ეგება, ამფერი წერილი არასდროს მიგიღიათ, მარა, ნამეტნავად ახირებული ვინცხა ვარ და ამიზა არ გამცინოთ. ილიკოც მეჩხუბება და ილარიონაც, მაგფერი წერილი არ გაგზავნო, თავი მოგვეჭრებაო, მარა, მე მაგინის ამფერ სიტყვებზე მეცინება, ჩვენ ხომ თავი მარტო ქუდის დასახურათ გვაქვს(?!).
ხო, ახლა იიი, რეიზაც გწერთ, თანაც ორივეს.
მე რომ ბაღანა ვიყავი, მაშინ მარტო თოვლის ბაბუა ვიცოდი, ვინ იყო.
შეიცვალა ყველაფერი და თურმე, მსოფლიოს იმფერი სანტა ჰყოლია, ყველა სურვილს რომ ასრულებს.
ილიკო და ილარიონი იმასაც კი მიჩივიან, მაგინი ბაღნების სურვილს ასრულებენო, მარა, მეც მაქ ჩემებური პასუხი: ადამიანი, რომ მოხუცდება, ბაღანასავით სხვისი შემყურეა, მიმნდობი, გულუბრყვილო…
ჰოდა, 79 წლის ქალი ხომ ვყოფილვარ კაი ხნის ბაღანა!
აი, ამიზა გიგზავნით ამფერ წერილს.
არ ვიცი, რომელი იქნება თქვენ ორ შორის უფრო გამგები და მოწყალე. ილიკო და ილარიონი მიჩივიან, სანტას ქართული არ ეცოდინებაო. მაი არც მიკვირს. ახლა იმდენი ქართველია, ქართული რომ არ იცის, მარა, მის-მის საქმეებს მაინც კარქათ აკეთებენ. დევიჯერო, ყოვლისშემძლე სანტა ერთ თარჯიმანს ვერ ნახავს ამ დუნიაზე?!
ახლა იმას გეტყვით, რეიზაც ამდენი ვილაპარაკე.
ბევრს აფერს არ გთხოვთ: 6 თვეს მაინც რომ მეყოს შაქრის, წნევის და სისხლძარღვის სისტემის წამლები გამომიგზავნეთ. ამით პენსიის ფულს დავზოგავ და სხვა რაცხაში მევიხმარ.
შემისრულებთ ამ უცნაურ სურვილს? ვიყო თქვენს მოლოდინში.
გეხვეწებით, ნუ გამხდით ილიკოს და ილარიონას სიცილის მიზეზათ. მაგინის გულის გასახეთქად გამახარეთ!
ოლღა ბებიას საუბარი ჩაიწერა ყოფილმა ჟურნალისტმა,79 წლის ეთერ ქადეიშვილმა
