გონიოში დატრიალებულმა ტრაგედიამ მთელი საზოგადოება შეძრა. საზოგადოებისთვის ცნობილია, ცენტრალურ საავტომობილო გზაზე მიმავალმა “ბმვ-ს” ავტომობილის საჭესთან მყოფმა მძღოლმა საჭე ვერ დაიმორჩილა და იქვე სახლთან გაჩერებულ სატვირთო ავტომობილს დაეჯახა. ეს უმძიმესი კადრები სოციალური ქსელითაც გავრცელდა.
- სამწუხაროდ შეჯახება იმდენად ძლიერი იყო, რომ “ბმვ-ს” მარკის მანქანაში მყოფი სამი ულამაზესი გოგონა, ანა მახარაძე, მეგი ჯაიანი და სალომე გორგაძე ადგილზე დაიღუპნენ, ხოლო მანქანაში მყოფი მძღოლი და კიდევ ერთი ბიჭი ავარიის დროს დაშავდა.
ისინი სასწრაფო სამედიცინო დახმარების ბრიგადამ კლინიკაში გადაიყვანა. მათგან ერთს მსუბუქი დაზიანება ჰქონდა, ხოლო მეორე ახალგაზრდას ოპერაცია დასჭირდა. შემთხვევის ადგილზე დიდხანს მუშაობდნენ ექსპერტ-კრიმინალისტები. ავარიის მიზეზად გადაჭარბებული სიჩქარე დასახელდა და სოციალურ ქსელში გავრცელებულ კადრებშიც ჩანს, როგორი სიჩქარით მიდის მანქანა.
უკვე ცნობილია, რომ სამართალდამცავებმა საჭესთან მყოფი ახალგაზრდა ბიჭი, აჩი დევაძე დააკავეს და მას პატიმრობაც შეეფარდა. უწყებამ ოფიციალური ინფორმაციაც უკვე გაავრცელა:
“გამოძიებით დადგინდა, რომ 14 ივნისს, ბრალდებულმა, რომელიც ბათუმიდან სარფის მიმართულებით გადაჭარბებული სიჩქარით მოძრაობდა, ვერ უზრუნველყო ავტომანქანის უსაფრთხო მართვა და გაჩერებულ სატვირთო ავტომობილს შეეჯახა. ავტოსაგზაო შემთხვევის შედეგად მიღებული დაზიანებებით ავტომანქანაში მყოფი სამი პირი გარდაიცვალა. დაკავებულს ბრალდება სისხლის სამართლის კოდექსის 276-ე მუხლის მე-8 ნაწილით (ავტომობილის მოძრაობის უსაფრთხოების წესის დარღვევა, რამაც ორი ან მეტი ადამიანის სიცოცხლის მოსპობა გამოიწვია) წარედგინა, რაც სასჯელის სახედ და ზომად 10 წლამდე თავისუფლების აღკვეთას ითვალისწინებს. პროკურატურის შუამდგომლობის საფუძველზე ბათუმის საქალაქო სასამართლომ ბრალდებულს აღკვეთის ღონისძიების სახით პატიმრობა უკვე შეუფარდა” – ნათქვამია უწყების მიერ გავრცელებულ განცხადებაში.
აჩი დევაძე ბათუმელი და ის ავარიის დროს გარდაცვლილი გოგონების მეგობარი იყო. მეგობრის, 19 წლის ანა მახარაძის მანქანის საჭესთან იჯდა იმ საბედისწერო დღეს.
“ძალიან დიდი ტრაგედიაა, სიტყვები არ მაქვს. მანქანა ანის ეკუთვნოდა, სხვა მანქანაც ჰყავდა მას და ეგ “ბმვ” თავისმა ძმამ უყიდა დაახლოებით ერთი თვის წინ. ანის სხვებისთვის მანქანის თხოვება არ უყვარდა, შეიძლება ითქვას, რომ სხვას არასდროს სვამდა საჭესთან. ამ გამონაკლისის გარდა. შემთხვევაც ბათუმიდან სარფისკენ მიმავალ გზაზე მოხდა. მეგობრები ერთად საყიდლებზე თურქეთში უნდა გადასულიყვნენ იმ კონკრეტულ დღეს.
ანის დედა სარფში მუშაობს და ანიც თითქმის ყოველ დღე გადმოდიოდა სარფში. ისიც ვიცი, რომ ქალაქიდან გასვლამდე ანი მართავდა მანქანას. ვფიქრობ გზაში გაჩერდნენ რამის საყიდლად და მაშინ მოხდა საჭესთან მძღოლის ცვლილება. საჭესთან ანას მეგობარი, აჩი დევაძე იჯდა. არ ვიცი რატომ დასვა ის საჭესთან. თავად ძალიან უყვარდა ავტომობილის მართვა. სხვებისთვის მანქანის თხოვება არ უყვარდა… დატრიალდა ეს საშინელი ტრაგედია. შოკირებული ვარ, ეს არ უნდა მომხდარიყო” – ამბობს ჩვენთან საუბარში 19 წლის ანა მახარაძის მეგობარი.
