უკვე ინიცირებული გამჭვირვალობის კანონის შესახებ, რომელზეც ხელისუფლება ამბობს, რომ აუცილებელია საზოგადოებრივი აზრის შექმნაში მონაწილე სუბიექტების დაფინანსების გამჭვირვალობის ცოდნა, აზრთა საკმაო სხვადასხვაობაა საზოგადოებაში.
აზრთა სხვადასხვაობამ, ღია დაპირისპირებამ, სხვადასხვა პოლიტიკურ პოზიციაზე მყოფ პოლიტიკურ ორგანიზაციებსა თუ სამოქალქო აქტივისტებსა და ადამიანთა ჯგუფებს შორის, პიკს მიაღწია.
რას ფიქრობს ამ დროს საზოგადოების დიდი ნაწილი?
„გურია ნიუსი“ შეეცადა, როგორც აქტიური მოქალაქეების, ისე არასამთავრობო ორგანიზაციების აზრი გამოეკითხა.
რაც თვალში საცემი და სამწუხაროა, საზოგადოების დიდი ნაწილი, რიგითი მოქალაქეები აცხადებენ, რომ არც წაუკითხავთ ეს კანონი და გარდა იმისა, რაც ტელევიზიებიდან ესმით, არც არაფერი იციან ხეირიანად.
ლალი ლომინაძე, ოზურგეთის მკვიდრი: _ სიმართლე გითხრათ, არ ვიცი ამ კანონის შესახებ ბევრი არაფერი. კარგი იქნება, თუ გამოაქვეყნებენ ისეთი ფორმით, რომ ჩვენთვის ადვილად წასაკითხი და ხელმისაწვდომი იყოს. მე დიდხანს ვმუშაობდი დიდ ორგანიზაციაში საქმის მწარმოებლად, ბუღალტრად და არ ვარ ისეთი ჩამორჩენილი, რომ რაღაც ვერ გავიგო. უმეტესად, კინკლაობის სახე მიიღო ამ ყველაფერმა. სურვილი დიდი მაქვს, კარგად გავერკვე. ასევე დიდი სურვილი მაქვს, პირველ რიგში, იყოს მშვიდობა და ერთმაეთის გაგება.
ავთანდილ ბერიშვილი, ოზურგეთის მკვიდრი: _ ამ საკითხის თუ კანონის ირგვლივ მასებში გაურკვევლობაა. დაჯდეს ორივე მხარე დ ისუბრონ გარკვევით. გამოაქვეყნონ, გახდეს ადვილად გასაგები და ხელმისაწვდომი. ერთი რამ კი ვიცი, რომ ეს კანონი რუსული არაა. უბრალოდ, „რუსულის“ ძახილი მოდაში შემოვიდა დახეული ჯინსივით…
_ რა ვიცი, რუსულია თუ ფრანგული. კი ხოცავენ ერთმანეთს და ხალხი არავის ახსოვს. ჩვენთვის იკლავენ ვითომ თავს. ვინც ჭკვიანი და კარგი იყო, უცხოეთში წავიდა. ვინც ცუდი იყო, ოპოზიციაშიცაა და ხელისუფლებაშიც. ჰოდა, არიან ამბავში. ესაა ჩემი აზრი, თუ ძალიან გაინტერესებთ, _ გვეუბნება პროფესიით ინჟინერი, ოზურგეთელი ვაჟა კალანდაძე.
_ მე 23 წლის ვარ და კარგად არ ვიცი, რა ხდება. ვიცი მხოლოდ სატელევიზიო სივრციდან. ევროპისკენ რომ უნდა ვიაროთ, ორი აზრი არაა. მთავარია, ერთმანეთთან მოვძებნოთ შეხების წერტილები და ასე არ ვიყოთ დაპირისპირებული. სულ ასეთი დაპირისპირებით როგორ უნდა იცხოვროს ქვეყანამ? _გვეუბნება ახალგაზრდა ლუკა ხინთიბიძე.
გიგი მახარაძე, გურიის სამოქალქო ცენტრის დირექტორი: _ უპირველეს ყოვლისა, ეს არ არის კანონი გამჭვირვალობის შესახებ და ეს სათაურიდანაც ჩანს. უფრო სწორად, კანონს სათაურშივე ეტყობა, რომ ის არანაირად არაა გამჭვირვალე. როგორც მახსოვს, ის დაინიცირებულია, როგორც კანონი უცხოური ძალის გავლენის გამჭვირვალობაზე თუ რაღაც მსგავსი და არა ფინანსურ გამჭვირვალობაზე. გარდა ამისა, მაგალითად, ჩვენი ორგანიზაციის შესახებ შესაბამის ფინანსურ სამსახურებს აქვთ ზუსტი ინფორმაცია და უბრალოდ, ეს ყველაფერი მანიპულირების მიზნით მოქმედებაა. არავითარ ფინანსურ გამჭვირვალობას ხსენებული კანონი არ ემსახურება, უბრალოდ, ეს არის სურვილი მიაკრას რაღაც იარლიყები სხვადასხვა არასამთავრობო ორგანიზაციებს, სამოქალქო აქტივისტებს თუ ყველას, ვინც არ მოსწონთ. რა თქმა უნდა, წინააღმდეგი ვარ ასეთი კანონის და მისი მიღების, რაც არ უნდა მოხდეს!
ჩვენთან ისუბრა, ასევე, ოზურგეთის „პროგრესის სახლის“ დამფუძნებელმა ლევან მჟავანაძემ: _ მიმაჩნია, რომ ამ კანონის მიღება, პირველ რიგში, ხელს შეუშლის ევროკავშირში ჩვენი ქვეყნის გაწევრიანებას. ანუ იმ ფანჯარას ხურავს, რომლის გახსნაც ისტორიული შანსია ჩვენთვის. და ეს იმიტომ, რომ კანონი სცდება იმ ჩარჩოებს, რომლის ფარგლებშიც ჩვენ ვალდებულებები გვაქვს აღებული. გამჭვირვალობა არასდროს ყოფილა პრობლემა! როცა პროექტი არის მოგებული და მიიღებს გრანტს ორგანიზაცია, ის მაშინვე რეგისტრირდება საგადასახადო სისტემაში და სახელმწიფომ ეს იცის. და თუ მანდამაინც დეკლარირებაა საჭირო, ასეთი კანონის მიღება არ იყო საჭირო. შესაძლებელი იყო შესწორების შეტანა. ამ ნაბიჯს სხვა რეჟიმში გადაჰყავს პროცესი. მაშინ ჩაწერონ, რომელია მტრულად გაწყობილი ქვეყანა. თუ რუსეთია, კი, ბატონო, ჩაწერონ. მაგრამ, როცა ეს მეგობარ ქვეყნებს ეხება, ცუდად იმოქმედებს ურთერთობაზე. ვიმეორებ, ამ კანონის მიღების შემდეგ, შესაძლოა, მთლიანად დაიხუროს ის ფანჯარა, რაც ჩვენთვის გააღო ევროკავშირმა. სხვათა შორის, აფხაზეთშიც იყო კრემლის დაკვეთა ასეთი კანონის მისაღებად. ამიტომ ეძახის საზოგადოება მას რუსულ კანონს, _ გვითხრა ლევან მჟავანაძემ.
აქვე აღვნიშნავთ, რომ არაერთმა არასამთავრობო ორგანიზაციამ კომენტარზე უარი განაცხადა.
ჩვენ კვლავ და უფრო ვრცლად მოგწვდით მსგავს გამოკითხვას გამჭვირვალობის შესახებ კანონზე.
ავტორი
