მას შემდეგ, რაც “გურია ნიუსის” ვებგვერდზე გამოქვეყნდა ინფორმაცია იმის შესახებ, რომ ჩოხატაურის მუნიციპალიტეტის სოფელ ფარცხმაში მდებარე მაღაზიის გამყიდველს კორონავირუსი დაუდასტურდა, სოფლის მცხოვრებლები ისევ დაგვიკავშირდნენ.
როგორც ადგილობრივები ირწმუნებიან, სოფელში თვითიზოლაციაში არავინ იმყოფება.
ჩვენ ვცადეთ დადგენა დიდია თუ არა იმ ადამიანების წრე, ვისთანაც კონტაქტი მაღაზიის გამყიდველს ჰქონდა. ამის გასარკვევად ქალბატონ ნათელას ტელეფონის მეშვეობით დავუკავშირდით. მისი თქმით, როცა თავი შეუძლოდ იგრძნო, მაღაზიაში სამუშაოდ აღარ მისულა, რამდენიმე დღის შემდეგ კი ვირუსი დაუდასტურდა და გავრცელებული ინფორმაცია, რომლის მიხედვითაც, ის ტესტის ჩატარების მიუხედავად, მაღაზიაში მუშაობას განაგრძობდა, სიმართლეს არ შეესაბამება.
შესაბამისად, ქალბატონი ნათელა ამბობს, რომ შეხება არავისთან ჰქონია, მით უმეტეს კი, სკოლის მოსწავლეებთან.
„მაღაზიაში როცა ვმუშაობდი კორონავირუსი არ მქონდა. ავად რომ გავხდი, კოვიდი აღმომაჩნდა 3 დღის შემდეგ. ცრუ ინფორმაცია გავრცელდა. მე კოვიდი იმიტომ მაქვს რომ თავიდან მქონია ჩუმი ანთება, რომელიც ვერ გავიგე. აქ ასე დამიდასტურდა საავადმყოფოში. ამ ზაფხულს მქონია გადატანილი ჩუმი ანთება, ამიტომ საგანგაშო მდგომარეობა არ მაქვს. როცა ავად გავხდი, მას შემდეგ მაღაზიაში არ ვყოფილვარ და არც არავისთან არ მქონია შეხება. არანაირი გავრცელების წყარო არ ვარ. ოდნავ ცუდად რომ ვიგრძენი თავი, მაღაზიაში მას შემდეგ არ წავსულვარ.
კორონავირუსი, პირველ რიგში, არის უჟანგბადობა და უჰაერობაა. ასე სამსახურში როგორ იმუშავებ და ფეხზე როგორ დადგები?“_ გვეუბნება მაღაზიის გამყიდველი.
იმის დასადგენად იცავენ თუ არა იზოლაციას სოფლის ის მაცხოვრებლები, ვისაც მაღაზიის გამყიდველთან ახლო კონტაქტი ჰქონდათ, ჩოხატაურის ჯანდაცვის ცენტრის პრესსამსახურს დავუკავშირდით.
პრესსამსახურის განმარტებით, მსგავს შემთხვევაში იზოლაციის დამრღვევი 5 000 ლარით ჯარიმდება. იზოლაციაში მყოფი პირები პოლიციის მიერ კონტროლდება და თუ სოფლის რომელიმე მოსახლე შენიშნავს, რომ იზოლაციის წესი რომელიმე მათგანმა დაარღვია, ჯანდაცვის ცენტრს უნდა დაუკავშირდნენ და კონკრეტულად დაასახელონ ის პირი, ვინც სახლის მიღმა დაინახეს.
„კოვიდინფიცირებულთან კონტაქტში მყოფი ყველა პირი გადაგვყავს იზოლაციაში. ამას აკონტროლებს ცალკე პოლიცია და ცალკე _ სოფელი.
იზოლაციაში მყოფი პირი გარეთ ვერ გამოვა, როგორც კი დაინახავენ 5 000 ლარია ჯარიმა და არ გვგონია, ფარცხმაში ვინმე ისეთი შეძლებული იყოს, რომ ამხელა თანხის გადახდა მისთვის არაფერს წარმოადგენდეს. გაფრთხილება მიცემულია. პოლიციამ იცის, სოფელმა იცის და თუ ვინმეს შენიშნავენ გარეთ, მაშინ კონკრეტულად სახელი და გვარი უნდა გვითხრან, რომ გადავაყვანინოთ სპეციალურ სივრცეში“,_ ამბობენ ჩოხატაურის ჯანდაცვის ცენტრში.
ცნობისთვის, „გურია ნიუსს“ ჩოხატაურის მუნიციპალიტეტის სოფელ ფარცხმიდან გუშინ დაუკავშირდნენ. როგორც სოფლიდან გვაცნობეს, სოფლის მაღაზიის გამყიდველს კორონავირუსი დაუდასტურდა. მათი თქმით, სოფელში ერთადერთი მაღაზიაა, რომლითაც მთელი სოფელი, მათ შორის სკოლის მოსწავლეები სარგებლობენ.
„რა გვეშველება, ძალიან შეშინებულები ვართ. ჩვენი სოფლის მაღაზიის გამყიდველს კორონავირუსი დაუდასტურდა. ეს სოფელში ერთადერთი მაღაზიაა და მთელი სოფელი ამით სარგებლობს. მათ შორის, სკოლის მოსწავლეებიც და მასწავლებლებიც. ამ ქალბატონის კონტაქტია, ფაქტობრივად, მთელი სოფელი. აი როგორც ქვაბღასა და ზოტში გააკეთეს, დატესტეს მთელი სოფელი ისე უნდა გაკეთდეს აქაც. გვაინტერესებს, ჩატარდება თუ არა სოფელში მასობრივი კვლევა“, _ გვეუბნებიან სოფლის მცხოვრებლები.
ჩოხატაურის ჯანდაცვის ცენტრის ცნობით, ამ დროისთვის სოფელში ეპიდკვლევის ჩატარების აუცილებლობა არ დგას.
