„გიორგი იაკობაშვილი საზოგადოებრივი მაუწყებლის სამეურვეო საბჭოს ერთ-ერთ კანდიდატად კანონით დადგენილი წესით შევარჩიეთ“ _ ამბობს „გურია ნიუსთან“ საუბრისას სოსო გალუმაშვილი, რომელიც იმ კომისიის წევრი იყო, რომელსაც კანდიდატები პარლამენტისთვის უნდა წარედგინა.
კითხვაზე, რითი მოხიბლა კომისია იაკობაშვილმა, რომელიც ყოველთვის გამოირჩეოდა ჰომოფობიური განცხადებებით გალუმაშვილი ასე გვპასუხობს:
„განსაზღვრულია ყველა პროცედურა კანონით და შევარჩიეთ 3 თუ 4 კანდიდატი.
როცა კანდიდატად დარეგისტრირდნენ და კომისიამ ღიად დააფიქსირა დარეგისტრირებულების ვინაობა, არცერთი საჩივარი არცერთ კანდიდატზე კომისიაში არ შემოსულა. იაკობაშვილთან ერთად პარლამენტს კიდევ რამდენიმე კანდიდატურა წარვუდგინეთ, “ _ აღნიშნა გალუმაშვილმა.
_ ბატონო სოსო, რას ფიქრობთ იმაზე, რომ თქვენს მიერ შერჩეული კანდიდატი ისევ აგრძელებს ადამიანებზე თავდასხმებს, ისევ ლანძღავს არასამთავრობო სექტორს და დღეს უკვე რეგიონში მომუშავე ჟურნალისტებს გადაწვდა?
_ არ მინახავს განცხადება, თუმცა, არასამთავრობო სექტორზე თავდასხმა, რეგიონალური ჟურნალისტების გალანძღვა, რასაკვირველია არ მომწონს და არ მივესალმები ასეთ საქციელს. თუ მითუმეტეს უმიზეზოდ მოხდა ეს ფაქტი, _ გვითხრა გალუმაშვილმა.
შეგახსენებთ, რომ გიორგი იაკობაშვილმა თავის პოსტში ჟურნალისტური ეთიკის ქარტია და რეგიონში მომუშავე ჟურნალისტები გააკრიტიკა და მათ შეურაცხყოფა მიაყენა:
“ჟურნალისტური ეთიკის ქარტია” არის ერთი ჩვეულებრივი არასამთავრობო ორგანიზაცია (ასო) რომელსაც ყავს 311 წევრი–ხელმომწერი. არანაირი წონა და ავტორიტეტი სერიოზულ, ნორმალურ ჟურნალისტებს შორის არ გააჩნია.
ამ 311 ხელმომწერიდან უმრავლესობა არის რეგიონიდან და მათთვის სასიცოცხლოდ აუცილებელია დონორებთან ურთიერთობა, რაც ფაქტობრივად შეუძლებელია ე.წ. ქარტიაზე ხელმოწერის გარეშე.
ანუ, თუ ზვიად ქორიძეს და სხვა ზვიადქორიძეებს ხელს არ აუწევენ და თავს არ დაუქნევენ, “კაი ჩიტს დაიჭერენ“.
ასე რომ, შეეშვით მაგ ასო–ზე სტატუსების წერას და ქოთქოთს. ეგენი ისეთივე ჟურნალისტები არიან, როგორც ბუღაძე–ტურაშვილი – მწერლები და ქეთათო–სტეფანე – მომღერლები.
დაიკიდეთ და გულზე მოგეშვებათ.
და, საერთოდ, ბოლომდე დაიკიდეთ ეს მესამე სექტორად წოდებული მეხუთე კოლონა.
თქვენი ქოთქოთი მათ სივებში იწერება, აქტივობაში ეთვლებათ, რის გარეშეც ევროპაში დაფუძნებული და რუსეთიდან დაფინანსებული ფონდებიდან მსუყე გრანტებს კი არა, სამში თამამს მიიღებენ.
ეს არის და ეს.” _ წერს იაკობაშვილი ფეისბუქის საკუთარ გვერდზე.
ჩვენ შევეცადეთ კომენტარები იაკობაშვილისგანაც მიგვეღო, თუმცა ის “გურია ნიუსის” სატელეფონო ზარებს არ პასუხობს. იაკობაშვილმა ჩვენ მიერ დასმულ შეკითხვას არც სოციალურ ქსელში უპასუხა.
ამ თემაზე ამ დრომდე კომენტარს არ აკეთებს საპარლამენტო უმრავლესობა, რომელმაც იაკობაშვილს ერთხმად დაუჭირა მხარი. საპარლამენტო უმრავლესობის ლიდერის არჩილ თალაკვაძის თქმით პოსტს არ იცნობს და შეფასებებს მოგვიანებით გააკეთებს.
იაკობაშვილის განცხადებას უკვე გამოეხმაურენ რეგიონში მომუშავე მედია ორგანიზაციები, რომლებიც პარლამენტს და სამეურვე საბჭოს რეაგირებას სთხოვენ.
