პროდუქტზე, კონკრეტულად კი პურისფქვილზე ფასის ზრდის შესახებ, უკვე ყოველდღიურად საუბრობენ ოზურგეთის ყველა სავაჭრო სივრცეში.
_15 დღეა, პურისფქვილი არ გამიყიდია. ვეღარ ყიდულობს ხალხი. ნახეთ, „გულისტანის“ ფასი ხომ არ იკითხება. 37 ლარია 25 კილოგრამიანი ტომარა. შესაბამისად, ორმაგია 50 კილოგრამიანი ტომარას ფასი. მეტი არაფერი არ უნდა იყიდოს ხალხმა? ვერც ყიდულობენ, – გვეუბნებიან რიგითი გამყიდველები, რომლებიც ძირითადად, სხვა პროდუქტთან ერთად, პურისფქვილით ვაჭრობენ.
_გამოდით, ყველამ ნახეთ, რა ხდება, რა ვქნათ ამ პანდემიის დროს, ყველაზე ძალიან პურისფქვილის ფასი უნდა იყოს დარეგულირებული. გაზაფხულზე ასე შეგვპირდა მთავრობა, თუმცა უკვე დაგვახრჩვეს და ესაა. 75 ლარს რომ ერთ ტომარა ფქვილში გადაიხდი და 20 დღეც არ კმარა ოჯახში, სხვა რა უნდა ქნას გლეხმა? სასწრაფოდ მოგვხედოს მთავრობამ და თავისი სიტყვა შეასრულოს, რაც გაზაფხულზე დადო, – გვეუბნებიან რიგითი მოქლაქეები.
„გურია ნიუსი“ არაერთ საცხობს და სასურსათო მაღაზიას თუ სავაჭრო ობიექტს ეწვია.
ბევრად განსხვავებული, ყველაზე მაღალი ფასი „გულისტანს“ აქვს. სულ ცოტა, ერთი 25 კგ. ტომარა პურისფქვილი 37,50 ლარი ღირს.
საცხობებში სადაც, თონის პურს(სხვა დასახელებისაც) აცხობენ, გვეუბნებიან, რომ ცდილობენ, საბითუმო ფასებში შეიძინონ.
_ჩვენ „პურადს“ ვყიდულობთ. ფოთიდან შემოდის. 65 ლარი ღირს ერთი 50 კგ წონის ტომარა. სოფელ მერიაშია მათი საწყობი და იქ მივდივართ, _ გვითხრა აღმაშენებლის ქუჩაზე მდებარე საცხობის მეპატრონემ.
აქვე სხვა საცხობში გვითხრეს, რომ ახერხებენ, 50 კგ ტომარა ფქვილი, „კარმენის“ დასახელების, იყიდონ 57 ლარად, საბითუმო ფასში.
_ თუმცა, ადგილზე უნდა მიხვიდე, უნდა ეძებო, ჩვენც ვწვალობთ, – გვითხრეს აქ.
ცოტა ხნით ადრე, როცა ჩვენ ფასების სწრაფ ზრდაზე ვწერდით, „გულისტანის“ მენეჯერმა მარინა ჩხაიძემ, გვთხრა, რომ გაზაფხულზე, როცა მთავრობის მითითებით, ცხრა დასახელების პროდუქტი, მათ შორის ფქვილი, არ უნდა გაძვირებულიყო.
_თუმცა, საუბარი იყო, ნაწილობრივ სუბსიდირებაზე მთავრობის მხრიდან, რაც კონკრეტულდ „გულისტანის“ მიმართ არ მოხდა. ფასების ზრდაც ამის გამოა გამოწვეული, – გვითხრა ქალბატონმა მარინამ.
ვრცლად ფასების უსწრაფესი ზრდის ტენდენციაზე, განსაკუთრებით პურისფქვილზე, „გურია ნიუსი“ მალე შესთავაზებს მკითხველს.
