რამდენიმე დღიანმა ძლიერმა ნალექმა პრობლემები შექმნა გურიის რეგიონში.
ირკვევა, რომ უხვი ნალექის შედეგად მეწყერი ჩამოწვა ლანჩხუთის მუნიციპალიტეტის სოფლების _ ღრმაღელე-ორმეთის დამაკავშირებელი გზაზე, რის გამოც, ლანჩხუთის საკრებულოს ოპოზიციონერი დეპუტატის, კახა ასკურავას ინფორმაციით, სოფელი გარკვეული დროის განმავლობაში მოწყვეტილი იყო მუნიციპალიტეტის დანარჩენ ნაწილს.
მოქალაქე თეონა გიორგაძის ინფორმაციით, საფრთხის შემცველია ჩოჩხათი–სუფსის დამაკავშირებელ გზაზე გადაადგილება.
“ჩოჩხათი-სუფსის გზაც ნახეთ. არა მგონია უსაფრთხო იყოს იქ გადაადგილება მანქანებით. 2 თუ 3 მონაკვეთია კატასტროფულად”, _ მოუწოდა მან მუნიციპალიტეტის ხელმძღვანელობას.
უხმა ნალექმა გადაადგილების მხრივ პრობლემები შეუქმნა სოფელ ჭანჭათის მოსახლეობასაც, სადაც არაერთი წელია მოუგვარებელია საგზაო ინფრასტრუქტურა და აქაურებისთვის ერთ-ერთ მნიშვნელოვან თავსატეხს წარმოადგენს.
“ცოტაც და, ჭანჭათი ქართული ვენეცია იქნება. მოვინატრებთ ცხონებულ მენავე ლადიკო ვადაჭკორიას თავისი ბრტყელძირიანი ნავით”, _ წერენ ჭანჭათელები სოციალურ ქსელში და ფაქტის დასტურად სოციალურ ქსელში დატბორილი გზის ფოტოსაც აქვეყნებენ.
“ეს მონაკვეთი გასული სტიქიის დროს დაზიანდა და დღემდე არაფერი გაკეთებულა. მოვიდა არჩევნები და ისევ ტენდერის მოლოდინში ვართ”, _ განმარტავს ჭანჭათის მკვიდრი გიგა ვადაჭკორია.
მოსახლეობისვე ინფორმაციით, რამდენიმედღიანმა უხვმა ნალექმა საგზაო ინფრასტრუქტურის კუთხით პრობლემები შექმნა მამათის ადმინისტრაციულ ერთეულშიც, სადაც ამ მხრივ სახარბიელო მდგომარეობა არც მანამდე იყო.
“წაიღო წყალმა გზები. ისედაც არ იყო, ახლა ხომ ლაპარაკიც ზედმეტია. პატრონი არავინაა!”
ლანჩხუთის მერიის ინფორმაციით, გადაუღებელი ძლიერი წვიმების შედეგად ლანჩხუთის მუნიციპალიტეტში დაზიანებულია ინფრასტრუქტურის ნაწილი, დატბორილია საყანე ფართობები, დაზიანებული და დატბორილია საცხოვრებელი სახლები.
“მერიაში შექმნილია საგანგებო შტაბი, ყველა სამსახური ჩართულია და მობილიზებულია მოსახლეობის დასახმარებლად.
ჩოჩხათის, სუფსისა და ღრმაღელის ადმინისტრაციულ ერთეულებში ლანჩხუთის მერი ალექსანდრე სარიშვილი მოადგილე თორნიკე ტიკაძესთან ერთად იმყოფებოდა, მოსახლეობას შეხვდა და ადგილზე დაათვალიერა სტიქიისაგან მიყენებული ზარალი.
რამდენიმე სოფელში ჩამოწოლილია მეწყერი და დაწყებულია აღდგენითი სამუშაოები, რომელიც მომდევნო დღეებშიც გაგრძელდება”, _ განმარტავენ ლანჩხუთის მერიაში.
ლანჩხუთის მსგავსად პრობლემები შეიქმნა ჩოხატაურშიც.
როგორც „გურია ნიუსს“ მუნიციპალიტეტის მერიის პრესსამსახურში განუცხადეს დაბასა და სოფლებში დაზიანდა სახლების სახურავები, შიდა საუბნო გზები.
“სახლების სახურავები დაზიანებულია დაბასა და ათამდე სოფელში. ჯვარცხმის ადმინისტრაციულ ერთეულში, ინტაბუეთში, გზის დამცავი კედელი ჩამოიშალა; კოხნარში, ბუკისციხეში, ზემოხეთსა და ზომლეთში დაზიანებულია შიდა გზები. მიმდინარეობს გაწმენდის სამუშაოები”, _ გვითხრეს მერიის პრესსამსახურში.
პრესსამსახურისვე ინფორმაციით, სოფელ სამებაში 240-მდე ოჯახს შეუწყდა ბუნებრივი აირის მიწოდება.
„სამების ცენტრში ორ ადგილას მეწყრული პროცესი განვითარდა, რის შედეგადაც 240-მდე ოჯახს შეუწყდა ბუნებრივი აირის მიწოდება. შესაბამისი სამსახურები აქტიურად მუშაობენ მიყენებული ზარალის აღმოსაფხვრელად.
ჩოხატაურის მუნიციპალიტეტის მერის პირველი მოადგილე მაია კუტუბიძე ადგილობრივი თვითმმართველობის წარმომადგენლებთან ერთად სტიქიის ზონაში იმყოფებოდა და ვითარებას ადგილზე გაეცნო.
გარდა ამისა, თოვდა ბახმაროში, სადაც თოვლის საფარმა 70 სანტიმეტრს მიაღწია.
“ბახმაროში მგზავრობისგან თავი შეიკავეთ. თოვლის საფარმა 70 სმ-ს მიაღწია. მუშაობს შესაბამისი ტექნიკა მაგრამ, ინტენსიური თოვის გამო ვერ ხერხდება გზის გახსნა ისე რომ გავლადი იყოს, _ დაწერა სოციალურ ქსელში ჩოხატაურის მუნიციპალიტეტის მერიის ზედამხედველობის სამსახურის წარმომადგენელმა ბახმაროში გაგა ყაჭეიშვილმა.
