ მაღალს. იგი, ასევე დარწმუნებულია, რომ ნებისმიერი სხვა კანდიდატი, გარდა უკრაინის ამჟამინდელი პრეზიდენტისა, იქნება უფრო მოქნილი და მოლაპარაკებებისა და დათმობებისთვის მზადმყოფი.
თავის მხრივ, დონალდ ტრამპი მზადაა მიიღოს არჩევნების ნებისმიერი შედეგი, მათ, შორის პრორუსული მარიონეტის არჩევის შესაძლებლობაც“, _ ამბობს Fox News.
